Ammoyo Kadi?
Asino ni Asuero nga ari ti Persia a nadakamat iti Ester a libro ti Biblia?
▪ Sigun iti libro nga Ester, pinili ni Asuero ti balasang a Judio a ni Ester nga agbalin a reynana, a nangispal iti ilina iti gakat a panangikisap. Nabayagen nga agduduma ti opinion no asino daytoy nga Asuero nga ari ti Persia. Ngem kasla narisut dayta idi naitarusan ti kaipapanan dagiti inskripsion kadagiti monumento iti Persia a naisurat iti tallo a lenguahe. Awan duadua a ni Asuero isu ni Xerxes I, ti anak ni Dario a Dakkel (Histaspis). Ti nagan a Xerxes iti Persiano nga inskripsion, no letra-por-letra a maipatarus iti Hebreo, ket gistay kapada ti nailanad iti Hebreo a teksto iti libro nga Ester.
Amin a naisurat iti libro nga Ester maipapan ken Asuero ket maitunos iti pakasaritaan ni Xerxes I. Pinagbalinna a kabeserana ti Susa (Susan) idiay Elam, ket inturayanna met ti Media. Naglawa ti sakupna ta saklawenna ti India agingga kadagiti isla ti Mediteraneo. (Ester 1:2, 3; 8:9; 10:1) “Ni laeng Xerxes nga ari ti Persia ti naaddaan iti kasta kalawa a nasakupan,” kuna ti eskolar a ni Lewis Bayles Paton. “Ti kababalin ni Asuero, kas nailadawan iti libro nga Est[er] ket maitunos met unay iti salaysay ni Xerxes nga insurat da Herodotus ken dadduma pay a Griego a historiador.”
Ania ti ebidensia a naaramid idi dagiti ladrilio iti nagkauna nga Egipto?
▪ Ibaga ti libro ti Biblia nga Exodo a dagiti Egipcio pinagaramidda iti ladrilio dagiti Hebreo nga adipenda. Masapul a patauden dagitoy nga adipen ti naikeddeng a bilang ti ladrilio iti inaldaw babaen iti argamasa ken garami.—Exodo 1:14; 5:10-14.
Idi tiempo ti Biblia, nagpateg a trabaho ti panagaramid iti naibilag a ladrilio iti Tanap ti Nilo. Adda pay laeng ita idiay Egipto dagiti nagkauna a monumento a naaramid iti ladrilio. Naipakita ti panagaramid iti ladrilio iti naipinta a ladawan iti diding ti tanem ni Rekhmire iti Thebes. Naaramid dayta idi maika-15 a siglo B.C.E., a dandani kagiddan dagiti pasamak a naisalaysay iti libro nga Exodo.
Kastoy ti panangiladawan ti The International Standard Bible Encyclopedia iti eksena a naipinta iti diding: “Masakdo ti danum iti maysa a libtong; masaenda ti pitak sa iyasidegda iti agar-aramid iti ladrilio. Maikarga ti namasa a pitak iti sukogan a naidisso iti daga. Kalpasanna, maikkat ti sukogan sa maibilag ti naporma a ladrilio. Naintar ti adu a naporma a ladrilio, ket no natangkenen maipempen dagita a nakasagana a mausar. Masursurot pay laeng ita daytoy a proseso idiay Makintengnga a Daya.”
Adda met dagiti dokumento a papiro idi maikadua a milenio B.C.E. a mangdakamat iti panagaramid dagiti adipen iti ladrilio, panagusar iti garami ken pitak, ken kaadu ti ladrilio a masapul nga aramiden dagiti trabahador iti inaldaw.
[Ladawan iti panid 22]
Naikitikit a Ladawan ni Xerxes (nakatakder) ken ni Dario a Dakkel (nakatugaw)
[Credit Line]
Werner Forman/Art Resource, NY
[Ladawan iti panid 22]
Ti ladawan iti diding ti tanem ni Rekhmire
[Credit Line]
Erich Lessing/Art Resource, NY