Agbalbaliw Kadi ti Panunot ti Dios?

KUNA ti Biblia maipapan iti Dios: “Kenkuana awan ti panagbaliw ti pagturongan ti anniniwan.” Ken impasigurado a mismo ti Dios: “Siak ni Jehova; saanak a nagbaliw.” (Santiago 1:17; Malakias 3:6) Anian a naiduma ni Jehova a Dios kadagidiay narigat a maay-ayo ken saan a mapagtalkan gapu ta kanayon nga agbaliwbaliw ti panunotda!

Ngem panunoten ti dadduma nga agbasbasa iti Biblia no adda ngata panawen a nagbaliw ti panunot ti Dios. Kas pagarigan, ni Jehova a Dios inikkanna idi dagiti Kristiano iti pannakabalin nga agaramid iti milagro, ngem ita saanen. Idi nagkauna a panawen, impalubosna ti poligamia ngem ita saanen. Iti sidong ti Mosaiko a Linteg, kalikagumanna ti panangsalimetmet iti Sabbath ngem ita saanen. Pammaneknek kadi dagitoy a nagbalbaliw ti Dios?

Umuna iti amin, masiguradotayo a saan a nagbalbaliw dagiti pagannurotan ti Dios mainaig iti ayat ken hustisia. Saan met a nagbalbaliw ti ‘agnanayon a panggepna’ a mangbendision iti sangatauan babaen ti Pagarianna. (Efeso 3:11) Nupay kasta, no kasano a mabalin nga agbalbaliw ti panangmatmatyo iti tao a kanayon a mangupay kadakayo, agbaliw met ti panagtignay ni Jehova sigun kadagiti kasasaad.

Baliwan met ti Dios dagiti instruksionna kadagiti tattao sigun iti situasion ken kasapulanda. Saantay koma a pakasdaawan dayta. Panunotenyo no ania ti aramiden ti nasigo a giya no adda peggad a sumangbay. Ibagana kadagiti agpaspasiar a magnada iti sabali a dalan nga adayo iti peggad. Saan a kayat a sawen dayta a nagbalbaliw ti pampanunotenna a destinasionda. Usigentayo ngarud dagiti tallo a nadakamat a pagarigan, a pakariribukan ti dadduma.

Apay nga Awanen Dagiti Milagro?

Apay a ti Dios inikkanna iti pannakabalin nga agaramid iti milagro ti dadduma a Kristiano idi umuna a siglo? Mabalin nga ammoyo nga idi Israel pay laeng ti nasion a pinili ti Dios, masansan nga impakitana babaen kadagiti milagro nga Isu ket adda kadakuada. Babaen ken Moises, impakita ti Dios ti nakaskasdaaw a pannakabalinna idi inispalna ti Israel manipud Egipto ken inwanwanna ida iti let-ang nga agturong iti Naikari a Daga. Nakalkaldaang ta dagiti Israelita maulit-ulit a saanda a nangipakita iti pammati. Idi inlaksiden ni Jehova ti Israel ken impasdekna ti kongregasion Kristiano, inikkanna dagiti apostol ken ti dadduma pay iti pannakabalin nga agaramid iti milagro. Kas pagarigan, da apostol Pedro ken Juan pinaimbagda ti maysa a nayanak a pilay, ken pinagungar met ni Pablo ti maysa a natay. (Aramid 3:2-8; 20:9-11) Gapu kadagita a milagro, naipasdek ti Kristianidad iti adu a lugar. Ngem apay a nagsardeng dagiti milagro?

Babaen ti maysa nga ilustrasion inlawlawag ni apostol Pablo: “Idi ubingak, nagsasaoak a kas ubing, nagpampanunotak a kas ubing, nagrasrasonak a kas ubing; ngem ita ta nataenganakon, inidiakon dagiti kababalin ti maysa nga ubing.” (1 Corinto 13:11) No kasano a ti panangtrato dagiti nagannak iti ub-ubing nga anakda ket naiduma iti panangtratoda iti adulto nga anakda, nagbaliw met ti panangtrato ni Jehova iti kongregasion Kristiano idi saanen a maibilang dayta kas “maysa nga ubing.” Inlawlawag ni apostol Pablo a “mapukawto” dagiti kasta a namilagruan a sagut kas iti abilidad nga agsao kadagiti ganggannaet a lenguahe wenno agipadto.​—1 Corinto 13:8.

Apay a Naipalubos Idi ti Poligamia?

