Ti Masursurotayo ken Jesus

Maipapan iti Biag ti Pamilia

Ania a panangmatmat iti panagasawa ti mamagbalin kadagiti pamilia a naragsak?

Ti panagasawa ket maysa a sagrado a singgalut. Idi naisaludsod ken Jesus no maipalubos ti diborsio, kinunana: “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao. . . . Siasinoman a mangidiborsio iti asawana a babai, malaksid no maibatay iti pannakiabig, ket mangasawa iti sabali makaaramid iti pannakikamalala.” (Mateo 19:4-6, 9) No iyaplikar dagiti agassawa ti balakad ni Jesus ken agmatalekda iti maysa ken maysa, agbalin a natalged ken naragsak ti intero a pamilia.

Apay a naragsak ti pamilia no ayatenda ti Dios?

Kinuna ni Jesus: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin.” Ania ti maikadua a kadakkelan a bilin? Kinuna ni Jesus: “Masapul nga ayatem ti padam a tao [karaman dagiti kaasitgan kenka a kameng ti pamiliam] a kas iti bagim.” (Mateo 22:37-39) No kasta, tapno agbalin a naragsak ti pamilia, nasken a maaddaanda iti nasayaat a relasion iti Dios. Ngamin, matignaytayo nga agiinnayat no adda panagayattayo iti Dios.

Ania ti aramiden ti agassawa tapno maparagsakda ti maysa ken maysa?

Maparagsak dagiti lallaki ti asawada no tuladenda ti ulidan ni Jesus, a nangipakita iti managsakripisio nga ayat iti kongregasion kas ti piguratibo nga asawana. (Efeso 5:25) Kinunana: “Ti Anak ti tao immay, saan a tapno pagserbian, no di ket tapno agserbi.” (Mateo 20:28) Pulos a di nangipakita ni Jesus iti kinadiktador wenno kinaulpit kadagiti adalanna, imbes ketdi, makapagin-awa kadakuada ti pannakilangenna. (Mateo 11:28) Ngarud, usaren koma dagiti assawa a lallaki ti autoridadda iti naasi a pamay-an a pakagunggonaan ti intero a pamiliada.

Makasursuro met dagiti assawa a babbai iti ulidan ni Jesus. Kuna ti Biblia a “ti ulo ti Kristo isu ti Dios.” Kinunana pay a “ti ulo ti babai isu ti lalaki.” (1 Corinto 11:3) Saan nga imbilang ni Jesus a pakaipababaanna ti panagpasakupna iti Dios. Nauneg ti panagraemna ken Amana. “Kankanayon nga aramidek ti bambanag a makaay-ayo kenkuana,” kinuna ni Jesus. (Juan 8:29) Dakkel ti maitulong ti asawa a babai a mangparagsak iti biag ti pamiliana no agpasakup iti kinaulo ni lakayna maigapu iti panagayat ken panagraemna iti Dios.

Ania ti masursuro dagiti nagannak iti panangmatmat ni Jesus kadagiti ubbing?

Nangipaay ni Jesus iti tiempo para kadagiti ubbing ken inkabilanganna ti kapanunotan ken rikriknada. Kuna ti Biblia: “Inayaban ni Jesus dagiti maladaga, a kunkunana: ‘Bay-anyo dagiti ubbing nga umay kaniak.’” (Lucas 18:15, 16) Naminsan, binabalaw dagiti tattao ti dadduma nga ubbing a nangyebkas iti pammatida ken Jesus. Ngem kinomendaran ni Jesus dagiti ubbing, a kunkunana kadagiti manangbabalaw: “Saanyo aya a pulos nabasa daytoy, ‘Manipud iti ngiwat dagiti ubbing ken agsussuso nangipaayka iti dayaw’?”​—Mateo 21:15, 16.

Ania ti masursuro dagiti ubbing ken Jesus?

Nangipaay ni Jesus iti nagsayaat nga ulidan kadagiti ubbing no maipapan iti panagbalin nga interesado iti naespirituan a bambanag. Idi agtawen iti 12, nasarakanda ni Jesus “idiay templo, a situtugaw iti tengnga dagiti mannursuro ken agim-imdeng kadakuada ken agsalsaludsod kadakuada.” Ania ti reaksionda? “Amin dagidiay umim-imdeng kenkuana nagtultuloyda a masmasdaaw iti pannakaawatna ken kadagiti sungbatna.” (Lucas 2:42, 46, 47) Nupay kasta, saan a nagpalangguad ni Jesus gapu iti nauneg a pannakaammona. Imbes ketdi, dayta ti nangtignay kenkuana a mangraem kadagiti nagannak kenkuana. Kinuna ti Biblia: “Nagtultuloy a nagpasakup kadakuada.”​—Lucas 2:51.

Para iti kanayonan nga impormasion, kitaenyo ti kapitulo 14 ti libro nga Ania a Talaga ti Isursuro ti Biblia?a

[Footnote]