Liklikanyo Dagiti Pakasingaan Bayat Daytoy “Aldaw ti Naimbag a Damag”

TININGITING dagiti uppat nga agkukutel ti planoda. Awan ti malimosanda iti pagserrekan ti siudad. Dagiti rimmaut a Sirio pinasardengda ti iseserrek ti abasto a taraon iti Samaria tapno agbisin dagiti umili. Awan serserbi ti ipapan iti siudad; nangina dagiti magatang a taraon. Naipadamag payen ti pannangan dagiti umili iti padada a tao.​—2 Ar. 6:24-29.

‘Apay a ditay serken ti pakarso dagiti Sirio?’ napanunot dagiti agkukutel. ‘Awan met ti mapukaw kadatayo.’ Napanda iti dayta a rabii. Naulimek ti pakarso idi makadanonda sadiay. Awan dagiti guardia. Nakagalut dagiti kabalio ken asno, ngem awan dagiti soldado. Dagiti uppat sinukimatda ti uneg ti maysa a tolda. Awan ti tao, ngem aglaplapusanan dagiti taraon ken inumen. Gapuna, nangan ken imminumda. Nakitada met dagiti balitok, pirak, kawes, ken dadduma pay a napateg a bambanag. Innala ken indulinda dagita sada nagsubli tapno mangala iti ad-adu pay. Napanawan ti intero a pakarso. Simimilagro nga impangngeg ni Jehova kadagiti Sirio ti uni dagiti rumaut a buyot. Gapu ta impapan dagiti Sirio nga adda mangraut kadakuada, nagtatarayda. Nawaya ti asinoman a mangsamsam iti amin a napanawanda!

Dagiti agkukutel innala ken indulinda dagiti napateg a bambanag. Ngem nakonsiensiada idi nalagipda dagiti mabisbisin nga umili iti asideg a Samaria. Kinunada iti maysa ken maysa: “Saan nga umiso ti ar-aramidentayo. Daytoy nga aldaw ket aldaw ti naimbag a damag!” Gapuna, nagdardarasda a napan idiay Samaria ket impakaammoda ti naimbag a damag a natakuatanda.​—2 Ar. 7:1-11.

Agbibiagtayo met iti maaw-awagan nga “aldaw ti naimbag a damag.” Iti panangipatuldo ni Jesus iti naisangsangayan a paset “ti pagilasinan . . . ti panungpalan ti sistema ti bambanag,” kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mat. 24:3, 14) Ania ti rumbeng nga epekto dayta kadatayo?

Mabalin a Mangpadagsen Dagiti Personal a Pakaseknantayo

Gapu ta maragsakan unay dagiti agkukutel iti natakuatanda, temporario a nalipatanda ti Samaria. Nakumikomda kadagiti mabalin a masamsamda. Mabalin kadi a mapasamak met dayta kadatayo? “Dagiti kinakirang ti taraon” ket paset ti ragup a pagilasinan a mangtanda iti panawen ti panungpalan ti sistema dagiti bambanag. (Luc. 21:7, 11) Pinakdaaran ni Jesus dagiti adalanna: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag.” (Luc. 21:34) Kas Kristiano, nasken nga agannadtayo a ditay makumikom kadagiti inaldaw a personal a pakaseknan ket malipatantayo nga agbibiagtayon iti “aldaw ti naimbag a damag.”

Ni Blessing a maysa a Kristiano dina impalubos a madagsenan gapu kadagiti personal a pakaseknanna. Nagpayunir, inleppasna ti panagadalna, nakiasawa iti maysa a Bethelite, ken nagbalin a miembro ti pamilia ti Bethel idiay Benin. Kunana: “Agserserbiak kas housekeeper, ket maragsakanak unay iti trabahok.” No lagipen ni Blessing ti 12 a tawen a panagserbina iti amin-tiempo, maragsakan ta nagtalinaed a sipapanunot nga agbibiagtayon iti “aldaw ti naimbag a damag.”

