Ti Masursurotayo ken Jesus

No Kasano ti Panangsurot ken Kristo

Masansan a kunaen ni Jesus kadagiti tattao a mamati kenkuana: “Agbalinka a pasurotko.” (Mateo 9:9; 19:21) Ania ti ramanen ti panagbalin a pasurot ni Jesus, wenno ti panagbalin a Kristiano? Usigem dagiti sungbat ti tallo a kangrunaan a saludsod.

Kasano ti rumbeng a panangtratom iti sabsabali?

▪ Ti adalan ni Jesus masapul a surotenna ti pammagbaga maipapan iti panangtrato kadagiti sabsabali. Kas pagarigan, kinuna ni Jesus: “Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.” No ngay nadlawmo nga adda nakabasolam? Kinuna ni Jesus: “Darasem ti makirinnisut iti daydiay mangidardarum kenka.” Impakitana pay no ania ti rumbeng a reaksion dagiti pasurotna no adda nangsair kadakuada: “No saanyo a pakawanen dagiti tattao kadagiti labsingda, uray ni Amayo saannanto a pakawanen dagiti labsingyo.”​—Mateo 5:25; 6:15; 7:12.

Kastoy ti imbalakad ni Jesus kadagiti naasawaan: “Nangngegyo a naikuna, ‘Dika makikamalala.’ Ngem kunak kadakayo a ti tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” Ti pudno a Kristiano palubosanna dagiti pannursuro ni Jesus a mangapektar iti panunot ken pusona.​—Mateo 5:27, 28.

Dagiti pudno a Kristiano isakripisioda ti bukodda a pagnam-ayan tapno makatulongda iti sabsabali. Ni Jesus ket managsakripisio. Kas pagarigan, bayat ti makabannog a panagdaliasat ni Jesus ken dagiti apostolna iti panangasabada, awan ti wayada uray mangan. Isu nga inkuyog ni Jesus dagiti apostolna nga agbilog a mapan iti naiputputong a lugar tapno aginana. Ngem nangngeg dagiti tattao no sadino ti papananda ket immunada a napan iti dayta a lugar. Kuna ti salaysay ti Biblia: “Idi makadissaag, nakitana ti maysa a dakkel a bunggoy, ngem simnek ti asina kadakuada, agsipud ta kaslada karkarnero nga awanan pastor. Ket rinugianna nga isuro ida iti adu a banag.” (Marcos 6:30-34) Matuladmo ni Jesus babaen ti panangaramidmo iti kalikaguman ti Dios kenka, uray narigat ti kasasaad.

Apay a rumbeng nga iranudmo ti naimbag a damag?

▪ Insuro ni Jesus kadagiti pasurotna nga iranudda ti naimbag a damag. Imbilinna kadagiti apostolna: “Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” (Mateo 10:7) Nakapatpateg la unay ti mensahe a nasken nga iranud dagiti pasurot ni Jesus. Inkararag ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios.”​—Juan 17:3.

Impadto ni Jesus ti maysa a trabaho a pakiramananto ti minilmilion a pasurotna. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion.” (Mateo 24:14) No naammuamon ti maipapan iti Pagarian ti Dios ken patiem ti ibagbaga ti Biblia, awan duadua a maragsakanka a mangiranud iti naammuam. Adu a pasurot ni Jesus ti nangrugi a makisarita kadagiti kabagianda maipapan iti Pagarian ti Dios.​—Juan 1:40, 41.

Apay a nasken a mabautisaranka?

▪ Idi nabautisaran ni Jesus iti karayan Jordan, inkararagna: ‘Umayak tapno aramidek ti pagayatam, O Dios.’ (Hebreo 10:7) No tarigagayam nga aramiden ti pagayatan ti Dios, nasken met a mabautisaranka. Imbilin ni Jesus: “Mangaramidkayo iti ad-adalan kadagiti tattao iti amin a nasion, a bautisaranyo ida.”​—Mateo 28:19.

Ania dagiti responsabilidad ken gunggona a kakuykuyog ti panagbalin a bautisado? Dagiti bautisado a pasurot ni Jesus nagserbida iti Dios buyogen ti amin a kararua. Inadaw ni Jesus ti Linteg ti Dios, nga agkuna: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam.” (Mateo 22:37) Kinunana pay: “No ti asinoman kayatna ti sumurot kaniak, paglikudanna koma ti bagina.” (Mateo 16:24) Ti bautismo isimbolona ti pangngeddeng ti maysa a tao a mangtallikud iti bagina ket agpaadipen iti Dios. Dagidiay addaan iti kasta a naisangsangayan a relasion iti Dios, mabalinda a kiddawen Kenkuana ti nadalus a konsiensia.​—1 Pedro 3:21.

Para iti kanayonan nga impormasion, kitaem ti kapitulo 18 daytoy a libro, nga impablaak dagiti Saksi ni Jehova.