Namilagruan a Panagsao iti Nagduduma a Lenguahe—Nagtaud Kadi iti Dios?
“TALAGA a diak maawatan,” kinuna ni Devon. “Tunggal lawas iti simbaanmi, kasla adu ti umaw-awat iti nasantuan nga espiritu ken namilagruan nga agsasaoda iti nagduduma a lenguahe. Ngem imoral ti panagbiag ti dadduma kadakuada. Ikagkagumaak ti agbalin a naimbag a tao. Ngem apay a diak pulos makaawat iti sagut ti espiritu uray kasano ti panangikarkararagko iti dayta?”
Tumabtabuno met ni Gabriel iti maysa a kapilia a sadiay agparang nga umaw-awat dagiti tattao iti nasantuan nga espiritu ken agsasaoda kadagiti nagduduma a lenguahe. Kinunana: “Maringgoranak ta bayat ti panagkararagko, adda dagiti mangsinga kaniak babaen kadagiti nalaaw a sasaoda a diak maawatan ken saanda met a maawatan a mismo. Awan ti siasinoman a magunggonaan iti dayta. Saan aya nga adda koma praktikal a panggep ti sagut ti espiritu ti Dios?”
Dagita a kapadasan da Devon ken Gabriel ket mamataud iti maysa a mamagpanunot a saludsod: Talaga kadi a nagtaud iti Dios ti namilagruan a panagsao iti nagduduma a lenguahe, kas maar-aramid iti dadduma a relihion? Tapno masungbatan dayta a saludsod, nasayaat no usigentayo ti maipapan iti sagut a namilagruan a panagsao dagiti Kristiano idi umuna a siglo.
“Nangrugida nga Agsao iti Nagduduma a Pagsasao”
Mabasatayo iti Biblia a naikkan iti pannakabalin ti dadduma a lallaki ken babbai nga agsao iti nagduduma a lenguahe a saanda a pulos nga inadal. Damo a napasamak dayta idi aldaw ti Pentecostes 33 K.P., sumagmamano laeng a lawas kalpasan ti ipapatay ni Jesu-Kristo. Iti dayta nga aldaw idiay Jerusalem, agarup 120 nga adalan ni Jesus ti ‘napno iti nasantuan nga espiritu ket nangrugida nga agsao iti nagduduma a pagsasao.’ Dagiti tattao a naggapu kadagiti ganggannaet a pagilian masmasdaawda “agsipud ta ti tunggal maysa nangngegna ida nga agsasao iti bukodna a pagsasao.”—Aramid 1:15; 2:1-6.
Dakamaten ti Biblia ti dadduma pay a nagkauna a pasurot ni Jesus nga addaan iti kasta a nakaskasdaaw nga abilidad. Kas pagarigan, babaen ti pannakabalin ti nasantuan nga espiritu, namilagruan a nagsao ni apostol Pablo iti adu a lenguahe. (Aramid 19:6; 1 Corinto 12:10, 28; 14:18) Ngem aniaman a sagut ti nasantuan nga espiritu ti Dios a kas iti dayta ket rumbeng laeng nga adda naimbag a panggepna. Gapuna, ania ti panggep ti namilagruan a panagsao iti nagduduma a lenguahe idi panawen a naisurat ti Biblia?
Pagilasinan ti Suporta ti Dios
Idi nagsurat ni Pablo kadagiti Kristiano idiay siudad ti Corinto, a dadduma kadakuada ket nalawag a makapagsao iti nagduduma a lenguahe, inlawlawagna a “dagiti pagsasao agpaayda a pagilasinan . . . kadagiti di manamati.” (1 Corinto 14:22) Gapuna, kas iti dadduma a namilagruan nga abilidad, ti pannakabalin nga agsao iti nagduduma a lenguahe ket mangipamatmat kadagiti makakitkita nga an-anamongan ken supsuportaran ti Dios ti kabubuangay a kongregasion Kristiano. Dagiti namilagruan a sagut mayaspingda iti karatula ti kalsada a mangipatpatuldo kadagiti agsapsapul iti kinapudno no sadino itan ti rumbeng a pangsapulanda iti ili a pinili ti Dios.
Makapainteres ta ti Biblia saanna a dakamaten a ni Jesus wenno ti siasinoman kadagiti mammadto sakbay ti panawen dagiti Kristiano ket namilagruan a nagsaoda iti nagduduma a lenguahe a saanda nga inadal. No kasta, agparang nga adda pay sabali a panggep no apay a naipaayan dagiti adalan ni Jesus iti sagut a panagsao iti nagduduma a lenguahe.
