Umadanika iti Dios
Ipatpateg ni Jehova Dagiti Naemma
KINATANGSIT, imon, kinaambisioso. Gagangay dagita a kababalin kadagiti naballigi a tattao iti daytoy a lubong. Ngem dagitoy kadi a kababalin iyadanidatayo ken Jehova a Dios? Saan. Iti sabali a bangir, ipatpategna dagiti naemma nga agdaydayaw kenkuana. Nabatad daytoy iti salaysay a masarakan iti Numeros kapitulo 12. Napasamak dayta idiay let-ang ti Sinai, kalpasan ti pannakawayawaya ti Israel manipud Egipto.
Dagiti in-inauna a kakabsat ni Moises a da Miriam ken Aaron ‘nangrugida nga agsao maibusor’ kenkuana. (Bersikulo 1) Imbes a makisaritada kenni Moises, nagsaoda maibusor kenkuana, a nalabit a dagiti reklamoda insarsaritada kadagiti adda iti pakarso. Agparang a ni Miriam ti nangidaulo iti dayta yantangay isu ti immuna a nadakamat. Ti maysa nga irekreklamoda ket ti panangasawa ni Moises iti maysa a Cusita. Agimon kadi ni Miriam amangan no malab-awan daytoy a babai—a saan nga Israelita?
Adda pay naun-uneg a makagapu iti panagreklamoda. Kanayon nga ibagbaga da Miriam ken Aaron: “Babaen laeng aya ken Moises a nagsao ni Jehova? Saan aya a babaen met kadata nga isu nagsao?” (Bersikulo 2) Ti kadi panagtarigagay iti dakdakkel nga autoridad ken kinalatak ti talaga a motiboda?
Sigun iti salaysay, saan a sinungbatan ni Moises dagita a reklamo. Nabatad a siaanus nga inibturanna dagiti reklamoda. Ti kasta a reaksionna patalgedanna ti panangtukoy kenkuana ti Biblia kas “ti kaemmaan pay laeng iti amin a tattao” ditoy daga.a (Bersikulo 3) Saan nga inkalintegan ni Moises ti bagina. Ammo ni Jehova ti mapaspasamak isu nga inkalinteganna ni Moises.
Imbilang ni Jehova nga isu ti nakaiturongan dagiti reklamoda gapu ta dinutokanna ni Moises. Iti panangtubngar ti Dios kadagiti managreklamo, impalagipna kadakuada ti naisangsangayan a relasionna ken Moises: “Makisaoak kenkuana iti ngiwanngiwat.” Kalpasanna, insaludsod ni Jehova kada Miriam ken Aaron: “Apay, ngarud, a dikay nagbuteng nga agsao maibusor . . . ken Moises?” (Bersikulo 8) Gapu iti panagsaoda maibusor ken Moises, agsasaoda maibusor iti Dios. Malak-amda ti pungtot ti Dios gapu iti kasta a nakaro a kinaawan iti panagraem.
Nagkukutel ni Miriam, ti agparang a promotor. Dagus a nagpakaasi ni Aaron a bumallaet ni Moises agpaay ken Miriam. Panunotem laengen—ti pannakapaimbag ni Miriam ket agpannuray iti ibaballaet daydiay irekreklamoda! Sieemma a pinatgan ni Moises ti kiddawda. Iti panagsao ni Moises iti umuna a gundaway iti daytoy a salaysay, sipapasnek a nagpakpakaasi ken Jehova para ken manangna. Immimbag ni Miriam ngem masapul nga ibturanna ti bain gapu iti pito nga aldaw a pannakakuarentenasna.
Babaen daytoy a salaysay, makitatayo no ania dagiti galad nga ipatpateg ni Jehova ken dagiti kababalin a busorenna. No kayattayo ti umadani iti Dios, masapul nga ikagumaantayo nga ikkaten ti aniaman a kinatangsit, panagimon, ken kinaambisioso nga adda kadatayo. Ay-ayaten ni Jehova dagiti naemma. Inkarina: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:11; Santiago 4:6.
[Footnote]
a Ti kinaemma ket nabileg a galad a tumulong iti maysa a mangibtur iti kinaawan hustisia ken saan nga agibales.