Saludsod Dagiti Agbasbasa . . .
Agpapaagas Kadi Dagiti Saksi ni Jehova?
▪ Kinuna ni Jesus a “dagiti tattao a nasalun-at saanda a kasapulan ti mangngagas, no di ket dagiti masaksakit.” (Mateo 9:12) Impasimudaagna ngarud a saan a maikontra iti Kasuratan ti panagpaagas kadagiti propesional iti tay-ak ti medisina. Gapuna, maragsakan dagiti Saksi ni Jehova nga umawat iti medisina ken agpaagas. Kayatda a mataginayon ti nasayaat a salun-atda ken mapaatiddog ti biagda. Kinapudnona, kas iti Kristiano a ni Lucas idi umuna a siglo, dodoktor ti dadduma kadagiti Saksi ni Jehova.—Colosas 4:14.
Nupay kasta, saan nga awaten dagiti Saksi ni Jehova ti kita ti pannakaagas a maikontra kadagiti prinsipio ti Biblia. Kas pagarigan, saanda nga agpayalison iti dara gapu ta iparit ti Biblia ti panangipauneg iti dara a pangsustiner iti bagi. (Genesis 9:4; Levitico 17:1-14; Aramid 15:28, 29) Ti Sao ti Dios iparitna met dagiti pamay-an ti pannakaagas nga adda karamanna a panagusar iti “karkarna a pannakabalin” wenno espiritismo.—Isaias 1:13; Galacia 5:19-21.
Adu a propesional iti panangaywan iti salun-at ti mangus-usar iti mangispal-biag a panangagas a saan a maikontra kadagiti pagalagadan ti Biblia. Dagita a pannakaagas, a pilien ti adu a Saksi, ket kaaduanna a nasaysayaat ngem kadagiti pannakaagas a maikontra kadagiti kalikaguman ti Dios.
Siempre, nagduduma ti kapanunotan no maipapan iti salun-at. Ti makaagas iti maysa mabalin a saan a makaagas iti sabali. Gapuna, dagidiay agsapsapul iti umiso a dayagnosis ti doktor ken epektibo a pannakaagas ket nasayaat no saan laeng a maymaysa a doktor ti pagpakonsultaanda.—Proverbio 14:15.
Dagiti Saksi ket saan nga agpapada ti pilienda a pannakaagas. No la ketdi ta awan ti masalungasing a linteg ti Dios, ipalubos ti Saona ti panagduduma ti pangngeddeng dagiti Kristiano maibatay iti konsiensiada. (Roma 14:2-4) Gapuna, rumbeng nga usigen a naimbag ti tunggal indibidual ti aniaman a maisingasing a pannakaagas tapno masiguradona a saan a maikontra dayta iti sinanay-Biblia a konsiensiana.—Galacia 6:5; Hebreo 5:14.
Ibilang ti maysa a Saksi a ti panagaramidna iti desision ket kas iti iyaasideg ti maysa a drayber iti pagsapalan nga aduan iti lugan. No surotenna lattan dagiti sarsarunuenna a lugan ket paspasanna ti lumasat iti pagsapalan, mabalin nga agresulta dayta iti aksidente. Ti masirib a drayber ket agmenor ken paliiwenna ti taray ti trapiko sakbay nga aglayon. Umasping iti dayta, dagiti Saksi saanda nga agdarasudos nga agaramid iti desision mainaig iti pannakaagas ken saanda met a sumursurot lattan iti kapanunotan ti kaaduan. Imbes ketdi, tingitingenda dagiti pagpilian ken usigenda dagiti prinsipio ti Biblia sakbay nga agdesisionda.
Dagiti Saksi ni Jehova apresiarenda la ketdi ti kinaanep ken dedikasion dagiti mangay-aywan iti salun-at. Agyamanda met iti pannakabang-arda gapu iti serbisio medikal nga ipapaay dagitoy nga indibidual.