Awaten Kadi ti Dios ti Amin a Kita ti Panagdayaw?
Dagiti gagangay a sungbat:
▪ “Amin a relihion ket nagduduma a dalan nga agturong iti Dios.”
▪ “Saan a napateg no ania ti relihionmo basta napasnekka.”
Ania ti insuro ni Jesus?
▪ “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” (Mateo 7:13, 14) Saan a mamati ni Jesus nga amin a relihion ket agturong iti Dios.
▪ “Adunto ti agkuna kaniak iti dayta nga aldaw, ‘Apo, Apo, saankami aya a nagipadto iti naganmo, ken nangparuar kadagiti sairo iti naganmo, ken nagaramid iti adu a mannakabalin nga aramid iti naganmo?’ Ket kaskasdi nga iti dayta ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mateo 7:22, 23) Saan nga amin nga agkunkuna a pasurot ni Jesus ket awatenna.
ADU a tattao ti napeklan iti relihionda. Ngem kasanon no saan a maitunos iti Sao ti Dios dagiti an-annurotenda a pannursuro? Impatuldo ni Jesus ti peggad ti panangannurot kadagiti tradision nga inaramid ti tao idi kinunana kadagiti lider ti relihion idi kaaldawanna: “Pinagbalinyo nga awan kapapay-an ti sao ti Dios gapu iti tradisionyo.” Kalpasanna, inadawna dagitoy a sasao ti Dios: “Daytoy nga ili immasidegda babaen ti ngiwatda, ket indaydayawdak babaen laeng kadagiti bibigda, ket inikkatda nga inyadayo kaniak ti mismo a pusoda. Kinaubbaw nga agtultuloyda nga agdayaw kaniak, agsipud ta isuroda ti bilbilin dagiti tattao kas doktrina.”—Mateo 15:1-9; Isaias 29:13.
Malaksid kadagiti patpatien, napateg met ti kondukta. Kuna ti Biblia maipapan kadagiti dadduma nga agkunkuna nga agdaydayawda iti Dios: “Silalatak nga ideklarada nga ammoda ti Dios, ngem paglikudanda babaen kadagiti aramidda.” (Tito 1:16) Kinapudnona, kuna ti Biblia maipapan kadagiti agbibiag iti kaaldawantayo: “Ad-addanto nga ayatenda ti nalabes a ragragsak ngem ti Dios. Agparangdanto a relihioso ngem saan met a makita iti biagda ti pudno a bileg ti relihion. Adaywam dagitoy a tattao.”—2 Timoteo 3:4, 5, Ti Baro a Naimbag a Damag Biblia.
Napateg ti kinapasnek ngem adda pay sabali a makalikaguman. Apay? Gapu ta mabalin a di umiso ti kinapasnek ti maysa a tao. Gapuna, napateg ti umiso a pannakaammo maipapan iti Dios. (Roma 10:2, 3) Makaay-ayotayo iti Dios no gun-odentayo dayta a pannakaammo ken agbiagtayo a maitunos iti kuna ti Biblia. (Mateo 7:21) No kasta, ti umiso a relihion ramanenna ti umiso a motibo, umiso a patpatien, ken umiso a kondukta. Ken ti umiso a kondukta kaipapananna ti inaldaw a panangaramid iti pagayatan ti Dios!—1 Juan 2:17.
No kayatyo a maammuan ti ad-adu pay a pannursuro ti Biblia maipapan iti Dios, kiddawenyo kadagiti Saksi ni Jehova nga iyadalandakayo iti Biblia.
[Blurb iti panid 9]
Ti umiso a relihion ramanenna ti umiso a motibo, umiso a patpatien, ken umiso a kondukta