Ti Relihionko​—Siak ti Mangpili Wenno Dagiti Nagannakko?

ADU a taga-Poland ti mangibagbaga kadagiti Saksi ni Jehova: “Diakon sukatan ti nabangonak a relihion.” Sigun iti dayta a komentoda, matmatanda a maipatawid ti relihion. Kasta met kadi ti panangmatmat dagiti tattao iti lugaryo maipapan iti relihion? Ania dagiti masansan a resulta ti kasta a kapanunotan? Mamatmatan ti relihion kas pammarang laeng ken tradision ti pamilia. Mabalin kadi a mapasamak dayta kadagiti Saksi ni Jehova a napadakkel iti kinapudno?

Saan a kasta ti napasamak ken Timoteo, nga insuro ti naregta a nanang ken apongna nga agbalin a manamati ken managayat iti pudno a Dios. Naammuan ni Timoteo ti nasantuan a sursurat ‘manipud kinamaladagana.’ Idi agangay, nakombinsir ni Timoteo, ni nanangna, ken ni lolana a ti Kristianidad ti pudno. ‘Naguyugoy a mamati’ ni Timoteo iti nangngegna manipud iti Kasuratan maipapan ken Jesu-Kristo. (2 Tim. 1:5; 3:14, 15) Isu a nupay ikagkagumaan ita dagiti Kristiano a nagannak a tulongan dagiti annakda nga agbalin nga adipen ni Jehova, dagiti ubbing a mismo ti masapul a mangpatanor iti tarigagayda nga agserbi Kenkuana.​—Mar. 8:34.

Tapno ti maysa ket naimpusuan nga agserbi ken ni Jehova ken agtalinaed a natarnaw aniaman ti mapasamak, masapul nga isu ket nagutugot a mamati babaen ti makakombinsir a panagrasrason. Iti kasta, tumibker ken rumamut ti pammatina.​—Efe. 3:17; Col. 2:6, 7.

Ti Akem Dagiti Annak

“Patiek a ti pudno a relihion ket Saksi ni Jehova,” kinuna ni Alberta a napadakkel iti Saksi a pamilia, “ngem marigatanak idi nga agbiag maitunos iti kayatda a pagbalinak.” No maysaka nga agtutubo, nalabit kasta met ti panagriknam. Gapuna, ikagumaam a tarusan no ania ti ramanen ti panagbiag maitunos iti pagayatan ti Dios tapno makitam no apay a naragsak ti kasta a panagbiag. (Sal. 40:8) “Rinugiak ti nagkararag,” kinuna ni Albert. “Idi damo, marigatanak ta masapul a pilitek ti bagik nga agkararag. Ngem di nagbayag, naamirisko a maay-ayok ti Dios no ikagumaak nga aramiden ti umiso. Dayta ti nangpabileg kaniak nga agbalbaliw.” No parayrayem ti personal a relasionmo ken Jehova, masursuromto a tungpalen dagiti kalikagumanna kadatayo.​—Sal. 25:14; Sant. 4:8.

Panunotem ti kaay-ayom nga ay-ayam kas iti dama wenno maysa a kita ti isport. Mabalin a dika magagaran iti dayta no dimo ammo nga ay-ayamen wenno dimo ammo dagiti pagannurotanna. Ngem no nasursurom ken batidokan, saan kadi nga il-iliwem ken iwayaam pay ketdi nga ay-ayamen dayta? Kasta met laeng dagiti Nakristianuan nga aktibidad. Gapuna, ikagumaam ti agsagana para kadagiti Nakristianuan a gimong. Makipasetka kadagita. Uray no ubingka pay, maparegtam dagiti sabsabali babaen ti nasayaat nga ulidanmo!​—Heb. 10:24, 25.

Kasta met laeng no maipapan iti panangiranudmo iti pammatim. Masapul a naimpusuan dayta, saan a mapilpilit. Isaludsodmo: ‘Apay a kayatko nga isarita ti maipapan ken Jehova? Ania dagiti makagapu a masapul nga ayatek ni Jehova?’ Nasken a maam-ammom ni Jehova kas naayat nga Ama. Kinunana babaen ken Jeremias: “Pudno a sapulendakto ket masarakandak, ta birokendakto buyogen ti isuamin a pusoyo.” (Jer. 29:13, 14) Ania ti kalikaguman daytoy nga aramidem? “Masapul a balbaliwak ti panagpampanunotko,” kinuna ni Jakub. “Sipud idi ubingak, basta sumursurotak lattan a mangasaba ken makigimong. Ngem idi laeng immuneg ti pannakaammok ken ni Jehova ken simminged ti relasionko kenkuana a talaga a nagbalinak a napasnek iti kinapudno.”

