Ti Biblia Balbaliwanna ti Biag
ANIA dagiti espesipiko nga addang nga inaramid ti maysa a kameng ti gang ken adikto iti marihuana tapno maisardengna dagiti makadangran nga aramidna? Apay a ti maysa a miembro ti banda a thrash metal impapukisna ti atiddog a buokna ken binalbaliwanna ti panangmatmatna iti pagaayatna a musika? Ania ti nakatignayan ti maysa a di mangbigbigbig iti autoridad ti gobierno ken relihion tapno agserbi kas manangaskasaba? Ammuem no ania ti ibaga dagitoy a tattao.
“Napagballigiak ti Pannakaadiktok.”—PETER KAUSANGA
EDAD: 32
NAKAYANAKANNA: NAMIBIA
PAKASARITAANNA: KAMENG TI GANG KEN ADIKTO ITI MARIJUANA
TI NAPALABASKO: Dimmakkelak iti Kehemu, maysa kadagiti uppat a nalawa a komunidad iti ili ti Rundu. Panaglako iti mijo, kayo, ken uging ti panggedan dagiti umili sadiay.
Ni apongko a baket ti nangpadakkel kaniak, ta natay ni nanangko idi agtawenak laeng iti dua. Nagbiagkami a simple. Saanak a rebelioso, ngem nairuboak gapu iti impluensia dagiti kapatadak. Iti eskuelaan, nagbalinak a kameng ti gang. Gapu iti dayta, nakiramanak iti panaglalaban, kinaranggas, panagtakaw, panagipuslit iti diamante, panagbartek, ken panagdroga. Namindua a natiliw ken naibaludak gapu iti panagtakaw ken panagsaur.
Idi agtawenak iti 18, nagsardengak nga ageskuela ket idi agangay, pinanawak ti ilik ken ti gang. Kayatko idin ti mangabaruanan. Ngem adiktoak latta idi iti marijuana. No dadduma, adu a kilometro ti pagpagnaek iti panagsapulko iti sigarilio a marijuana.
NO KASANO A BINALBALIWAN TI BIBLIA TI BIAGKO: Idi rugrugi ti 1999, adda dagiti naam-ammok a Saksi ni Jehova a mangituktukon iti literatura kadagiti tattao a magmagna iti kalsada. Trinatodak a siraraem ket dayta ti nakatignayak unay. Ti mensahe iti literatura a naawatko ti namatiak a nasarakak ti pudno a relihion. Rinugiak ti agadal a siaanep iti Biblia ket di nagbayag, naamirisko a masapul a balbaliwak ti panagbiagko no kayatko a maay-ayo kaniak ni Jehova a Dios.
Inkeddengko no ania a petsa nga isardengko ti agsigarilio ken imbellengko ti aniaman a banag a mainaig iti panagsigarilio. Kiniddawko met iti gagayyemko a didak ikkan iti sigarilio ken dida agsigarilio iti asidegko. Ngem saan a kas iti implanok ti napasamak. Namindua a timmulokak nga agsigarilio ken agmarihuana. Kaskasdi, saan a dayta ti nangupay kaniak. Linaglagipko ti prinsipio iti Proverbio 24:16: “Daydiay nalinteg mabalin a matuang iti uray mamimpito a daras, ket sigurado a tumakderto.” Idi agangay, napagballigiak dagiti bisiok.
Bayat nga umad-adu ti pannakaammok maipapan ken Jehova, ad-adda a tinarigagayak ti makisinninged Kenkuana kas gayyemko. Natukay unay ti riknak iti maysa a teksto ti Biblia a masarakan iti Salmo 27:10. Kunana: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” Bayat nga intultuloyko ti napasnek a panagsukimatko iti Biblia, napaneknekak a pudno dagita a sasao. Nariknak a ni Jehova ket nagbalin a pudpudno ken naayat nga Ama kaniak.
Regular met a nakitimpuyogak kadagiti Saksi ni Jehova. Nakitak a pudno ti panaggagayyem ken panagiinnayatda iti maysa ken maysa. Ita laeng a naiparikna kaniak ti kasta.
NO KASANO A NAGUNGGONAANAK: Iti tulong ni Jehova ken dagiti gagayyemko a Saksi, simmayaat ti langa, panagkawkawes, tigtignay, ken panagsasaok. No lagipek ti napalabas, ti dakkel a panagbalbaliw iti biagko ket kas iti kaar-ariek a budo-budo a nagbalin a napintas a kulibangbang. Agyamyaman dagiti kabagiak gapu iti panagbalbaliwko, ket raraemendakon. Adda asawak itan ket ikagkagumaak ti agbalin a naayat ken baketko ken kadagiti annakko.
