Nasarakak ti Makapnek a Biag
Kas Insalaysay ni Gaspar Martinez
Maysaak idi a nakurapay a lalaki iti away a bimmaknang iti siudad. Ngem maammuanyonto a ti nagun-odak a kinabaknang ket saan a kas iti ninamnamak.
DIMMAKKELAK iti maysa a natikag a bario iti rehion ti Rioja a makin-amianan a paset ti Espania kabayatan ti dekada 1930. Simmardengak nga ageskuela idi agtawenak iti sangapulo, ngem ammokon ti agsurat ken agbasa. Dakami a pito nga agkakabsat agmalmalemkami nga agipastor kadagiti karnero wenno talonenmi ti sangkabassit a dagami.
Gapu iti kinakurapay, ti kuarta ti napateg kadakami ket umapalkami kadagiti nabaknang. Kaskasdi, naminsan a kinuna ti obispo a dakami “ti karelihiosuan a purok a masakupanna.” Dina man la napanunot nga inton agangay, adu ti mangpanaw iti Katolisismo.
Panangbirok iti Nasaysayaat a Banag
Inkallaysak ni Mercedes, ti kalugarak a balasang. Di nagbayag, naaddaankami iti anak a lalaki. Idi 1957, immakarkami iti kabangibangmi a siudad ti Logroño, sa di nagbayag, simmaruno met ti intero a pamiliak. Ngem gapu ta awan ti paglaingak a trabaho, marigatanak nga agbirok iti panggedan a nangato ti sueldona. Pinampanunotko no sadino ti pakasarakak iti giya. Rinugiak ti nagsirarak iti libraria, nupay diak ammo no ania a talaga ti sapulek sadiay.
Di nagbayag, nangngegko ti maysa a programa iti radio a mangituktukon iti panagadal iti Biblia babaen ti surat. Idi naturposko dayta a panagadal, sinarungkarandak ti sumagmamano a Protestante nga Ebanghelisador. Iti sumagmamano a pannakigimongko kadakuada, napaliiwko nga agsisinnalisal dagiti mabigbigbig a miembroda. Insardengkon ti tumabuno ta pampanunotek nga agpapadanto met laeng ti amin a relihion.
Nagtinnag ti Siksik Kadagiti Matak
Idi 1964, simmarungkar iti balaymi ti agkabannuag a ni Eugenio. Isu ket maysa a Saksi ni Jehova, ti relihion a diak pay pulos nangnangngeg. Ngem interesadoak unay a makisarita maipapan iti Biblia. Kunak no adu ti ammokon iti Kasuratan. Iti pannakisaritak kenkuana, inusarko ti sumagmamano a teksto a nasursurok idi nakipagadalak iti Biblia babaen ti surat. Nupay indepensak ti dadduma a doktrina dagiti Protestante, saanak a talaga a kombinsido kadagita.
Kalpasan ti dua a napaut a panagsaritami, bigbigek a nalaing ni Eugenio iti Biblia. Nasdaawak ta ammona ti pangukaganna kadagiti teksto ken mailawlawagna no ania ti kaipapananna, nupay nababbaba ti adalna ngem siak. Inlawlawagna kaniak manipud iti Biblia nga agbibiagtayon iti maudi nga al-aldaw ken asidegen nga iyeg ti Pagarian ti Dios ti maysa a paraiso a daga. Naalana ti interesko.—Sal. 37:11, 29; Isa. 9:6, 7; Mat. 6:9, 10.
Gapuna, immanamongak a dagus a mayadalan iti Biblia. Kasla baro amin a naammuak ken natukayda ti pusok. Naammuak nga adda namnama a nagsayaat a ragpatek. Nasarakak met laengen ti kinapudno. Nabigbigko nga awan gayam serserbina ti panangikagumaak nga agpabaknang, ken saankon a pakakumikoman ti agbirok iti trabaho a nangato ti sueldona. Naadalko met a mapukawton ti sakit ken ipapatay.—Isa. 33:24; 35:5, 6; Apoc. 21:4.
Inranudko a dagus kadagiti kakabagiak dagiti naadalko. Sigagagar nga inlawlawagko kadakuada nga inkari ti Dios ti maysa a paraiso a daga a sadiay nga agbiag nga agnanayon dagiti matalek a tattao.
Inawat ti Pamiliami ti Kinapudno
Di nagbayag, agarup 12 kadakami ti agtataripnong iti kada malem ti Domingo iti balay ti ulitegko tapno pagsasaritaanmi dagiti kari ti Biblia. Agpaut dayta iti dua wenno tallo nga oras iti kada lawas. Tangay adu a kabagiak ti interesado iti Biblia, inyurnos ni Eugenio a mayadalan ti tunggal pamilia.
Addada pay kakabagiak idiay Durango, bassit nga ili nga agarup 120 a kilometro ti kaadayona, ken awan pay Saksi sadiay. Isu a kalpasan ti tallo a bulan, nagbakasionak iti sumagmamano nga aldaw tapno sarungkarak ida ket mairanudko kadakuada ti baro a pammatik. Agarup sangapulokami nga agtataripnong iti kada rabii, nga agsasaritakami agingga iti parbangon. Maragragsakanda amin a dimngeg. Idi dandaniak agawiden, nangibatiak iti sumagmamano a Biblia ken dadduma pay a literatura. Sipud idin, nagtultuloyen ti komunikasionmi.
Idi dimteng dagiti Saksi idiay Durango, nasarakanda dagiti 18 a tattao a magagaran nga agadal iti Biblia—nupay sakbayna awan pay ti nangaskasaba iti dayta a lugar. Naragsakan dagiti Saksi a nangyadal iti tunggal pamilia.
