Maseknan Kadi ti Dios Kenka?

Nainkalintegan kadi a namnamaen ni David a maseknan ti Dios kenkuana? Maseknan kadi ti Dios kenka? Adu ti saan a mamati nga interesado kadakuada ti mannakabalin-amin a Dios. Apay?

Ngamin, ti Dios ket natantan-ok a persona no idilig kadagiti tattao. No idilig iti natan-ok a saad ti Dios, ti intero a nasion “kaslada maysa a tedted manipud iti timba; ket naibilangda a kas iti naingpis a tapok kadagiti timbangan.” (Isaias 40:15) Nakuna pay ketdi ti maysa a di mamati iti Dios a mannurat iti kaaldawantayo nga “arapaap laeng ti panamati nga adda Dios a maseknan ken interesado kadagiti ar-aramidtayo.”

Kasta met, ipapan ti dadduma a saanda a maikari iti atension ti Dios gapu kadagiti ar-aramidda. Kas pagarigan, kinuna ti nataenganen a lalaki a ni Jim: “Kanayon nga ikarkararagko nga agtalna ti panunotko ken agteppelak, ngem makapungtotak met latta. Idi agangay, napanunotko a dakesak unayen, isu a saanakon a maikari iti tulong ti Dios.”

Adayo unay kadi ti Dios kadagiti tattao isu a dinatayo makita? Ania a talaga ti riknana kadagiti imperpekto a parsuana? No saan nga impakaammo ti Dios ti bagina, awan ti tao a makapagsao para kenkuana ken makasungbat kadagita a saludsod. Ngem ipasigurado kadatayo ti Biblia, ti impaisurat ti Dios a mensahena kadagiti tattao, nga Isu ket asideg ken maseknan kadagiti tattao. “Kinapudnona,” kuna ti Biblia, “saan nga adayo iti tunggal maysa kadatayo.” (Aramid 17:27) Iti sumaganad nga uppat nga artikulo, usigentayo ti kuna ti Dios maipapan iti pannakaseknanna iti tunggal maysa ken no kasanona nga impakita dayta kadagiti nasingpet a kas kenka.