Dakkel ti maitulongna kenka dagiti makapabileg a panagkakadua tapno matagiragsakmo ti ministeriom. “Daydiay makipagna kadagiti masirib a tattao agbalinto a masirib,” kuna ti naipaltiing a proverbio. (Prov. 13:20) Isu a makigayyemka kadagiti addaan iti naespirituan a kalat ken siraragsak nga agserserbi ken Jehova. Kuna ni Jola: “Naparegtaak iti pannakilangenko kadagiti naespirituan ti panagpampanunotna nga agtutubo. Regularen ken maragsakanak a makiramraman iti ministerio.”

Ti Akem Dagiti Nagannak

“Agyamanak unay kadagiti dadakkelko ta insuroda kaniak ti maipapan ken Jehova,” kinuna ni Jola. Wen, dakkel ti impluensia dagiti nagannak iti pangngeddeng dagiti annakda. Insurat ni apostol Pablo: “Dakayo, nga amma, . . . itultuloyyo a padakkelen [dagiti annakyo] iti disiplina ken panangiturong-panunot ni Jehova.” (Efe. 6:4) Nalawag nga ipakita daytoy a naipaltiing a balakad a pagrebbengan dagiti nagannak nga isuro kadagiti annakda dagiti paglintegan ni Jehova, saan a ti paglinteganda. Imbes a dakayo ti mangikeddeng iti kalat a kayatyo para kadagiti annakyo, nasaysayaat no tulonganyo ida a pagbalinenda a kalat ti agbiag a maitunos kadagiti panggep ni Jehova!

Kabaelanyo nga iyukuok kadagiti annakyo dagiti pannursuro ni Jehova ken ‘sawenyo ti maipapan kadagita no agtugawkayo iti balayyo ken no magnakayo iti dalan ken no agiddakayo ken no bumangonkayo.’ (Deut. 6:6, 7) “Kanayon a pagsasaritaanmi ti nagduduma a kita ti amin-tiempo a ministerio,” malagip da Ewa ken Ryszard, nagannak dagiti tallo a lallaki. Ania ti resultana? “Uray ubbingda pay idi, kayatdan ti agpasalista iti Teokratiko nga Eskuelaan ti Panagministro, agbalin nga agibumbunannag, ken inkeddengda ti agpabautisar idi agangay. Di nagbayag, simrekda iti amin-tiempo a ministerio.”

Napateg ti nasayaat nga ehemplo dagiti nagannak. Kinuna ni Ryszard, “Ikagkagumaanmi a liklikan ti doble kara a panagbiag, a sabali ti tignaymi no addakami iti balay ken sabali met no addakami iti kongregasion.” Gapuna, isaludsodyo: ‘Ania ti makitkita kaniak dagiti annakko? Makitada kadi a pudno nga ay-ayatek ni Jehova? Mapaliiwda kadi dayta iti kararag ken personal a panagadalko? Madlawda kadi dayta iti panangmatmatko iti tay-ak ti serbisio, paglinglingayan, ken material a bambanag ken no ania ti ibagbagak maipapan kadagiti dadduma a kakabsat iti kongregasion?’ (Luc. 6:40) Makitkita dagiti annakyo ti ar-aramidenyo iti inaldaw ken ammoda no saanyo nga iyap-aplikar dagiti isursuroyo.

Dakkel ti maaramidan ti disiplina iti panangpadakkel kadagiti annak. Nupay kasta, ibaga kadatayo ti naipaltiing a Sao ti Dios a “sanayem ti ubing sigun iti dalan nga agpaay kenkuana.” (Prov. 22:6) Kuna da Ewa ken Ryszard, “Iwayaanmi nga iyadalan iti Biblia ti tunggal maysa kadakuada.” Siempre, dagiti nagannak ti mangikeddeng no kasapulan nga agsina nga iyadalanda dagiti annakda. Aniaman ti kasasaad, kasapulan a matrato ti ubing kas indibidual. Agkasapulan daytoy iti pannakibagay ken kinarasonable. Imbes nga ibagayo lattan kadagiti annakyo a dakes ti dadduma a musika, apay a diyo ilawlawag no kasanoda nga agdesision a nainsiriban ken no ania dagiti nainaig a prinsipio ti Biblia?

