No Kasanom a Tarusan ti Biblia

1. Agpatulongka iti Autor

“Basbasaek idi ti Biblia sakbay a maturogak,” kinuna ni Ninfa a taga-Italia. “Kasta idi ti ar-aramidek ta ammok a Sao ti Dios dayta. Nupay diak kaay-ayo ti agbasa, kayatko a maammuan no ania ti insurat ti Dios iti Biblia isu a pinanggepko a basaen nga interamente. Nalakak a maawatan idi damo ngem idi mabasak dagiti pasetna a diak unay matarusan, insardengkon dayta.”

KASKA la kadi ken Ninfa? Adu a tattao ti kas kenkuana. Ngem naammuantayo iti umuna nga artikulo a ni Jehova a Dios nga Autor ti Biblia kayatna a matarusam ti Saona. Kasano ngarud a magun-odam ti kasta a pannakaawat? Ti umuna nga addang ket agpatulongka iti Autor.

Dagiti apostol ni Jesus ket naibilang nga “awan adalna ken gagangay” gapu ta saanda a nagadal kadagiti eskuelaan dagiti panguluen ti relihion dagiti Judio. (Aramid 4:13) Ngem impasigurado ni Jesus kadakuada a mabalinda a tarusan ti Sao ti Dios. Kasano? Inlawlawag ni Jesus: “Ti katulongan, ti nasantuan nga espiritu, nga ibaonto ti Ama iti naganko, isuronto dayta kadakayo ti amin a bambanag ket ipalagipna kadakayo ti amin a bambanag.” (Juan 14:26) Inusar ti Dios ti nasantuan nga espirituna, wenno ti aktibo a puersana, a nangparsua iti daga ken iti amin a sibibiag nga adda iti dayta. (Genesis 1:2) Inusarna met dayta a nangpaltiing iti agarup 40 a lallaki a nangisurat iti pampanunotna iti Biblia. (2 Pedro 1:20, 21) Dayta met la nga espiritu ti tumultulong kadagidiay agtarigagay a mangtarus iti Biblia.

Kasanom a maawat ti nasantuan nga espiritu? Masapul a kiddawem dayta buyogen ti pammati. Kinapudnona, mabalin pay ketdi a kanayon a kiddawem dayta. “Itultuloyyo ti agdawat, ket maitedto dayta kadakayo,” kinuna ni Jesus. “No dakayo . . . ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Lucas 11:9, 13) Sidadaan nga ipaay ni Jehova ti nasantuan nga espirituna kadagiti sipipinget nga agkiddaw iti dayta. Matulongannaka dayta nga aktibo a puersa a mangtarus iti kaipapanan dagiti naipaltiing a sasao a naisurat iti Biblia rinibu a tawenen ti napalabas. Maipaay met ti espiritu ti Dios ti kasapulam a sirib tapno mayaplikarmo iti biagmo ti nabileg a mensahe ti Biblia.​—Hebreo 4:12; Santiago 1:5, 6.

Gapuna, tunggal basaem ti Biblia, agkararagka iti Dios a kiddawem ti nasantuan nga espirituna a tumulong kenka a mangtarus iti Saona.