“Nasarakak ti Pudno a Panggep ti Biag.”—MARCOS PAULO DE SOUSA
EDAD: 29
NAKAYANAKANNA: BRAZIL
PAKASARITAANNA: KAMENG TI BANDA A THRASH METAL
TI NAPALABASKO: Agnanaed ti pamiliami iti ili a Jaguariuna, iti São Paulo. Napeklan a Katoliko dagiti nagannak kaniak. Idi ubingak pay, nagserbiak kas sakristan. Isu a dagiti kaeskuelaak iti elementaria binirngasandak iti Apo Padi. Idi agtawenakon iti 15, nangrugi a nagustuak ti musika a heavy metal ket nakikuyogak kadagiti kumakanta iti rock. Pinaatiddogko ti buokko. Ket idi 1996, tinulongannak ni tatangko tapno makagatangak iti kaunaan a tambor ken patitko.
Idi 1998, nakimiembroak iti banda a thrash metal rock. Naalas ken sataniko dagiti musika a tinuktokarmi. Itantandudo dagita ti kinaranggas. Inapektaran ti musika ti pampanunot, tigtignay, ken ugalik. Nagbalinak a kanayon a negatibo ken agresibo.
NO KASANO A BINALBALIWAN TI BIBLIA TI BIAGKO: Idi 1999, damo a naam-ammok dagiti Saksi ni Jehova. Indiayada nga iyadalandak iti Biblia, ket immannugotak, nupay saanak unay nga interesado. Nupay kasta, nabalbaliwan ti panangmatmatko iti biag gapu iti naammuak iti Biblia.
Binirngasandak dagiti tattao iti “ti lampong,” “ti tumutokar iti rock,” wenno “ti tumatambor.” Ngem nangrugi a naamirisko a ti banda ti namagbalin kaniak a managimbubukodan ken mannakikompetensia, ket diak napnek iti reputasionko. Nautobko nga awan ti pudpudno a panggep ti biag dagiti idolok a kumakanta. In-inut a natarusak a tapno maay-ayok ni Jehova a Dios, masapul a liklikak ti musika a heavy metal ken ti imoral ken idolatroso a kabibiagko a nainaig iti dayta.
Ipatpategko ti musika ken ti atiddog a buokko. Mapampanunotko a kasla saanak nga agbiagak no awan dagita. Managpudpudotak met ket ammok a masapul a sursuruek ti agteppel. Ngem babaen ti panagadalko iti Biblia, in-inut a napatanorko ti nasged a panagayat ken Jehova. Simminged ti riknak iti Dios bayat a naammuak ti kinamanagayat, kinaanus, ken kinamanangngaasina. Inkararagko ken Jehova a tulongannak nga agbalbaliw, ket pudno a tinulongannak. Napaneknekak a mismo ti kinapudno ti Hebreo 4:12. Kuna dayta a bersikulo: “Ti sao ti Dios nabiag ken adda bilegna.”
Idi rugiak ti makitimpuyog kadagiti Saksi ni Jehova, naammuak a naidumdumada. Iti damo a gundaway iti biagko, nakitak ti pudpudno nga ayat a nabuyogan iti aramid. Nangnangruna a nagminar dayta nga ayat kadagiti dadakkel a kombension dagiti Saksi. Nasdaawak iti wagas a panagtrabaho dagiti naregta a boluntario tapno agbalin a komportable dagiti tumabuno.
NO KASANO A NAGUNGGONAANAK: Babaen ti tulong ni Jehova, nasursurok ti agteppel. Mariknak a saanakon a managimbubukodan ken natangsit.
Aklonek nga adda idi gundaway a kailiwko ti dati a biagko, ngem saan itan. Nasarakakon ti pudpudno a panggep ti biag. Maragsakanak ta nasursurok ti maseknan iti sabsabali para iti pagimbaganda.
