Saludsod Dagiti Agbasbasa

Mano ti Rumbeng nga Idonarko?

“Ti Dios ayatenna ti naragsak a manangited.” (2 Corinto 9:7) Pamiliar dagita a sasao iti minilion a tattao iti intero a lubong. Ngem marikna ti dadduma a mannakimisa nga obligadoda nga agdonar iti dakdakkel ngem iti kabaelanda. Kinapudnona, ikalikagum ti dadduma a relihion nga agdonar dagiti miembroda iti espesipiko a gatad. Maaw-awagan dayta iti apagkapullo, kayatna a sawen, 10 a porsiento iti mateggedan ti maysa ti idonarna iti simbaan.

Talaga kadi nga ikalikagum ti Biblia nga agidonartayo iti espesipiko a gatad? Isaludsodmo iti bagim, mano ti rumbeng nga idonarko?

Dagiti Kalikagum ken Boluntario a Donasion iti Naglabas

Ibaga ti Biblia no ania dagiti nalawag a bilin ti Dios iti nasion ti Israel no mangtedda iti donasion. (Levitico 27:30-32; Numeros 18:21, 24; Deuteronomio 12:4-7, 11, 17, 18; 14:22-27) Saan a nadagsen dagita a bilin. Inkari ni Jehova a supapakanna ti nasion iti ‘agliplipias a kinarang-ay’ no agtulnogda kadagiti lintegna.​—Deuteronomio 28:1, 2, 11, 12.

Iti dadduma a kasasaad, agpannuray kadagiti Israelita no kasano kaadu wenno kabassit ti kayatda nga idonar. Kas pagarigan, idi implano ni Ari David nga ibangon ti templo ni Jehova, nagdonar dagiti iturayanna iti “balitok nga aggatad iti lima ribu a talento.”a (1 Cronicas 29:7) Idiligyo dayta iti napaliiw ni Jesus idi adda ditoy daga. Nakitana “ti maysa a marigrigat a balo a babai a nangipisok sadiay iti dua a babassit a sinsilio a bassit unay ti pategna” kadagiti baul ti gameng ti templo. Mano ti indonar ti balo? Aggatad laeng iti 1.5 a porsiento ti maysa nga aldaw a sueldo. Kaskasdi, kinuna ni Jesus a makaay-ayo dayta a bassit a gatad.​—Lucas 21:1-4.

Maikalikagum Kadi Kadagiti Kristiano a Mangtedda iti Espesipiko a Gatad?

Awan dagiti Kristiano iti sidong ti Linteg ti tulag a naited iti Israel. Gapuna, saanda nga obligado a mangted iti espesipiko a gatad para iti Dios. Nupay kasta, iti pudno a kongregasion Kristiano, ti panangted ket gubuayan ti dakkel a rag-o. Kinuna a mismo ni Jesu-Kristo: “Ad-adu ti kinaragsak iti panangted ngem iti panangawat.”​—Aramid 20:35.

Supsuportaran dagiti Saksi ni Jehova ti sangalubongan a trabaho a panangasaba babaen kadagiti boluntario a donasion. Maus-usar dagitoy iti panagimprenta kadagiti literatura, kas iti magasin a basbasaenyo, ken iti panagibangon ken panangmantener kadagiti pasdek a pagdayawan, a pagaammo kas Kingdom Hall. Awan kadagiti pondo a nakolekta ti mausar a pangsueldo. Maipapaayan iti tulong ti dadduma a makipaspaset iti amin-tiempo a trabaho a panagaramid kadagiti adalan tapno masupusopan ti pagpleteda ken ti dadduma pay a kasapulanda. Ngem awan ti mangipilit a maikkanda iti kasta a tulong. Kinapudnona, kaaduan a Saksi ni Jehova ti saan nga umawat iti aniaman a pinansial a tulong a mangsuporta iti panangasabada. Imbes ketdi, kaaduan ti agtrabaho iti sekular tapno adda pangsuportada iti bagida, kas ken Pablo a nagtrabaho kas paraaramid iti tolda.​—2 Corinto 11:9; 1 Tesalonica 2:9.

No kayat ti maysa ti agdonar para iti trabaho nga itungtungpal dagiti Saksi ni Jehova, mano ti rumbeng nga itedna? Insurat ni apostol Pablo: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.”​—2 Corinto 8:12; 9:7.

[Footnote]