Saludsod Dagiti Agbasbasa
Kaano a naitapuak ni Satanas manipud langit?—Apoc. 12:1-9.
Saan a dakamaten ti Apocalipsis a libro ti Biblia no kaano nga eksakto a napasamak dayta. Nupay kasta, dakamatenna dagiti agsasaruno a pasamak a makatulong kadatayo a mangpattapatta no kaano. Umuna ti pannakaipasdek ti Mesianiko a Pagarian. Simmaruno a “bimtak ti gubat sadi langit,” a nagresulta iti pannakaabak ni Satanas ken iti pannakaitapuakna manipud langit.
Nalawag nga ipatuldo ti Biblia ti 1914 kas ti tawen a panagpatingga “ti naituding a pampanawen dagiti nasion” ken pannakaipasdek ti Pagarian.a (Luc. 21:24) Kalpasan dayta, napasamak kadi a dagus ti gubat idiay langit, a nagresulta iti pannakaitapuak ni Satanas?
“Ti dragon [ni Satanas] nagtultuloy a sitatakder iti sanguanan ti babai a dandanin agpasngay,” kuna ti Apocalipsis 12:4, “tapno, inton nakapagpasngayen, maalun-onna ti anakna.” Ipakita dayta nga agingga a posible, kayat ni Satanas a dadaelen a dagus ti Pagarian apaman a maipasngay. Nupay saan a naibanag ni Satanas ti dakes a gakatna gapu iti ibaballaet ni Jehova, determinado ken awan sarday ti panangikagumaanna a mangdadael iti kaipaspasdek a Pagarian. Dayta ngarud ti makagapu a nagtignay a dagus ni “Miguel ken dagiti anghelna” tapno mapaksiat manipud langit “ti dragon ken dagiti anghelna” ket iti kasta, awan ti mangdadael iti Pagarian. Maibagatayo ngarud a ti pannakaabak ken pannakaitapuak ni Satanas ket napasamak kalpasan la unay ti pannakaipasngay ti Pagarian idi 1914.
Ti maysa pay nga ikabilangan ket ti panagungar dagiti napulotan a Kristiano, a nangrugi di nagbayag kalpasan ti pannakaipasdek ti Pagarian kas nabatad a patalgedan ti Biblia.b (Apoc. 20:6) Tangay saan a nadakamat a kadua ni Kristo dagiti napulotan a kakabsatna a nakigubat iti dragon ken dagiti anghelna, mabalin a nalpasen ti gubat idiay langit ken naitapuaken ni Satanas ken dagiti demoniona idi nangrugi ti panagungar dagiti kakabsat ni Kristo.
Saan ngarud nga ipalgak ti Biblia no kaano ti eksakto a pannakaitapuak ni Satanas ken dagiti demoniona manipud langit. Nupay kasta, nalawag a napasamak dayta di nagbayag kalpasan ti pannakaitrono ni Jesu-Kristo idiay langit idi 1914.
[Footnotes]