“Mariknakon ti Rag-o nga Itden ti Pannakaseknan iti Sabsabali.”—GEOFFREY NOBLE
EDAD: 59
NAKAYANAKANNA: ESTADOS UNIDOS
PAKASARITAANNA: SAANNA A BIGBIGBIGEN TI AUTORIDAD TI GOBIERNO KEN RELIHION
TI NAPALABASKO: Dimmakkelak idiay Ipswich, Massachusetts, maysa nga ili iti asideg ti baybay ken ayan ti adu a panggedan. Idi maysaakon nga adulto, pinilik ti agnaed iti naiputputong a lugar ti Vermont. Kas kadawyan iti Makin-amianan nga America, nakaing-inget ken nakasimsimple ti biagko ken ti nobiak. Awan ti koriente, isu a papudotenmi ti balay ken aglutokami babaen kadagiti sungrod nga al-alaenmi iti bakir. Adda kasiliasmi a nakali nga abut iti ruar ti balay ken manmano nga adda danum iti gripo. Inidianmi ti moderno a kagimongan kas ipakita dagiti langami. Kinapudnona, adda gundaway idi a saanak a nagsagsagaysay iti innem a bulan, ket impannakkelko dayta.
Kabayatan dayta a tiempo, makiramraman ti Estados Unidos iti gubat idiay Vietnam. Dayta ti nangapektar iti panangmatmatko iti autoridad gapu ta nakitak ti kinamanaginsisingpet ti gobierno ken relihion. Napanunotko nga awan ti manamnama kadagita nga institusion ken rumbeng nga ikeddeng ti tunggal indibidual no ania ti naimbag ken dakes. Isu nga impagarupko a saan a dakes no agtakawak iti aniaman a kasapulak.
NO KASANO A BINALBALIWAN TI BIBLIA TI BIAGKO: Rinugiak idi a basaen ti Biblia a kaduak ti nobiak ngem saanmi a maawatan dayta. Agdrogdrogaak idi ngem ikagkagumaak nga isardeng. Kayat ti nobiak nga agkasarkami ken maaddaankami iti annak. Kadagita a gundaway, simmarungkar iti pagtaenganmi ti maysa kadagiti Saksi ni Jehova ket inyadalannakami iti Biblia.
Di nagbayag, naisardengkon dagiti bisiok, ngem saan a kaskarina a mabalbaliwak ti panangmatmatko kadagiti autoridad. Nayugalik ti mangkritikar. Dimmakkelak nga awan ti bigbigbigek nga autoridad, isu a diak maaklon a nasken nga agpasakupak iti paglintegan ti sabali.
Mamatiak nga adda Namarsua, ngem saan a nalawag ti pannakaammok kenkuana. Ngem bayat a nagadalak iti Biblia, nagminar kaniak ti personalidad ni Jehova a Dios. Naammuak no ania a talaga ti kayatna nga aramidek. Espesipiko ken nalawag dagiti kalkalikagumanna. Naammuak pay nga adda masinunuo a panggepna no apay nga aramidenna a paraiso ti daga. (2 Pedro 3:13) Dagita a kinapudno ti nangtignay kaniak nga agbalbaliw tapno kualipikadoak nga agserbi Kenkuana.
Nangnangruna a nagustuak ti saan a pannakiraman dagiti Saksi ni Jehova iti gubat. Awan ti ammok a sabali a sangalubongan a relihion nga addaan iti kasta a pagalagadan a naibatay iti Biblia.
Nautobko a no tarigagayak ti agserbi ken Jehova, masapul a natakneng ti langak. Idi damo, alusiisenak nga agkawes a kas iti panagkawkawes dagiti Saksi. Awan ti pormal a kawes ken sapatosmi nga aggagayyem. Siempre, awan met kurbatak! Ngem nagpapukisak ken pinagbalinko a natakneng ti langak. Kaskasdi, malagipko daydi damo a gundaway a nangasabaak iti binalaybalay. Idi makitak ti baro a langak iti sarming ti tawa, napanunotko, ‘Ania daytoyen nga inar-aramidko?’ Idi agangay, komportableak met laengen iti dayta a langak.
NO KASANO A NAGUNGGONAANAK: Inkasarko ti nobiak ket naragsakkami agingga ita. Napadakkelmi ti tallo nga annakmi nga agayat ken agserbi ken Jehova. Naragsakak met ta natulongak ti sabsabali a mangammo kadagiti kinapudno iti Biblia a namagbalbaliw kaniak.
Diak idi ikabkabilangan ti rikna ti sabsabali ken ipagpannakkelko ti pannakaidumak kadakuada. Ita, agyamyamanak ta mariknakon ti rag-o nga itden ti pannakaseknan iti sabsabali ken ti kaadda dagiti maseknan kaniak.
[Blurb iti panid 26]
“Adu a kilometro ti pagpagnaek iti panagsapulko iti sigarilio a marijuana”
[Blurb iti panid 28]
“Nabalbaliwan ti panangmatmatko iti biag gapu iti naammuak iti Biblia”
[Blurb iti panid 29]
“Alusiisenak nga agkawes a kas iti panagkawkawes dagiti Saksi”