Adda Kadi Nagan ti Dios?
Dagiti gagangay a sungbat:
▪ “Ti naganna ket Apo.”
▪ “Awan ti personal a naganna.”
Ania ti insuro ni Jesus?
▪ “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo.’” (Mateo 6:9) Patien ni Jesus nga adda nagan ti Dios.
▪ “Impakaammok kadakuada ti naganmo ket ipakaammokto dayta, tapno ti ayat a pinangayatmo kaniak maadda koma kadakuada ken siak a maikaykaysa kadakuada.” (Juan 17:26) Impakaammo ni Jesus ti nagan ti Dios.
▪ “Saandakton a pulos makita agingga a kunaenyo, ‘Bendito daydiay umay iti nagan ni Jehova!’” (Lucas 13:35; Salmo 118:26) Inusar ni Jesus ti nagan ti Dios.
TI Dios a mismo ibagana kadatayo ti naganna. Kinunana: “Siac ni Jehova, dayta ti naganco.”a (Isaias 42:8, Ti Biblia, PBS) Ti nagan a Jehova ti kalatakan nga Iloko a patarus ti Hebreo a nagan nga inyawag ti Dios iti bagina. Nalabit a masdaawkayo a makaammo a daytoy a naisangsangayan a Hebreo a nagan ket nagparang iti rinibu a daras kadagiti nagkauna a manuskrito ti Biblia. Kinapudnona, no idilig iti dadduma a nagan, ad-adu a daras a nagparang daytoy a nagan iti Biblia.
No maisaludsod, “Ania ti nagan ti Dios?” sumungbat ti dadduma, “Apo.” Awan nakaidumaan dayta iti panangisaludsod iti, “Asino ti nangabak iti eleksion?” a masungbatan iti, “ti kandidato.” Agpada a saan a nalawag dagita a sungbat, yantangay ti “Apo” ken “kandidato” ket saan a nagan.
Apay nga impalgak kadatayo ti Dios ti naganna? Tapno isu ket ad-adda a maam-ammotayo. Kas panangyilustrar, mabalin a ti maysa ket maawagan iti Sir, Boss, Tatang, wenno Lolo, depende iti kasasaad. Nupay dagitoy a titulo adda ibagada maipapan iti dayta a tao, ti naganna ipalagipna ti amin nga ammotayo maipapan kenkuana. Umasping iti dayta, dagiti titulo a kas iti Apo, Mannakabalin-amin, Ama, ken Namarsua itampokda ti nagduduma nga aramid ti Dios. Ngem ti laeng personal a naganna a Jehova ti mangipalagip kadatayo iti amin nga ammotayo maipapan kenkuana. Kasano koma a maam-ammoyo ti Dios no diyo met ammo ti naganna?
Napateg saan laeng a ti panangammo iti naganna no di ket ti panangusar pay iti dayta. Apay? Gapu ta ibaga kadatayo ti Biblia: “Tunggal maysa nga umawag iti nagan ni Jehova maisalakanto.”—Roma 10:13; Joel 2:32.
[Footnote]
a Para iti pannakailawlawag iti kaipapanan ti nagan ti Dios, ken no apay a saan a nagparang dayta iti dadduma a patarus ti Biblia, mabalinyo a kitaen ti panid 195-197 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.
[Blurb iti panid 6]
Ti maysa ket maawagan iti Sir, Boss, Tatang, wenno Lolo, depende iti kasasaad. Ngem ti personal a naganna ipalagipna ti amin nga ammotayo maipapan kenkuana