Saludsod Dagiti Agbasbasa
Mangag-agas Kadi Dagiti Saksi ni Jehova Babaen ti Pammati?
▪ Nikaanoman, saan a makiramraman dagiti Saksi ni Jehova iti panangagas babaen ti pammati wenno faith healing. Kas ken Jesus, mamatida a ti panangikasaba iti naimbag a damag ti Pagarian ti Dios ti kangrunaan a trabahoda. Mamatida met a ti pakabigbigan dagiti pudno a Kristiano ket saan a ti panangagas babaen ti pammati no di ket babaen ti banag nga adayo a napatpateg.
Siempre, nakapatpateg kadatayo amin ti naasi a panangagas ni Jesu-Kristo kadagiti masakit idi umuna a siglo K.P. Pinatalgedan ngarud ni Jesus kadatayo nga iti sidong ti panagturayna kas Ari iti Pagarian ti Dios, “awan ti agnaed nga agkuna: ‘Masakitak.’”—Isaias 33:24.
Ngem ita ngay? Dagiti faith healer iti Kakristianuan agraman dagiti relihion a saan a Kristiano kunaenda a mangag-agasda babaen ti milagro. Ngem sipipinget a namakdaar ni Jesus kadagidiay agkunkuna a ‘nangaramidda kadagiti adu a milagro’ iti naganna. Kinunana mainaig kadakuada: “Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mateo 7:22, 23) Gapuna, dagiti kadi maipagarup a milagro nga ar-aramiden dagiti mangngagas iti kaaldawantayo ket talaga a mangipamatmat iti anamong ken bendision ti Dios?
No idiligmo dagita a panangagas kadagiti namilagruan a panangagas ni Jesus a naisalaysay iti Biblia, nalakam a mailasin no talaga nga an-anamongan ti Dios dagiti pamay-an ita dagiti mangag-agas babaen ti pammati.
Pulos a saan nga inusar ni Jesus ti panangagas kas pangguyugoy iti adu a tattao. Imbes ketdi, saan a napanayag kadagiti tattao ti adu a panangagas nga inaramidna. Namin-adu nga imbagana kadagiti inagasanna a dida ibagbaga iti asinoman ti inaramidna a milagro.—Lucas 5:13, 14.
Pulos a saan a nagpabayad ni Jesus kadagiti milagro nga inaramidna. (Mateo 10:8) Nakabalballigi met dagiti milagrona. Immimbag amin dagiti masakit a napan kenkuana, ken saan a nagpannuray iti pammatida ti pannakapaimbagda. (Lucas 6:19; Juan 5:5-9, 13) Kinapudnona, uray dagiti natay ket pinagungar ni Jesus!—Lucas 7:11-17; 8:40-56; Juan 11:38-44.
Nupay inaramidna dagita a milagro, ti ministerio ni Jesus ket saan a naipamaysa iti panangurnong kadagiti nakomberte babaen kadagiti napnuan emosion a milagro. Imbes ketdi, ti panangiwaragawag iti naimbag a damag ti Pagarian ti Dios ti kangrunaan a trabahona. Inorganisar ni Jesus dagiti pasurotna tapno agaramidda iti ad-adalan, a mangisuro met kadagiti sabsabali maipapan iti namnama a perpekto a salun-at iti sidong ti Pagarian ti Dios.—Mateo 28:19, 20.
Pudno a ti dadduma kadagiti pasurot ni Jesus idi umuna a siglo ket addaan kadagiti naisangsangayan a sagsagut iti panangpaimbag, ngem adda tiempo a nagpatingga dagita. (1 Corinto 12:29, 30; 13:8, 13) Mailasin dagiti pudno a Kristiano ita saan a babaen iti panangagas, no di ket babaen ti managsakripisio nga ayat. (Juan 13:35) Ti moderno a panangagas babaen ti pammati ket saan a nakapataud iti pudpudno a pamilia dagiti Kristiano manipud iti amin a puli ken kasasaad ti panagbiag a napagkaykaysa babaen ti ayat.
Ngem adda grupo dagiti Kristiano a pinagkaykaysa ti ayat. Sibibileg nga agtigtignay kadakuada dayta nga ayat ta dida kayat a dangran ti maysa ken maysa—wenno ti asinoman—uray kabayatan ti kakaruan a gubat. Siasinoda? Isuda dagiti Saksi ni Jehova. Nalatakda iti intero a lubong gapu iti panangipakitada iti ayat a kas iti impakita ni Kristo. Ti panagkaykaysa dagiti tattao a nagduduma ti puli, nasion, ken kulturada ket maibilang a milagro, a nagbalin a posible babaen laeng iti nasantuan nga espiritu ti Dios. Apay a dika tumabuno iti maysa kadagiti gimongda tapno mapaliiwmo a mismo dayta?
[Ladawan iti panid 13]
Ti kadi Dios talaga nga an-anamonganna dagiti moderno a mangngagas babaen ti pammati? (naipakita iti kannawan)