Ti Kadi Kuarta ti Makaipaay iti Pudno a Kinaragsak?
NI Sonia ket naipasngay idiay Espania. Idi ubing pay, tumabtabunoda ken nanangna kadagiti gimong dagiti Saksi ni Jehova. Ngem idi dakkelen, immakar idiay London, England, ket idi agangay, nagtrabaho iti dakkel a kompania a mangas-asikaso kadagiti agpupuonan.
Kaay-ayo ni Sonia ti trabahona. Dakkel ti sapulna ken adu a kuarta ti as-asikasuenna para kadagiti klientena. Isu ket maragragsakan ken nakabalballigi iti dayta a trabaho. Inaldaw a 18 nga oras ti panagtrabaho ni Sonia ken adda dagiti rabii a dua wenno tallo nga oras laeng ti pannaturogna. Naisentro ti intero a biagna iti trabahona. Ngem pagammuan ta kellaat a nagbalbaliw ti kasasaadna. Idi agtawen iti 30, nakaro ti pannakaistrokna—nalabit gapu iti makabannog unay nga estilo ti panagbiagna.
Naparalisado ti kagudua ti bagi ni Sonia, ket saan a masierto dagiti doktor no makapagsaonto manen. Dagus a nagpa-England ni nanangna tapno aywananna ni Sonia. Idi makapagna manen, kinuna ni nanangna, “Mapanak makigimong idiay Kingdom Hall ket nasken nga ikuyogka ta diak kayat a mabatika nga agmaymaysa.” Immanamong ni Sonia. Ania ti resultana?
“Husto amin a nangngegko. Nagsayaat unay,” malagip ni Sonia. “Maragsakanak nga immannugot iti panagadal iti Biblia nga intukon ti maysa kadagiti adu a nangkablaaw kaniak iti damo nga itatabunok iti Kingdom Hall. Didakon paspasiaren dagiti dati a gagayyemko ngem nadungngo ken manangasikaso dagiti kabbaro a gagayyemko.”
In-inut a nagsubli ti normal a panagsao ni Sonia, ken nagpartak ti naespirituan nga irarang-ayna. Awan pay makatawen kalpasanna, isu ket nagpabautisaren. Amin-tiempo a Kristiano a ministro ti adu kadagiti kabbaro a gagayyemna ken makitkitana no kasano ti karagsakda. ‘Kayatko met ti agbalin a kas kadakuada,’ napanunot ni Sonia. ‘Kayatko nga ited ken Jehova a Dios ti amin a kabaelak!’ Ita, agserserbin ni Sonia kas amin-tiempo a ministro.
Ania ti nasursuro ni Sonia iti kapadasanna? “Nupay nakaad-adu idi ti mateggedak, saanak a naragsak ken madandanaganak gapu iti bannog ken ti di natalged a kasasaad iti pagtrabahuan. Naamirisko a ti kaadda ti nasayaat a relasionko iti nailangitan nga Amak a ni Jehova ti kapatgan iti biag. Ita, pudno a naragsakakon.”
“Ti ayat iti kuarta isu ti ramut dagiti amin a kita ti makadangran a bambanag,” insurat ni apostol Pablo. “Babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.” (1 Timoteo 6:10) Napaneknekan ni Sonia ti kinaagpayso dayta.