Umadanika iti Dios

Idi Imbaga ni Jehova ti Kinasiasinona

Exodo 34:6, 7

KASANOM a deskribiren ti Dios? Ania dagiti galadna? Ken kasano ti panagtignayna iti nadumaduma a situasion? Ipapanmon a mabalinmo a saludsoden iti Dios ti maipapan iti kinasiasinona ken agimdengka bayat a sungsungbatannaka. Kasta a mismo ti napadasan ni Moises. Naimbag laengen ta napaltiingan a nangisurat iti napasamak.

Idi adda ni Moises idiay tapaw ti Bantay Sinai, impakaasina ken Jehova: “Ipakitam kaniak, pangngaasim, ti dayagmo.” (Exodo 33:18) Kabigatanna, ti propeta ket naaddaan iti pribilehio a makakita iti dayag ti Dios.a Saan nga indetalye ni Moises ti amin a nakitana iti nakaskasdaaw a nasirmatana. Imbes ketdi, insuratna dagiti imbaga ti Dios nga adayo a napatpateg ngem kadagiti nakitana. Usigentayo ti imbaga ni Jehova a mabasa iti Exodo 34:6, 7.

Immuna nga impakaammo ni Jehova maipapan kenkuana nga isu ket “maysa a Dios a naasi ken managparabur.” (Bersikulo 6) Sigun iti maysa nga eskolar ti Biblia, ti Hebreo a sao a naipatarus a “naasi” ipasimudaagna ti “nadungngo a pannakipagrikna [ti Dios], a kas iti pannakipagrikna ti ama kadagiti annakna.” Ti sao a naipatarus a “managparabur” ket nainaig iti berbo a “mangdeskribir iti tao a naimpusuan a tumulong iti agkasapulan.” Nalawag a kayat ni Jehova a maammuantayo nga umasping iti panangaywan dagiti nagannak kadagiti annakda ti panangaywanna kadagiti agdaydayaw kenkuana. Nabuyogan dayta iti nadungngo nga ayat ken kasta unay a pannakaseknan kadagiti kasapulanda.​—Salmo 103:8, 13.

Simmaganad, kinuna ni Jehova nga isu ket “nabannayat nga agunget.” (Bersikulo 6) Saan a nalaka nga agpungtot kadagiti adipenna ditoy daga. Imbes ketdi, isu ket napasensia kadakuada, ta an-anusanna dagiti pagkurkuranganda bayat nga ik-ikkanna ida iti tiempo a mangbalbaliw kadagiti dakes nga aramidda.​—2 Pedro 3:9.

Intuloy a kinuna ti Dios nga isu ket “naruay iti naayat a kinamanangngaasi ken kinapudno.” (Bersikulo 6) Ti naayat a kinamanangngaasi, wenno ti nasungdo nga ayat, ket nagpateg a galad a nakaibasaran ti nasinged a relasion ni Jehova iti ilina. (Deuteronomio 7:9) Ni Jehova ket gubuayan met ti kinapudno. Saan a maallilaw wenno mangallilaw. Yantangay isu ti “Dios ti kinapudno,” naan-anay a makapagtalektayo iti aniaman nga ibagana, a pakairamanan dagiti karina agpaay iti masanguanan.​—Salmo 31:5.

Kayat ni Jehova a maammuantayo ti sabali pay a nagpateg a kinapudno maipapan kenkuana, nga isu ket mangpakpakawan iti “biddut ken salungasing ken basol.” (Bersikulo 7) Isu ket “sisasagana a mamakawan” kadagiti agbabbabawi a managbasol. (Salmo 86:5) Maigiddato iti dayta, ni Jehova dina konsintiren ti kinadakes. Inlawlawagna a “nikaanoman saanto a mangipaay iti pannakailaksid iti dusa.” (Bersikulo 7) Ti nasantuan ken nalinteg a Dios siertuenna a madusa dagiti sipapakinakem a managbasol. Lak-amendanto met laeng ti bungbunga ti dakes nga ar-aramidda.

Iti panangdeskribir ni Jehova kadagiti galadna, nabatad a kayatna a maam-ammotayo isuna ken agbalintayo a pamiliar kadagiti galad ken wagasna. Saanka kadi a magutugot a mangammo iti ad-adu pay maipapan kadagiti makaay-ayo a galadna?

[Footnote]