Itultuloyyo a Sapulen nga Umuna ti “Kinalintegna”

“Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—MAT. 6:33.

1, 2. Ania ti kinalinteg ti Dios, ken ania ti nakaibatayanna?

“ITULTULOYYO, ngarud, a sapulen nga umuna ti pagarian.” (Mat. 6:33) Daytoy a balakad nga inted ni Jesu-Kristo iti Sermonna iti Bantay ket pagaammo unay dagiti Saksi ni Jehova ita. Iti amin nga aspeto ti panagbiagtayo, ikagkagumaantayo nga ipakita ti panagayattayo iti gobierno a Pagarian ken kayattayo ti agbalin a nasungdo iti dayta. Ngem masapul met a laglagipentayo ti maikadua a paset dayta a balakad, dagiti sasao a “ken ti kinalintegna.” Ania ti kinalinteg ti Dios ken ania ti kaipapanan ti panangsapul nga umuna iti dayta?

² Ti kinalinteg ti Dios tuktukoyenna ti kinalinteg a naibatay iti pagalagadan ken prinsipiona. Kas Namarsua, kalintegan ni Jehova nga ipasdek no ania ti naimbag ken dakes, no ania ti umiso ken di umiso. (Apoc. 4:11) Ngem ti kinalinteg ti Dios ket saan a buklen dagiti naiinget a linteg wenno nakaat-atiddog a listaan dagiti pagannurotan ken pagalagadan. Imbes ketdi, naibatay dayta iti personalidad ni Jehova ken iti galadna a kinahustisia, agraman ti dadduma pay a kangrunaan a galadna nga ayat, sirib, ken pannakabalin. Gapuna, ti kinalinteg ti Dios ket nainaig iti pagayatan ken panggepna, ken no ania ti namnamaenna kadagidiay agtarigagay nga agserbi kenkuana.

3. (a) Ania ti kaipapanan ti panangsapul nga umuna iti kinalinteg ti Dios? (b) Apay nga alagadentayo dagiti nalinteg a pagannurotan ni Jehova?

³ Ania ti kaipapanan ti panangsapul nga umuna iti kinalinteg ti Dios? Ti simple a kaipapananna ket ti panangaramid iti pagayatan ti Dios tapno magun-od ti anamongna. Ramanenna ti panangikagumaan nga agbiag maitunos kadagiti prinsipio ken perpekto a pagalagadanna imbes a ti bukodtayo a pagayatan. (Basaen ti Roma 12:2.) Nainaig dayta iti mismo a relasiontayo ken Jehova. Agtulnogtayo iti bilbilinna, saan a gapu ta mabutengtayo a madusa no di ket gapu ta ay-ayatentayo ti Dios. Dayta ti mangtignay kadatayo a mangikagumaan a manggun-od iti anamongna babaen ti panangalagad kadagiti pagannurotanna, imbes a mangaramidtayo iti bukodtayo a pagannurotan. Bigbigentayo a dayta ti maiparbeng nga aramiden, ken nadiseniotayo a mangaramid iti dayta. Kas ken Jesu-Kristo, ti Ari ti Pagarian ti Dios, masapul nga ipategtayo ti kinalinteg.​—Heb. 1:8, 9.

4. Apay a nagpateg ti panangsapul iti kinalinteg ti Dios?

⁴ Kasano kapateg ti panangsapul iti kinalinteg ni Jehova? Usigenyo daytoy a kinapudno: Nasubok da Adan ken Eva idiay hardin ti Eden no bigbigenda wenno saan ti kalintegan ni Jehova a mangipasdek kadagiti pagannurotan. (Gen. 2:17; 3:5) Ti saanda a panangbigbig iti dayta ket nagresulta iti panagsagaba ken ipapataytayo kas kaputotanda. (Roma 5:12) Iti sabali a bangir, kuna ti Sao ti Dios: “Daydiay mangsurot iti kinalinteg ken naayat a kinamanangngaasi masarakannanto ti biag, kinalinteg ken dayag.” (Prov. 21:21) Wen, ti panangsapul nga umuna iti kinalinteg ti Dios ket agresulta iti nasayaat a relasion ken Jehova, nga agbanag iti mismo a pannakaisalakantayo.​—Roma 3:23, 24.

