Umadanika iti Dios
Sapsapulenna ti Naimbag
“AMIN a puspuso sukimaten ni Jehova, ket tunggal pagannayasan ti pampanunot mailasinna.” (1 Cronicas 28:9) Nairanta dagita a sasao a mangyebkas iti panangapresiartayo iti nasged a pannakaseknan ni Jehova kadatayo. Sapsapulen ni Jehova ti naimbag kadagiti pusotayo uray imperpektotayo. Nabatad a makita daytoy kadagiti sasaona maipapan ken Abias, a masarakan iti 1 Ar-ari 14:13.
Nagbiag ni Abias iti dakes a sangakabbalayan. Ni Jeroboam nga amana ti pannakaulo ti dinastia dagiti apostata.a Panggep ni Jehova a dadaelen ti sangakabbalayan ni Jeroboam, “kas iti panangdalus ti maysa iti ibleng.” (1 Ar-ari 14:10) Ngem imbilin ti Dios a maysa laeng a kameng ti sangakabbalayan ni Jeroboam, ni Abias—nupay masakit unay—ti maaddaan iti nadayaw a pannakaitabon.b Apay? Inlawlawag ti Dios: “Nasarakan kenkuana iti balay ni Jeroboam ti maysa a banag a naimbag maipaay ken Jehova a Dios ti Israel.” (1 Ar-ari 14:1, 12, 13) Ania ti ipasimudaag dagitoy a sasao maipapan ken Abias?
Saan a dakamaten ti Biblia no ni Abias ket maysa a matalek a managdaydayaw iti Dios. Kaskasdi, adda naimbag a nasarakan kenkuana. Daytoy a kinaimbag ket “maipaay ken Jehova,” nalabit mainaig iti panagdayaw Kenkuana. Dagiti mannurat a rabbi pagarupenda a nagdaliasat ni Abias a napan idiay templo ti Jerusalem wenno inikkatna dagiti guardia nga inkabil ni amana a manglaplapped kadagiti Israelita a mapan idiay Jerusalem.
Aniaman dayta a kinaimbag, napateg ti inaramid ni Abias. Umuna, napudno ti inaramidna. Daytoy a kinaimbag “nasarakan kenkuana”—kayatna a sawen, iti pusona. Maikadua, naisangsangayan dayta. Impakita ni Abias daytoy a kinaimbag uray “agnanaed iti sangakabbalayan ni Jeroboam.” Kuna ti maysa nga eskolar: “Nagsayaat dayta a komendasion kadagiti tattao a taginayonenda ti kinaimbagda nupay agnanaedda iti ummong ti dakes a sangakaarrubaan ken pamilia.” Kuna pay ti sabali a ti kinaimbag ni Abias ket “nalaka a mailasin . . . , kas iti panagrimat dagiti bituen iti nasipnget a rabii, ken nakapimpintas dagiti sedro no awan ti bulong dagiti kayo iti aglawlawda.”
Kapatgan iti amin, nagsayaat ti isuro kadatayo dagiti sasao ti 1 Ar-ari 14:13 no maipapan ken Jehova ken no ania ti sapsapulenna kadatayo. Laglagipem nga adda naimbag a banag a “nasarakan ken” Abias. Nabatad a sinukimat ni Jehova ti puso ni Abias ket nakasarak iti naimbag kenkuana. No idilig iti pamiliana, ni Abias ti kakaisuna a perlas “kadagiti nabunton a bisel,” kas panangdeskribir ti maysa nga eskolar. Impatpateg ni Jehova dayta a kinaimbag ket ginunggonaanna. Impaayanna ti asi daytoy a kameng ti dakes a pamilia.
Saan kadi nga ipanamnama dayta kadatayo a sapulen ken ipateg ni Jehova no ania ti naimbag nga adda kadatayo nupay imperpektotayo? (Salmo 130:3) No ammotayo dayta, matignaytayo nga agbalin a nasinged ken Jehova, ti Dios a mangsukimat kadagiti puso tapno sapulenna uray ti kabassitan a naimbag kadatayo.
[Footnotes]
a Nangipasdek ni Jeroboam iti panagdayaw iti urbon a baka iti makin-amianan a sangapulo a tribu iti pagarian ti Israel tapno saanen a mapan dagiti tattao idiay Jerusalem tapno agdayawda ken Jehova idiay templo.
b Idi panawen ti Biblia, ti saan a maipaayan iti nadayaw a pannakaitabon ket mangiparangarang iti di pananganamong ti Dios.—Jeremias 25:32, 33.