Kabayatanna, saan pay la nga inawat ni Mercedes ti kinapudno. Saan a gapu ta dina patien dagiti pannursuro ti Biblia no di ket gapu ta maamak kadagiti tattao. Idi a tiempo, maiparit ti trabaho dagiti Saksi ni Jehova ditoy Espania, isu a madanagan ni Mercedes amangan no dagiti agtuturay ikkatenda dagiti dua nga annakmi iti eskuelaan ken ilaksidnakami ti komunidad. Ngem idi makitana nga inawaten ti intero a pamiliami ti kinapudno, nakipagadal metten.
Iti las-ud ti dua a tawen, nagbalin a Saksi dagiti 40 a kakabagiak ket indedikarda ti biagda iti Dios babaen ti bautismo. Maymaysan ti panggep ken kalatmi iti biag kas pamilia. Nagun-odkon ti pudpudno a makapnek a biag. Sibabaknang a nabendisionankami iti naespirituan.
Ad-adda a Makapnek ti Biag Bayat a Lumaklakayak
Binusbosko ti simmaruno a 20 a tawen a nangpadakkel kadagiti dua a babbaritomi bayat a tumultulongak iti kongregasionmi. Idi immakarkami ken Mercedes ditoy siudad ti Logroño, agarup 20 laeng ti Saksi kadagiti agarup 100,000 nga umili. Di nagbayag, adu nga annongen ti tinagiragsakko iti kongregasion.
Idi agtawenak ti 56, di ninamnama a nagserra ti kompania a pagtartrabahuak isu a naawananak iti panggedan. Nabayagen a tartarigagayak ti sumrek iti amin-tiempo a ministerio, isu a ginundawayak ti nagpayunir bayat ti kinaawan ti trabahok. Marigatankami a mangyan-anay iti sangkabassit a pensionko. Gapuna, nagtrabaho ni Mercedes a paradalus ket naipaaymi ti inaldaw a kasapulan ti pamiliami a dikami pulos nagkurang. Payunirak pay la agingga ita, ken pasaray agaplikar ni baketko kas auxiliary pioneer, a maragragsakan unay a mangasaba.
Sumagmamano a tawen ti naglabas, regular nga ik-ikkan ni Mercedes iti magasintayo ti agkabannuag a ni Merche, a nagadal iti Biblia idi ubing pay. Isu ket interesado a mangbasa kadagiti literaturatayo, ken nadlaw ni Mercedes nga ipatpateg pay laeng ni Merche dagiti naadalna a kinapudno iti Biblia. Idi agangay, nagadal manen iti Biblia ken napartak ti irarang-ayna. Ngem mangnginum ti lakayna a ni Vicente isu a saan nga agbayag iti trabahona. Gapuna, saannan a maipaay dagiti material a kasapulan ni Merche ken agngangabit ti relasionda kas agassawa.
Insingasing ni baketko ken ni Merche nga agsaritakami ken Vicente, ket kasta ti napasamak. Kalpasan ti sumagmamano nga isasarungkarko, immanamong nga agadal iti Biblia. In-inut a nagbalbaliw ni Vicente. Adda sumagmamano nga aldaw a di uminum iti arak. Idi kuan, malanganannan dayta iti maysa wenno sumagmamano pay ketdi a lawas agingga a naan-anay a naisardengnan. Dakkel ti nagbalbaliwan ti panaglanglangana ken nagkaykaysan ti pamiliada. Ti intero a pamiliana, a pakairamanan ni baketna ken ti balasangda, naan-anay a sinuportaranda ti bassit a kongregasion idiay Canary Islands, a pagnanaedanda itan.
Pananglagip iti Nagun-odko a Makapnek a Biag
Nupay pimmusayen ti dadduma a kakabagiak nga immawat idi kadagiti pannursuro ti Biblia, nagtultuloy nga immawat iti kinapudno ti dadduma pay a kakabagiak, ket sibabaknang a binendisionannakami ti Dios. (Prov. 10:22) Anian a nagimnas a makita nga agtultuloy nga agserserbi ken Jehova ti dandani amin a kakabagiak a nagadal iti Biblia 40 a tawenen ti napalabas—agraman dagiti annak ken appokoda!
Adu itan ti kakabagiak a nagbalin a Saksi ket dadduma kadakuada ti agserserbi kas panglakayen, ministerial nga adipen, ken payunir. Ti inauna a barok ken ti asawana ket agserserbida iti sanga nga opisina dagiti Saksi ni Jehova iti Madrid, Espania. Idi nagbalinak a Saksi, agarup 3,000 laeng dagiti Saksi ditoy Espania. Ngem ita, nasuroken a 100,000. Naan-anay a natagiragsakko ti amin-tiempo a ministerio, ken agyamanak unay iti Dios gapu iti makapnek a biag bayat nga agserserbiak kenkuana. Nupay nababa ti adalko, pasaray nga agserserbiak kas kasuno a manangaywan iti sirkito.
Sumagmamano a tawenen ti napalabas, naammuak a dandanin malangalang ti dimmakkelak a bario. Gapu iti kinarigat ti biag, napilitan dagiti lumugar a mangpanaw kadagiti talon ken balayda tapno agsapul ti nasaysayaat a panagbiag. Makaparagsak ta adu kadagiti immakar—a pakairamanak—ti nakasarak iti naespirituan a kinabaknang. Naammuanmi a talaga nga adda panggep ti biag ken mangyeg iti dakkel a rag-o ti panagserbi ken Jehova.
[Ladawan iti panid 32]
Ti dandani amin a kameng ti pamilia ni Kabsat Martínez nga adda iti kinapudno