Ti Peggad ti Panaginlilinteg

5. Ania a peggad ti masapul a liklikantayo?

⁵ Iti surat ni apostol Pablo kadagiti Kristiano idiay Roma, intampokna ti maysa a peggad a masapul a liklikantayo amin tapno agballigitayo a mangsapul nga umuna iti kinalinteg ti Dios. Kinuna ni Pablo kadagiti padana a Judio: “Saksiak ida nga adda regtada iti Dios; ngem saan a maitunos iti umiso a pannakaammo; ta, gapu iti saanda a pannakaammo iti kinalinteg ti Dios no di ket ikagkagumaanda nga ipasdek ti bukodda, saanda nga impasakup ti bagbagida iti kinalinteg ti Dios.” (Roma 10:2, 3) Sigun ken Pablo, dagita nga agdaydayaw saanda a natarusan ti kinalinteg ti Dios gapu ta okupadoda unay a mangipaspasdek iti bukodda a kinalinteg.a

6. Ania a kababalin ti masapul a liklikantayo, ken apay?

⁶ Ti maysa a pamay-an a matnagtayo iti dayta a silo ket no ibilangtayo a pannakisalisal ti panagserbitayo iti Dios, nga idiligtayo ti bagitayo iti sabsabali. Ti kasta a kababalin ti nalaka a mangituggod kadatayo nga agtalek unay iti abilidadtayo. Ngem no kasta ti kababalintayo, saantay a sipapanunot iti kinalinteg ni Jehova. (Gal. 6:3, 4) Ti koma motibotayo a mangaramid iti umiso ket gapu ta ay-ayatentayo ni Jehova. Aniaman a panangikagumaantayo a mangpaneknek iti bukodtay a kinalinteg ipakitana a saantay a talaga nga ay-ayaten ti Dios.​—Basaen ti Lucas 16:15.

7. Kasano nga intampok ni Jesus ti parikut maipapan iti panaginlilinteg?

⁷ Madanagan ni Jesus kadagidiay “nagtalek iti bagbagida a nalintegda ken nangibilang iti dadduma kas awan kaes-eskanda.” Intampokna ti parikut maipapan iti panaginlilinteg babaen iti daytoy nga ilustrasion: “Dua a tattao ti simmang-at idiay templo tapno agkararagda, ti maysa Fariseo ket ti sabali agsingsingir iti buis. Ti Fariseo nagtakder ket rinugianna nga ikararag dagitoy a banag iti kabukbukodanna, ‘O Dios, agyamanak kenka a saanak a kas iti dadduma a tattao, a manangkikil, nakillo, mannakikamalala, wenno uray kas iti daytoy nga agsingsingir iti buis. Agayunarak iti mamindua iti maysa a lawas, itedko ti apagkapullo ti amin a bambanag a magun-odak.’ Ngem ti agsingsingir iti buis nga agtaktakder iti adayo saanna a kayat uray ti mangitangad kadagiti matana sadi langit, no di ket dinandanogna ti barukongna, a kunkunana, ‘O Dios, mangngaasika kaniak a managbasol.’” Ingngudo ni Jesus babaen ti panangikunana: “Ibagak kadakayo, Daytoy a tao simmalog a napan iti pagtaenganna a napaneknekan a nalinlinteg ngem daydiay a tao; agsipud ta ti tunggal maysa a mangitan-ok iti bagina maipababanto, ngem ti mangipakumbaba iti bagina maitan-okto.”​—Luc. 18:9-14.

Ti Sabali Pay a Peggad​—Ti ‘Nalabes a Kinalinteg’

8, 9. Ania ti kaipapanan ti ‘nalabes a kinalinteg,’ ken mabalinnatayo nga ituggod iti ania?

