Surat Manipud Russia
Panagdaliasat “iti Ungto ti Daga”
NAGRUBBUAT ti bassit nga eroplanomi iti Yakutsk ket in-inut a nagpatangatang iti Tuymaada Valley. Pinanawanmi ti adu a nagyelo a danaw a nagduduma ti sukog ken kadakkelda. Nalabsanmi ti Verkhoyanskiy, maysa a kabambantayan a naabbungotan iti niebe ken sumilsilap gapu iti raniag ti init. Kalpasan ti panagdaliasatmi iti 900 a kilometro, nagdissokami iti purok ti Deputatskiy.
Daytoy ti rugi dagiti panagdaliasatko iti Sakha Republic, a pagaammo met kas Yakutia, maysa a napintas a lugar, a dakdakkel ngem iti intero a Makinlaud a Europa. Ngem nakaro ti paniempo yantangay agbaliwbaliw dayta manipud iti 40 degree Celsius bayat ti kalgaw agingga iti -70 degree Celsius bayat ti lam-ek. Masarakan dita dagiti fossil ti adu a nabayagen a naungaw nga animal. Nupay nabayagen daydi nga isasarungkarko, kasla laeng idi kalman a nakitak daytoy a bassit ken naangep nga ili, ti rumimatrimat a lawag iti amianan, ken dagiti naragsak ken naandur nga umili a Yakut.
Saan a ti purok ti Deputatskiy ti maudi a destinasionmi. Adda dagiti sabali pay a purok a masapul a sarungkaranmi. Ti umuna ket ti Khayyr, 300 a kilometro a naam-amianan, iti asideg ti Laptev Sea iti makin-amianan a Siberia. Apay a napankami sadiay? Adda idi Saksi ni Jehova a simmarungkar kadagita a purok ket adu ti nasarakanna nga interesado nga agadal iti Biblia. Dakami a taga-Yakutsk, nga agarup 1,000 a kilometro ti kaadayona, ti kaasitgan kadakuada! Ammomi a kasapulan dagitoy a tattao ti pammaregta ken tulong.
Idi nakagtengkami idiay Deputatskiy, adda drayber nga agturong idiay Khayyr a mayat a mangilugan kadakami uray bassit la ti ibayadmi. Medio nagpangaduakami idi nakitami ti luganna—daan ken karagkarag a naaramid pay idi panawen ti Soviet. Nupay kasta, naglugankam latta ket nagluaskami iti dayta a rabii. Dimi ammo no ania ti agur-uray kadakami.
Dagiti tugaw ti lugan ket kasla kalamiis ti niebe, ken dagus a nadlawmi a saan a pumudot dayta. Kiniddawmi nga isardengna ti lugan tapno mangalakami manipud iti bagmi kadagiti napuskol a de lana nga irutapmi. Ngem kaskasdi a kumutukot ti lamiisna.
Naragsak a tao ti draybermi, maysa a bumibiahe iti Amianan. Pagammuan ta insaludsodna, “Nakitayo kadin ti lawag iti amianan?” Saanko pay a nakita isu nga insardengna ti lugan ket rimmuarkami. Iti dayta a kanito, nalipatanmi amin a rigrigatmi. Naikulengak iti makapaamanga a naraniag ken namaris a lawag a ru mimatrimat iti ngatuenmi—ti nagpaiduma a buya a kasla magawgaw-at laeng.
Iti maysa a nakalamlam-ek a parbangon, nailumlom ti luganmi iti niebe. Tinulonganmi ti drayber a mangyaon iti luganna. Gapu ta napuskol dagiti niebe a nangabbungot kadagiti dalan, namin-adu pay a naulit dayta bayat ti panagturongmi iti Khayyr. Idi la nagbannawag a nakitami a dagita a “dalan” ket nagyelo gayam a karayan! Iti agmatuon, kalpasan ti 16 nga oras a panagbiahemi manipud Deputatskiy, nakadanonkami met laengen iti Khayyr. Nupay namnamaenmi nga agsakitkami gapu iti nabayag a kaaddami iti lamiis, nasarantakami a nakariing iti kabigatanna. Dagiti laeng ramay ti sakak ti agbibineg, nalabit gapu iti nakaro a lamiis. Dagiti pumurok inikkandak iti lana a pangsapsapok.
Kadawyanna a dakami ti mapan kadagiti tattao tapno iranudmi ti naimbag a damag. Ngem ditoy Khayyr, dakami ti dinanon dagiti pumurok apaman a nadamagda a simmangpetkami! Iti uneg ti dua ket kagudua a lawas, inaldaw nga inyadalanmi iti Biblia dagiti pumurok, a no dadduma, manipud agsapa agingga iti adalemen a rabii. Makaparagsak a makasarita dagiti mannakigayyem ken managpadagus a tattao nga interesado kadagiti naespirituan a bambanag. Kinuna kadakami ti sumagmamano a babbaket a Yakut: “Mamatikami iti Dios. Ti iyaayyo ditoy, uray addakami iti ungto ti daga, paneknekanna nga adda Dios!”
Nasdaawkami kadagiti kaugalianda. Kas pagarigan, agurnongda iti arubayanda kadagiti bloke a yelo a kas iti panagurnongda iti pagsungrod. No kasapulanda ti danum, mangalada laeng iti bloke a yelo sada idadang iti dakkel a kaldero. Dagiti pumurok indasarandakami iti ikan iti Arctic a maawagan iti chir. Naimas dayta no maisagana kas stroganina, maysa a lokal a putahe. Mailado ti ikan apaman a makalap, maiwa iti naingpis, sa maideppel iti asin ken paminta. Kastanan a kanem. Maragsakan met dagiti pumurok a mangestoria kadakami kadagiti fossil a masansan a masarakan ditoy a lugar, kas iti saong ti dadakkel nga elepante ken kaykayo.
Manipud Khayyr, nagdaliasatak iti ginasut a kilometro, kaaduanna babaen iti eroplano, tapno sarungkarak dagiti interesado iti Biblia kadagiti dadduma a purok ti Yakutia. Anian a mannakigayyem ken managayat dagiti tattao ditoy! Naminsan, adda nakasaritak nga ubing a makaammo nga agnerbiosak nga aglugan iti eroplano. Tapno mapaturednak, inyaramidannak iti maysa a kard. Nangdrowing iti dua a billit-tuleng ken maysa a bassit nga eroplano sa insuratna: “Sasha, dika madanagan a matnag no agluganka iti eroplano. Mateo 10:29.” Anian a pannakatukay ti riknak idi kinitak ti teksto! Nabasak sadiay dagiti sasao ni Jesus maipapan kadagiti billit-tuleng: “Awan maysa kadakuada ti matnag iti daga a saan nga ammo ni Amayo.”
Dagiti naisalaysaykon ket sumagmamano laeng kadagiti nagadu a kapadasak iti Yakutia. Dayta a nalam-ek, nakaro ti paniempona a lugar ipalagipna kaniak dagidi a mannakigayyem ken makaay-ayo nga umili “iti ungto ti daga.”
[Ladawan iti panid 25]
Mannakigayyem ken managpadagus dagiti umili a Yakut