SUNGBAT DAGITI SALUDSOD MAIPAPAN ITI BIBLIA
Amin kadi a relihion idaydayawda ti Dios?
No dumngegka iti damdamag iti lubong, nalabit madlawmo a no dadduma maar-aramid dagiti dakes gapu iti relihion. Saan nga amin a relihion ket nagtaud iti pudno a Dios. (Mateo 7:15) Wen, nayaw-awan ti adu a tattao.—Basaem ti 1 Juan 5:19.
Ngem makita ti Dios dagiti napasnek a tattao a mangay-ayat iti kinaimbag ken kinapudno. (Juan 4:23) Aw-awisen ti Dios dagita a tattao a mangammo iti kinapudno a linaon ti Saona, ti Biblia.—Basaem ti 1 Timoteo 2:3-5.
Kasanom a mailasin ti pudno a relihion?
Urnongen ni Jehova a Dios dagiti tattao manipud iti nadumaduma a relihion tapno isurona kadakuada ti kinapudno ken ti panagiinnayat. (Mikias 4:2, 3) Mailasinmo ngarud no pudno ti relihion ti maysa no maseknanda iti maysa ken maysa.—Basaem ti Juan 13:35.
Pagkaykaysaen ni Jehova a Dios ti amin a tao iti pudno a panagdayaw.—Salmo 133:1
Dagiti pudno nga agdaydayaw itunosda iti Biblia ti pammati ken wagas ti panagbiagda. (2 Timoteo 3:16) Idaydayawda met ti nagan ti Dios. (Salmo 83:18) Ikaskasabada ti Pagarian ti Dios kas ti kakaisuna a namnama ti sangatauan. (Daniel 2:44) Tultuladenda ni Jesus no ‘isilnagda ti silawda’ babaen ti panangaramidda iti naimbag kadagiti kaarrubada. (Mateo 5:16) No kasta, mailasinmo dagiti pudno a Kristiano babaen ti ipapanda iti balbalay dagiti tattao tapno ipakaammoda ti naimbag a damag ti Pagarian ti Dios.—Basaem ti Mateo 24:14; Aramid 5:42; 20:20.