⁸ Ti sabali pay a peggad a masapul a liklikantayo ket ti nadakamat iti Eclesiastes 7:16: “Dika agbalin a nalabes ti kinalintegna, saanmo met nga ipakita a nalabes unay ti kinasiribmo. Apay koma a paglangalangem ta bagim?” Iti bersikulo 20, ti napaltiingan a mannurat iti Biblia impakitana ti rason no apay a liklikantayo ti kasta a kababalin: “Ta awan ti tao a nalinteg iti daga nga agtultuloy nga agaramid iti naimbag ket saan nga agbasol.” Ti tao a “nalabes ti kinalintegna” ket addaan kadagiti bukod a pagannurotan no ania ti nalinteg ken ukomenna ti sabsabali maibatay kadagita. Ngem dina ammo a babaen ti panangaramidna iti kasta, pagparparangenna a natantan-ok dagiti pagannurotanna ngem kadagiti pagannurotan ti Dios. Pammaneknek laeng dayta nga isu ket saan a nalinteg iti imatang ti Dios.

⁹ No ‘nalabes ti kinalintegtayo,’ mabalin a maituggodtayo a mangkuestionar iti wagas ti panangtaming ni Jehova kadagiti bambanag. Ngem laglagipentayo a no kuestionarantayo ti kinanainkalintegan wenno kinaumiso dagiti pangngeddeng ni Jehova, kasla ibagbagatayo a natantan-ok ti pagannurotantayo mainaig iti kinalinteg ngem iti pagannurotan ni Jehova. Kasla uk-ukomentayo ni Jehova maibatay iti bukodtayo a pagannurotan no ania ti umiso ken di umiso. Ngem ni Jehova ti addaan iti kalintegan a mangipasdek iti pagannurotan no ania ti nalinteg, saan ket a datayo!​—Roma 14:10.

10. Kas ken Job, ania ti mabalin a mangituggod kadatayo a mangukom iti Dios?

¹⁰ Nupay awan kadatayo ti mangigagara a mangukom iti Dios, mabalin a maituggodtayo a mangaramid iti dayta gapu iti kinaimperpektotayo. Nalaka laeng a mapasamak dayta no makakitatayo iti maysa a banag nga ibilangtayo a di nainkalintegan wenno no agsagabatayo a mismo. Nakaaramid iti kasta a kamali uray ti matalek a tao a ni Job. Nadeskribir idi ni Job kas “awan pakababalawanna ken nalinteg, ken agbuteng iti Dios ken sumiasi iti dakes.” (Job 1:1) Ngem nagpasar ni Job iti nagsasaruno a didigra, nga ibilangna a di nainkalintegan. Dayta ti nangituggod kenkuana a mangibaga a “nalinteg ti bukodna a kararua imbes a ti Dios.” (Job 32:1, 2) Masapul a maatur ti di umiso a panangmatmat ni Job. Gapuna, ditay pakasdaawan no addaantay met iti kasta a panangmatmat no dadduma. No mapasamak dayta, ania ti makatulong kadatayo a mangatur iti panagpampanunottayo?

Saan a Kanayon nga Ammotayo ti Amin a Detalye

11, 12. (a) No ibilangtayo a di nainkalintegan ti maysa banag, ania ti masapul a laglagipentayo? (b) Apay a mabalin a panunoten ti maysa a saan a patas ti bumalay iti ilustrasion ni Jesus maipapan kadagiti trabahador iti kaubasan?

¹¹ Ti umuna a laglagipentayo ket saan a kanayon nga ammotayo ti amin a detalye. Pudno dayta iti kaso ni Job. Dina ammo ti siuulbod a panangakusar kenkuana ni Satanas bayat dagiti panagtataripnong dagiti anghel nga annak ti Dios idiay langit. (Job 1:7-12; 2:1-6) Saan nga ammo ni Job a ni Satanas a talaga ti makinggapuanan kadagiti parikutna. Ditay pay ketdi masigurado no ammona ti kinapudno maipapan ken Satanas! Gapuna, sibibiddut nga impagarupna a ti Dios ti makinggapuanan kadagiti parikutna. Wen, nalaka laeng ti maaddaan iti di umiso a kapanunotan no saantayo nga ammo ti amin a detalye.

