SUHETO ITI AKKUB: ANIA TI MASURSUROTAYO KEN MOISES?
Asino ni Moises?
Ania ti mapanunotmo no mangngegmo ti nagan a Moises? Ti kadi . . .
ubing nga inlemmeng ni nanangna iti basket sa imbatina iti Karayan Nilo?
ubing a pinadakkel ti anak a babai ni Faraon iti nanam-ay a panagbiag ngem dina nalipatan nga isu ket maysa nga Israelita?
lalaki a nagbiag kas maysa a pastor idiay Midian iti 40 a tawen?
lalaki a nakisarita ken Jehovaa iti sango ti sumsumged a bassit a kayo?
lalaki a nakisarita iti ari ti Egipto a situtured a nangkiddaw a mawayawayaan dagiti Israelita manipud pannakaadipen?
lalaki nga indalan ti Dios a nangipakaammo iti Sangapulo a Saplit idi binusor ti ari ti Egipto ti pudno a Dios?
lalaki a nangidaulo kadagiti Israelita iti naisangsangayan nga ipapanawda manipud Egipto?
lalaki nga inusar ti Dios a nangbisngay iti Nalabaga a Baybay?
lalaki a nangtedan ti Dios iti Sangapulo a Bilin a para kadagiti Israelita?
MALAKSID kadagitoy, adu pay ti napasaran ni Moises. Di pakasdaawan a daytoy matalek a lalaki ket raraemen unay dagiti Kristiano, Judio, ken Muslim!
Nalawag a ‘naindaklan unay’ ni propeta Moises. (Deuteronomio 34:10-12) Impalubosna nga usaren ti Dios iti nakaskasdaaw a pamay-an. Ngem ordinario laeng a tao ni Moises. Kas ken propeta Elias, a nagparang a kadua ni Moises iti sirmata bayat ti ministerio ni Jesus ditoy daga, addaan ni Moises iti “rikna a kas kadatayo.” (Santiago 5:17; Mateo 17:1-9) Napasaran ni Moises ti adu a problema a mapaspasarantayo ita ken napagballigianna amin dagita.
Kayatmo kadi a maammuan no kasano? Usigem ti tallo a nagsayaat a galad nga impakita ni Moises ken no ania ti masursurotayo iti ulidanna.
a Jehova ti nagan ti Dios a naipakaammo iti Biblia.