Agannadkayo Kadagiti Pakasingaan a Mangibus iti Tiempo

Idi imbaon ni Jesus dagiti 70 nga adalanna, kinunana: “Dakkel ti anien, ngem bassit dagiti trabahador. Gapuna ipakaasiyo iti Apo ti panagani a mangibaon kadagiti trabahador iti panaganina.” (Luc. 10:2) No kasano a madadael ti dadduma nga apit no maitantan ti pannakaani dagitoy, mapukaw met ti biag dagiti tattao no saan a maitungpal ti trabaho a panangasaba. Gapuna, innayon ni Jesus: “Dikay arakupen ti asinoman iti dalan kas panangkablaaw.” (Luc. 10:4) Saan laeng a “panangkomusta” wenno panangibaga iti “naimbag nga aldawmo” ti kayat a sawen ti orihinal a sao para iti “panangkablaaw.” Ramanenna met ti panaginnarakup wenno napaut a panagsarita dagiti aggayyem no agkitada. Gapuna, binilin ni Jesus dagiti pasurotna a liklikanda dagiti saan a napateg a pakasingaan ken nainsiriban nga usarenda ti tiempoda. Naganat ti mensahe nga ikaskasabatayo.

Panunotenyo no kasano kaadu ti oras a mabusbosyo gapu kadagita a pakasingaan. Adun a tawen a ti telebision ti kangrunaan a mangibus iti tiempo dagiti tattao. Komusta met ngay dagiti selpon ken personal a kompiuter? Sigun iti surbey kadagiti 1,000 nga adulto idiay Britania, natakuatan a “dagiti kalkalainganna ti panagbiagda a Briton, inaldaw a mangbusbosda iti 88 a minuto nga agtelepono, 62 pay a minuto nga agusarda iti selpon, 53 a minuto nga agipatulod iti e-mail, ken 22 a minuto nga agteks.” Ti dagup nga oras a mabusbusbosda ket mamindua nga ad-adu ngem iti busbusbosen ti maysa nga auxiliary pioneer iti ministeriona iti kada aldaw! Kasano kaadu ti busbusbosenyo kadagita nga alikamen?

Sipapanunot da Ernst ken Hildegard Seliger no kasanoda nga usaren ti tiempoda. Nasurok nga 40 a tawen ti dagup a nabusbosda kadagiti kampo konsentrasion ti Nazi ken kadagiti pagbaludan ti Komunista. Idi nawayawayaanda, nagpayunirda agingga a naturposda ti naindagaan a biagda.

Adu ti mayat a makisinnurat kadagiti agassawa a Seliger. Mabalin nga inusarda koma ti kaaduan a panawenda nga agbasa ken agaramid kadagiti surat. Ngem dagiti naespirituan a bambanag ti impangpangrunada.

Siempre, natural laeng a kayattayo amin a taginayonen ti komunikasiontayo kadagiti ipatpategtayo iti biag. Napateg dagiti makagunggona a nagduduma nga inaldaw a rutinatayo. Nupay kasta, masiribtayo no alertotayo a mangliklik kadagiti makaibus iti tiempo a pakasingaan bayat daytoy aldaw ti pannakaikasaba ti naimbag a damag.

Naan-anay a Panangikasaba iti Naimbag a Damag

Anian a nagsayaat ti agbiag iti “aldaw ti naimbag a damag.” Saantayo koma a pasinga a kas kadagiti uppat nga agkukutel idi damo. Laglagipentayo a kinunada idi agangay: “Saan nga umiso ti ar-aramidentayo.” Umasping iti dayta, saan met nga umiso nga ipalubostayo a dagiti personal a kalat wenno dagiti pakasingaan a mangibus iti tiempo ti manglapped kadatayo a naan-anay a makiraman iti ministerio.

Adda nagsayaat nga ulidantayo iti daytoy a banag. Iti pananglagip ni apostol Pablo iti umuna a 20 a tawen ti ministeriona, insuratna: “Naan-anay a naikasabak ti naimbag a damag maipapan iti Kristo.” (Roma 15:19) Di impalubos ni Pablo ti aniaman a mangpabaaw iti kinaregtana. Agbalintayo koma a naregta a kas kenkuana bayat nga ipakaammotayo ti mensahe maipapan iti Pagarian bayat daytoy “aldaw ti naimbag a damag.”

[Ladawan iti panid 28]

Saan nga impalubos ni Blessing a dagiti personal a pakaseknanna ti manglapped iti amin-tiempo a panagserbina

[Ladawan iti panid 29]

Sipapanunot dagiti agassawa a Seliger no kasanoda nga usaren ti tiempoda