¹² Kas pagarigan, usigentayo ti ilustrasion ni Jesus maipapan kadagiti trabahador iti kaubasan. (Basaen ti Mateo 20:8-16.) Dinakamat ditoy ni Jesus ti maysa a bumalay a nangtangdan iti amin a trabahadorna iti agpapada a gatad, agmalmalem man a nagtrabahoda wenno maysa laeng nga oras. Ania ti makunam? Patas kadi dayta? Nalabit a dagus a maasianka kadagidiay nagmalmalem a nagtrabaho iti kainaran. Maikunam la ketdi a dakdakkel koma ti tangdanda! No kasta ti kapanunotam, agparang a mangidumduma ken saan a naasi ti bumalay. Uray ti sungbatna kadagiti nagreklamo a trabahador ket agparang a panangabuso iti autoridadna. Ngem ammotayo kadi ti amin a detalye?

13. Iti ania a sabali pay a punto de bista a mabalintayo a matmatan ti ilustrasion ni Jesus maipapan kadagiti trabahador iti kaubasan?

¹³ Usigentayo daytoy nga ilustrasion iti sabali a punto de bista. Awan duadua nga ammo ti bumalay iti ilustrasion a masapul a taraonan dagitoy a trabahador ti pamiliada. Idi kaaldawan ni Jesus, inaldaw a matangdanan dagiti trabahador iti kaubasan. Agpannuray ti pamiliada iti mateggedanda iti kada aldaw. Maibatay iti dayta, panunotenyo ti kasasaad dagiti trabahador a nasarakan ti bumalay idi mumalemen isu a maysa nga oras laeng a nagtrabahoda. Nalabit a saan nga umdas ti mateggedanda iti maysa laeng nga oras tapno mataraonanda ti pamiliada. Kaskasdi, kayatda ti agtrabaho ken nagmalmalem a nagur-urayda iti pakiteggedanda. (Mat. 20:1-7) Saanda a basol ti dida panagtrabaho iti agmalmalem. Awan ti mangipakita nga inggagarada ti saan nga agtrabaho. Panunotem nga agmalmalem a nagur-urayka, nga ammom nga adda agpampannuray iti mateggedam iti dayta nga aldaw. Nalabit nga anian a yamanmo ta adda nangted kenka iti trabaho​—ken anian a siddaawmo nga immawat iti tangdan nga umdas a pangtaraon iti pamiliam!

14. Ania ti napateg a maadaltayo iti ilustrasion mainaig iti kaubasan?

¹⁴ Ita, subliantayo ti inaramid ti bumalay. Intedna laeng no ania ti maiparbeng a tangdan ti tunggal maysa. Ibilangna ngamin nga adda kalintegan a mangged ti amin a trabahador tapno mataraonanda ti pamiliada. Nupay adu ti awanan iti trabaho, saanna a ginundawayan dagiti trabahador tapno tangdananna ida iti nababbaba ngem iti maiparbeng. Impaayanna amin ida iti tangdan nga umdas a pangtaraonda iti pamiliada. No ikabilangantayo dagitoy a kanayonan a detalye, mabalin nga agbaliw ti panangmatmattayo iti inaramid ti bumalay. Panangipakita iti ayat ti inaramidna, saan ket a panangabuso iti autoridadna. Ania ti maadaltayo iti dayta? No sumagmamano laeng a detalye ti ammotayo, mabalin a makaaramidtayo iti di umiso a konklusion. Wen, itampok daytoy nga ilustrasion ti kinatan-ok ti kinalinteg ti Dios, a saan laeng a naibatay kadagiti legal a pagannurotan ken iti kalintegan ti maysa.

Mabalin a Ballikug Wenno Limitado ti Panangmatmattayo

15. Apay a mabalin a ballikug wenno limitado ti panangmatmattayo iti kinanainkalintegan?

¹⁵ No ibilangtayo a di nainkalintegan ti maysa a situasion a pakaipasanguantayo, laglagipentayo met koma a mabalin a maigapu dayta iti ballikug wenno limitado a panangmatmattayo. Mabalin a binallikug dayta ti kinaimperpekto, panangidumduma, wenno kultura. Limitado met dayta gapu ta ditay kabaelan a basaen dagiti motibo ken ammuen no ania ti adda iti puso ti maysa. Ngem saan a kasta ni Jehova ken ni Jesus.​—Prov. 24:12; Mat. 9:4; Luc. 5:22.

