6 Anamongan Kano ti Dios ti Panagusar Kadagiti Imahen ken Ladawan iti Panagdayaw
Ania ti nagtaudan dayta a di umiso a sursuro?
“Dagiti nagkauna a Kristiano saanda a nagusar kadagiti imahen iti panagdayawda . . . Ti panangusar ti simbaan kadagiti imahen idi maikapat ken maikalima a siglo ket naibatay iti teoria a nalaklaka a maadal dagiti ignorante a tattao dagiti pannursuro ti Kristianidad babaen kadagiti imahen ngem babaen kadagiti sermon wenno libro.”—Cyclopedia of Biblical, Theological, and Ecclesiastical Literature, da McClintock ken Strong, Tomo 4, panid 503 ken 504.
Ania ti kunaen ti Biblia?
“Dika agaramid iti agpaay kenka a kinitikitan a ladawan wenno aniaman a kapadpada ti parsua iti langit wenno iti daga wenno iti danum nga adda iti uneg ti daga. Dika agrukbab wenno agdaydayaw iti uray ania a kinitikitan a ladawan.” (Exodo 20:4, 5, Ti Baro a Naimbag a Damag Biblia) Insurat ni apostol Juan kadagiti Kristiano idi umuna a siglo: “Babassit nga annak, igagayo ti bagbagiyo manipud kadagiti idolo.”—1 Juan 5:21.
Ti kadi panangusar kadagiti imahen ket maysa laeng a pamay-an ti iyaadani ken panangpadayaw iti isimboloda, kas iti kunaen dagiti relihion? Kastoy ti kuna ti The Encyclopedia of Religion: “Idi damo, kangrunaan a nausar dagiti imahen iti panangisuro ken naaramat pay a dekorasion; uray kaskasano, adda rasonda a nangusar kadagita. Ngem di nagbayag, nabatad a daydayawendan dagita nga imahen. Nangnangruna a pudno dayta kadagiti ladawan a nagbalin a nalatak a paset ti Eastern Orthodoxy.” Ngem siuumiso nga inyimtuod ni propeta Isaias: “Siasino ti pakaipadaan ti Dios? Mabalinmo kadi nga iladawan ti langana?”—Isaias 40:18, Ti Baro a Naimbag a Damag Biblia.
Idiligyo dagitoy a bersikulo ti Biblia: Isaias 44:13-19; Aramid 10:25, 26; 17:29; 2 Corinto 5:7
KINAPUDNO:
Saan nga anamongan ti Dios ti panagusar kadagiti imahen ken ladawan iti panagdayaw
LAKSIDENYO DAGITI DI UMISO A SURSURO, PATIENYO TI KINAPUDNO
Ania ti maibagatayo iti ababa a panangrepasotayo kadagiti di umiso a doktrina nga isursuro pay latta ti adu a relihion? Awan mamaay dagita a “naparbo a sarsarita [wenno di umiso a sursuro, Griego, myʹthos]” no idilig kadagiti simple ken makaliwliwa a kinapudno iti Biblia.—2 Pedro 1:16, Ti Baro a Naimbag a Damag Biblia.
Gapuna, buyogen ti silulukat a panunot, dikay koma bumdeng a mangusig iti Sao ti Dios—ti gubuayan ti kinapudno—tapno maammuanyo no umiso dagiti naisuro kadakayo. (Juan 17:17) Iti kasta, pumaysonto kadakayo daytoy a kari: “Maammuanyonto ti kinapudno, ket ti kinapudno wayawayaannakayto.”—Juan 8:32.