Umadanika iti Dios
Ti Namarsua a Maikari nga Idaydayawtayo
PINAMPANUNOTMO kadin no ‘Ania ti panggep ti biag?’ Awan ti maipaay a sungbat dagidiay mamati a ti biag ket resulta ti ebolusion. Ngem saan a kasta kadagidiay mamati iti natibker a kinapudno a ni Jehova a Dios ti Gubuayan ti biag. (Salmo 36:9) Ammoda nga adda panggep ti panangparsuana kadatayo, kas nailanad iti Apocalipsis 4:11. Usigentayo no kasano a dagita a sasao, nga insurat ni apostol Juan, ilawlawagna no apay nga addatayo ditoy.
Kastoy ti panangiladawan ni Juan iti nailangitan a koro a mangidaydayaw iti Dios: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” Ni laeng Jehova ti maikari iti kasta a pammadayaw. Apay? Agsipud ta ‘pinarsuana ti amin a bambanag.’ Ania ngarud ti rumbeng nga aramiden dagiti amin nga intelihente a parsuana?
Naikuna a maikari ni Jehova nga “umawat” iti dayag, dayaw, ken pannakabalin. No kasta, awan duadua nga Isu ti kadayagan, katan-okan, ken mannakabalin-amin a Persona iti uniberso. Nupay kasta, saan a bigbigen ti kaaduan a tattao nga isu ti Namarsua. Kaskasdi, adda dagidiay makailasin kadagiti ‘di makita a kualidad’ ti Dios babaen kadagiti pinarsuana. (Roma 1:20) Matignayda a mangipaay iti dayag ken dayaw kenni Jehova buyogen ti manangapresiar a puso. Ipakaammoda kadagiti amin a dumngeg ti maipapan kadagiti natibker a pammaneknek a ni Jehova ti nangaramid a nakasaysayaat kadagiti amin a bambanag. Gapuna, maikari iti nadayaw a panagraemtayo.—Salmo 19:1, 2; 139:14.
Ngem kasano nga umawat ni Jehova iti pannakabalin manipud kadagiti agdaydayaw kenkuana? Siempre, awan ti asinoman a makaited iti pannakabalin iti daydiay mannakabalin-amin a Namarsua. (Isaias 40:25, 26) Ngem gapu ta naparsuatayo iti ladawan ti Dios, nasagudayantayo iti sumagmamano kadagiti galadna, maysa kadagita ti pannakabalin, wenno bileg. (Genesis 1:27) No talaga nga apresiarentayo ti inaramid ti Namarsua agpaay kadatayo, matignaytayo a mangusar iti bileg ken pigsatayo a mangidayaw ken mangipadayag kenkuana. Imbes nga usarentayo ti pigsatayo nga agpaay laeng kadagiti bukodtayo a pagimbagan, usarentayo ketdi ti amin a bilegtayo nga agserbi ken Jehova a Dios yantangay isu ti maikari iti dayta.—Marcos 12:30.
Apay ngarud nga addatayo ditoy? Sumungbat ti maudi a paset ti Apocalipsis 4:11: “Gapu iti pagayatam [amin a naparsua a bambanag] napaaddada ken naparsuada.” Ti Dios ti makinggapuanan no apay nga addatayo ditoy, saan a datayo. Dayta ti makagapu no apay a kawaw ken awan panggep ti biag no usaren laeng dayta agpaay kadagiti bukod a pagimbagan. Tapno maaddaantayo iti talna ti panunot, rag-o, ken pannakapnek, masapul nga ammuentayo ti pagayatan ti Dios ken agbiagtayo a maitunos iti dayta. Iti kasta laeng a pamay-an a maammuantayo ti panggep ti pannakaparsua ken kaaddatayo ditoy.—Salmo 40:8.
[Picture Credit Line iti panid 31]
NASA, ESA, ken A. Nota (STScI)