Mabalin nga ammo dagiti annakyo no ania ti namnamaenyo kadakuada ken nalabit a situtulokda a mangaramid iti pagayatanyo. Ngem masapul latta a danonenyo ti pusoda. Laglagipenyo a “ti pammatigmaan ti puso ti maysa a tao ket kas iti adalem a dandanum, ngem ti tao nga addaan panangilasin isu ti mangyaonto iti dayta.” (Prov. 20:5) Naalibtakkayo koma a mangilasin kadagiti di madmadlaw a problema nga agrusing iti puso dagiti annakyo, ken agtignaykayo a dagus. Imbes nga akusaranyo, ipakitayo a maseknankayo, ken agusarkayo kadagiti maitutop a saludsod. Ngem saankayo koma a kasla agpalpalutpot. No marikna dagiti annakyo a pudno a maseknankayo kadakuada, madanonyo ti pusoda ken matulonganyo ida.

Ti Akem ti Kongregasion

Kas maysa nga adipen ti Dios, tultulongam kadi dagiti agtutubo iti kongregasionyo a mangipateg iti naespirituan a tawidda? Nupay rebbengen dagiti nagannak a sanayen dagiti annakda, makatulong kadakuada ti dadduma a kakabsat, kangrunaanna dagiti panglakayen. Nangnangruna a tulonganda koma dagiti kameng ti pamilia a saan nga agkakapammatian.

Kasano a dagiti panglakayen matulonganda dagiti agtutubo a mangayat ken ni Jehova ken maipariknada a napategda? Ni Mariusz, a panglakayen iti maysa a kongregasion idiay Poland, kinunana: “Masapul a kanayon a makisarita dagiti panglakayen kadagiti agtutubo. Aramidenda koma dayta saan laeng a no adda parikut, no di ket uray iti pangasabaan, kalpasan dagiti gimong, wenno iti dadduma pay a gundaway.” Apay a dimo damagen kadagiti agtutubo no ania ti makunada iti kongregasion? No adda dagiti kasta a silulukat a panagsasarita, ad-adda a suminged dagiti agtutubo iti kongregasion ken mariknada a pasetda iti dayta.

No maysaka a panglakayen, ikagkagumaam kadi nga am-ammuen dagiti agtutubo iti kongregasionyo? Nupay agserserbi itan a panglakayen ni Albert, a nadakamat itay, napasaranna ti nagduduma a pakasuotan bayat ti kinaagtutubona. Kunana: “Kas maysa a baro, kasapulak ti panangsarungkar dagiti panglakayen.” Maipakita pay dagiti panglakayen ti personal nga interesda kadagiti agtutubo babaen ti panangikararagda iti naespirituan a pagimbaganda.​—2 Tim. 1:3.

Pagsayaatan dagiti agtutubo no makipasetda kadagiti aktibidad ti kongregasion. Ta no saan, nalabit a maipamaysada ti panawenda iti panangragpat kadagiti nailubongan a kalat. Dakayo a natataengan mabalinyo kadi a kaduaen dagiti agtutubo iti ministerio ken gayyemen ida? Aglinglingaykayo koma a kadua dagiti agtutubo. Mangparayray dayta iti panagtalek ken panaggagayyem. Malagip ni Jola: “Imparikna ti maysa a payunir a babai ti personal a pannakaseknanna kaniak. Idi nakikaduaak kenkuana iti tay-ak, dayta ti damo a nangasabaak a saanak a mapilpilitan.”

Ti Personal a Pangngeddengmo

No maysaka nga agtutubo, isaludsodmo: ‘Ania dagiti kalatko? No saanak pay a bautisado, dayta kadi ti kalatko?’ Ti pangngeddengmo nga agpabautisar ket masapul a naggubuay iti puso a napno iti panagayat ken Jehova, saan a maigapu dayta iti nabangonam a relihion.

Wen, sapay koma ta ibilangmo ni Jehova kas pudno a Gayyem, ken ipategmo ti kinapudno. Babaen ken propeta Isaias, kinuna ni Jehova: “Dika agtalangkiaw, ta siak ti Diosmo.” Adda ni Jehova iti dasigmo no la ket ta gayyemnaka. Talaga a pabilgen ken ‘itultuloynakanto nga iggaman a siirut babaen iti bukodna a makannawan nga ima ti kinalinteg.’​—Isa. 41:10.

[Footnote]

[Ladawan iti panid 4]

Ikagumaanyo a tarusan no ania ti linaon ti puso ti anakyo

[Ladawan iti panid 6]

Ti pangngeddeng nga agpabautisar ket naggubuay iti puso a napno iti panagayat ken Jehova