Pamay-an Tapno Maisaknap ti Naimbag a Damag
Idi rugrugi ti ministerio ni Jesus, imbilinna kadagiti adalanna nga ikasabada ti naimbag a damag ti Pagarian ti Dios kadagiti laeng Judio. (Mateo 10:6; 15:24) Gapuna, ti kangrunaan a nangasabaan dagiti adalan ket kadagiti lugar a pagnanaedan ti adu a Judio. Ngem mabiiten nga agbaliw ti bambanag.
Di nagbayag kalpasan ti ipapatayna idi 33 K.P., ti napagungaren a ni Jesus imbilinna kadagiti pasurotna a ‘mangaramidda iti ad-adalan kadagiti tattao iti amin a nasion.’ Imbagana pay kadagiti pasurotna nga agbalinda a saksina “agingga iti kaadaywan a paset ti daga.” (Mateo 28:19; Aramid 1:8) Tapno maikasaba ti naimbag a damag iti kasta a kasaknap, masapul ti panagsao iti dadduma a lenguahe malaksid iti Hebreo.
Ngem adu kadagiti nagkauna nga adalan ti “awan adalna ken gagangay.” (Aramid 4:13) Kasano ngarud a makakasabada kadagiti adayo a pagilian a ti lenguahe sadiay ket saanda nga inadal ken dida pay ketdi nangnangngegan? Dadduma kadagitoy a naregta a manangaskasaba ti impaayan ti nasantuan nga espiritu iti namilagruan nga abilidad tapno makakasabada kadagiti lenguahe a dida pulos inadal.
No kasta, adda dua a panggep ti sagut a namilagruan a panagsao iti nagduduma a lenguahe. Umuna, nagserbi dayta a pagilasinan ti suporta ti Dios. Maikadua, dayta ti epektibo a pamay-an a makatulong kadagiti Kristiano idi umuna a siglo tapno maitungpalda ti rebbengenda a mangasaba kadagiti tattao a nagduduma ti lenguaheda. Ti kadi namilagruan a panagsao iti nagduduma a lenguahe nga ar-aramiden ita ti adu a relihion matungtungpalda dagita a panggep?
Namilagruan a Panagsao iti Nagduduma a Lenguahe iti Kaaldawantayo —Pagilasinan ti Suporta ti Dios?
Sadino ti pangikabilam iti karatula tapno magunggonaan ti ad-adu a tattao iti komunidad a pagnanaedam? Iti kadi uneg ti bassit a pasdek? Saan la ketdi! Ti salaysay a napasamak idi Pentecostes ipakitana kadatayo nga “umariwekwek” nga aglabas ti nakakita iti pagilasinan a gapuanan ti namilagruan a panagsao dagiti adalan iti nagduduma a lenguahe. Nagbanaganna, “nainayon ti agarup tallo ribu a kararua” iti kongregasion Kristiano iti dayta nga aldaw! (Aramid 2:5, 6, 41) No ibaga dagiti tattao ita a makapagsaoda iti nagduduma a lenguahe ngem agsaoda laeng iti uneg ti simbaan wenno kapilia, kasano nga agbalin dayta a pagilasinan ti umariwekwek a di manamati?
Dakamaten ti Sao ti Dios a ti pannakiabig ken dadduma pay nga “ar-aramid ti lasag” ket maibusor iti panagtignay ti nasantuan nga espiritu, ken innayonna pay a “dagidiay mangannurot iti kakasta a banag saandanto a tawiden ti pagarian ti Dios.” (Galacia 5:17-21) No makakitaka kadagiti tattao nga agsasao iti nagduduma a lenguahe ngem imoral ti panagbiagda, nalabit mapanunotmo, ‘Saan kadi nga agkontra—wenno makariro pay ketdi—a ti kasta a tao nga agar-aramid iti konkondenaren ti Sao ti Dios ket maipaayan iti sagut a nasantuan nga espiritu ti Dios?’ Mayasping dayta iti panangikabil iti karatula a mangipatpatuldo kadagiti biahero iti saan nga umiso a dalan.
Namilagruan a Panagsao iti Nagduduma a Lenguahe iti Kaaldawantayo—Pamay-an a Mangisaknap iti Naimbag a Damag?
Ti ngay sabali pay a panggep ti namilagruan a panagsao iti nagduduma a lenguahe idi umuna a siglo? Ti kadi namilagruan a panagsao iti nagduduma a lenguahe a maar-aramid kadagiti kapilia ket pamay-an tapno maikasaba ti naimbag a damag kadagiti tattao a nagduduma ti lenguaheda? Lagipem a nagduduma a pagilian ti naggapuan dagiti tattao nga adda idiay Jerusalem idi aldaw ti Pentecostes 33 K.P., ket nalawag a naawatanda dagiti lenguahe a namilagruan nga inusar dagiti adalan. Maisupadi iti dayta, dagiti agsasao iti nagduduma a lenguahe iti kaaldawantayo gagangay nga agsaoda iti lenguahe a di pulos maawatan dagiti dumdumngeg.