Impakita ni Jesus a nangipasdek ti Dios iti pagalagadan mainaig iti panagasawa idi kinunana iti umuna a pagassawaan: “Ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag.” (Mateo 19:5) Ti panagasawa ket tungpal-biag a singgalut. Ngem idi a ti Dios pinagbalinna dagiti Israelita kas maysa a nasion ken intedna kadakuada ti Linteg, nagbalinen a gagangay ti poligamia. Gapuna, saan a ti Dios ti nangyusuat wenno nangiparegta iti poligamia. Kaskasdi, nangipaay kadagiti linteg a mangkontrol iti dayta. Idi nabuangay ti kongregasion Kristiano, nalawag a ti Sao ti Dios imparitnan ti poligamia​—1 Timoteo 3:2.

Impalubos ni Jehova ti sumagmamano a bambanag agingga iti panawen a masapul nga ilintegna dagita. (Roma 9:22-24) Impakita ni Jesus a temporario a pinalubosan ni Jehova dagiti di umiso a kostumbre ti panagasawa kas ‘pammalugod’ iti ‘natangken a panagpuspuso’ ti Israel.​—Mateo 19:8; Proverbio 4:18.

Apay a Temporario ti Panangsalimetmet iti Sabbath?

Inyusuat ti Dios ti linawas a panangrambak iti Sabbath kalpasan ti panangwayawayana kadagiti Israelita manipud Egipto. Idi agangay, pinagbalinna dayta a paset ti Linteg agpaay iti nasion. (Exodo 16:22-30; 20:8-10) Inlawlawag ni apostol Pablo nga indaton ni Jesus ti bagina kas sakripisio ken “pinagpatinggana . . . ti Linteg dagiti bilin a buklen dagiti pammilin” ken “pinunasna ti insurat ti ima a dokumento.” (Efeso 2:15; Colosas 2:14) Karaman ti linteg ti Sabbath kadagiti “pinagpatinggana” ken “pinunasna,” yantangay kuna ti Biblia: “Gapuna awan koma ti tao a mangukom kadakayo iti pannangan ken iyiinum wenno maipapan iti piesta wenno panangngilin iti baro a bulan wenno iti sabbath.” (Colosas 2:16) Apay ngarud a ti Dios intedna ti Linteg, a pakairamanan ti Sabbath?

Insurat ni apostol Pablo: “Ti Linteg nagbalin a manangisurotayo a mangiturong ken Kristo.” Sa innayonna: “Ita ta dimtengen ti pammati, awantayon iti sidong ti manangisuro.” (Galacia 3:24, 25) Saan a pammaneknek dayta nga agbaliwbaliw ti panunot ti Dios. Imbes ketdi, ti Sabbath ket temporario nga urnos ti Dios tapno isurona dagiti tattao a masapul a regular nga utobenda dagiti naespirituan a bambanag. Nupay temporario laeng dayta, iyanninawna ti panawen inton magun-odan ti sangatauan ti agnanayon a panaginana manipud kadagiti pisikal ken naespirituan a pakarigatan.​—Hebreo 4:10; Apocalipsis 21:1-4.

Mapagpannurayan ken Naayat a Dios

Ipakita dagiti nausig a pagarigan iti Biblia a nangipaay ni Jehova a Dios iti nagduduma a bilin ken instruksion iti nagduduma a tiempo. Ngem dina kayat a sawen a nagbalbaliw ti panunotna. Imbes ketdi, impaayna ti kasapulan dagiti tattao a maitutop iti agbaliwbaliw a kasasaad, ken agpaay a pagimbaganda. Kasta met laeng ita.

Gapu ta saan a binalbaliwan ni Jehova dagiti pagalagadanna, kanayon nga ammotayo no ania ti masapul nga aramidentayo tapno makaay-ayotayo kenkuana. Kanayonanna, masiguradotayo a matungpal amin nga inkari ti Dios. Kuna ni Jehova: “Isuamin a pakaragsakak aramidekto . . . Binukelko dayta, aramidekto met.”​—Isaias 46:10, 11.

[Blurb iti panid 21]

Saan a nagbalbaliw dagiti pagannurotan ti Dios mainaig iti ayat ken hustisia

[Blurb iti panid 22]

Inlawlawag ni Pablo a “mapukawto” dagiti namilagruan a sagut

[Blurb iti panid 23]

Ti panagasawa ket tungpal-biag a singgalut