16, 17. Apay a saan nga impatungpal ni Jehova ti dusa a kalikaguman ti lintegna idi nakabasol iti pannakikamalala da David ken Bat-seba?

¹⁶ Usigentayo ti salaysay maipapan iti pannakikamalala ni David ken ni Bat-seba. (2 Sam. 11:2-5) Sigun iti Mosaiko a Linteg, maikarida a mapapatay. (Lev. 20:10; Deut. 22:22) Nupay dinusa ida ni Jehova, saanna nga impatungpal ti maiparbeng a dusa a kalikaguman ti lintegna. Panangidumduma kadi dayta iti biang ni Jehova? Panangipakita kadi dayta iti paboritismo ken ni David ken pananglabsing kadagiti nalinteg a pagannurotanna? Kasta ti ipagarup ti dadduma nga agbasbasa iti Biblia.

¹⁷ Nupay kasta, daytoy a linteg mainaig iti pannakikamalala ket inted ni Jehova kadagiti imperpekto nga ukom a di makabasa iti puso. Babaen iti daytoy a linteg, adda maymaysa a pagannurotan a surotenda no mangaramidda idi kadagiti pangngeddeng. Iti sabali a bangir, mabasa ni Jehova ti puso. (Gen. 18:25; 1 Cron. 29:17) Gapuna, ditay rumbeng a panunoten a malimitaran ni Jehova babaen iti maysa a linteg nga inrantana para kadagiti imperpekto nga ukom. No kasta ni Jehova, saan kadi a kasla panangipapilit dayta iti maysa a nalawag ti panagkitana nga agusar iti anteohos a nadisenio a mangatur iti maysa a tao nga adda depekto ti panagkitana? Mabasa ni Jehova ti puso da David ken Bat-seba ken nakitana ti pudno a panagbabawida. Gapuna, inukomna ida maibatay kadagita a nakitana, ken iti naasi ken naayat a pamay-an.

Itultuloyyo a Sapulen ti Kinalinteg ni Jehova

18, 19. Ania ti makatulong kadatayo a di pulos mangukom ken Jehova maibatay kadagiti bukodtayo a pagannurotan ti kinalinteg?

¹⁸ No adda ngarud dagiti gundaway nga ibilangtayo a saan a nainkalintegan ni Jehova​—kadagiti man salaysay a mabasatayo iti Biblia wenno iti mismo a kapadasantayo​—ditay koma pulos ukomen ti Dios maibatay kadagiti bukodtayo a pagannurotan ti kinalinteg. Laglagipentayo a ditay ammo ti amin a detalye ken mabalin a ballikug wenno limitado ti panangmatmattayo. Ditay koma pulos liplipatan a “ti pungtot ti tao saanna nga itungpal ti kinalinteg ti Dios.” (Sant. 1:19, 20) Iti kasta, saanto a pulos a ‘makapungtot ti pusotayo maibusor ken Jehova a mismo.’​—Prov. 19:3.

¹⁹ Kas ken Jesus, kanayon a bigbigentayo a ni Jehova laeng ti addaan iti kalintegan a mangipasdek iti pagannurotan no ania ti nalinteg ken naimbag. (Mar. 10:17, 18) Ikagumaantayo ti gumun-od iti “umiso a pannakaammo” kadagiti pagannurotanna. (Roma 10:2; 2 Tim. 3:7) No iyaplikartayo dagita ken agbiagtayo maitunos iti pagayatan ni Jehova, ipakpakitatayo a sapsapulentayo nga umuna “ti kinalintegna.”​—Mat. 6:33.

[Footnote]

Malagipyo Kadi?

• Apay a napateg a sapulen ti kinalinteg ni Jehova?

• Ania ti dua a peggad a nasken a liklikantayo?

• Kasanotayo a mayun-una ti panangsapul iti kinalinteg ti Dios?

[Ladawan iti panid 9]

Ania ti maadaltayo iti ilustrasion ni Jesus maipapan iti dua a lallaki nga agkarkararag iti templo?

[Ladawan iti panid 10]

Nainkalintegan kadi nga agpada ti tangdan dagiti nagtrabaho iti maysa nga oras ken dagidiay nagtrabaho iti agmalem?