Nalawag, ti namilagruan a panagsao iti nagduduma a lenguahe iti kaaldawantayo ket naiduma unay iti sagut ti nasantuan nga espiritu a naipaay kadagiti nagkauna a pasurot ni Jesus. Kinapudnona, awan ti mapagtalkan a salaysay maipapan iti asinoman a nakaawat iti kasta a namilagruan a pannakabalin sipud idi natay dagiti apostol. Saan a nakaskasdaaw dayta kadagiti agbasbasa iti Biblia. Maipapan kadagiti namilagruan a sagut, agraman ti namilagruan a panagsao iti nagduduma a lenguahe, impadto ni napaltiingan nga apostol Pablo: “Agsardengdanto.” (1 Corinto 13:8) Kasano ngarud a mailasin ti maysa no asino iti kaaldawantayo ti nakaawat iti nasantuan nga espiritu?
Siasino Dagiti Makapaneknek nga Addaanda iti Nasantuan nga Espiritu?
Pagaammo idi ni Jesus nga agsardeng ti sagut a namilagruan a panagsao iti nagduduma a lenguahe kalpasan la unay ti pannakabuangay ti kongregasion Kristiano. Sakbay ti ipapatayna, dinakamat ni Jesus ti maysa a pagilasinan, wenno tanda, nga agnanayon a pakabigbigan dagiti pudno a pasurotna. “Babaen iti daytoy maammuanto ti isuamin a dakayo dagiti adalak,” kinunana, “no addaankayo iti ayat iti maysa ken maysa.” (Juan 13:35) Kinapudnona, iti isu met la a bersikulo a nakaipadtuan ti panagsardeng dagiti namilagruan a sagut, naikuna: “Ti ayat saan a pulos aggibus.”—1 Corinto 13:8.
Nailista ti ayat kas ti umuna kadagiti siam nga aspeto “ti bunga,” wenno produkto, ti nasantuan nga espiritu ti Dios. (Galacia 5:22, 23) Gapuna, dagiti pudno nga addaan iti espiritu ti Dios—ken tultulongan ti Dios—mangipakitada koma iti pudno nga ayat iti maysa ken maysa. Kasta met, ti maikatlo nga aspeto ti bunga ti espiritu ket talna. No kasta, dagiti tattao iti kaaldawantayo nga addaan iti nasantuan nga espiritu ket natalnada, nga ikagkagumaanda a liklikan dagiti kababalin a kas iti kinapanatiko, kinaranggas, ken panangidumduma iti puli.
Laglagipem met ti padto ni Jesus a nailanad iti Aramid 1:8. Impadtona nga umawatto dagiti adalanna iti pannakabalin tapno makapagserbida kas saksina “iti kaadaywan a paset ti daga.” Impamatmat pay ni Jesus nga agtultuloy dayta a trabaho “agingga iti panungpalan ti lubong.” (Mateo 28:20, King James Version) Gapuna, dayta nga internasional a trabaho a panangasaba ket agtultuloy a pakabigbigan dagiti tattao a pudno a pabpabilgen ti nasantuan nga espiritu.
Ania ti makunam? Ania a grupo dagiti tattao ita ti makapaneknek nga adda kadakuada ti nasantuan nga espiritu? Iti intero a lubong, siasino ti mangiparparangarang iti bunga ti espiritu, nangruna ti ayat ken talna, uray no idadanes ida dagiti gobierno iti nagduduma a pagilian gapu iti panagkedkedda a makigubat? (Isaias 2:4) Siasino dagiti mangikagkagumaan a mangliklik kadagiti aramid ti lasag, kas iti pannakiabig, nga ikkatenda pay iti nagtetengngaanda dagiti di agbabbabawi nga agar-aramid iti kasta a basol? (1 Corinto 5:11-13) Siasino dagiti mangaskasaba iti intero a lubong tapno maisaknap ti naimbag a damag ti Pagarian ti Dios kas ti kakaisuna a namnama ti sangatauan?—Mateo 24:14.
Dagiti mangipabpablaak iti daytoy a magasin saanda a bumdeng a mangibaga a dagiti Saksi ni Jehova ti desdeskribiren ti Biblia a tattao nga addaan iti nasantuan nga espiritu. Apay a dikay am-ammuen ida a naimbag tapno maikeddengyo no talaga a tultulongan ida ti Dios?