Pagarian ti Dios​—Ania ti Ipaayna Kenka?

Kas naammuantayon iti immuna nga artikulo, nagpateg ti Pagarian ti Dios kadagiti Saksi ni Jehova. Mabalin nga interesadoka iti dadduma a nadakamat a bendision iti masanguanan nga ipaay ti Pagarian ti Dios. Ngem nalabit pampanunotem no talaga nga agpayso dagita a kari.

Nasaysayaat dayta ngem ti basta patiem ti amin a mangngegmo. (Proverbio 14:15) Dayta a panagannadmo ket mayasping iti inaramid dagiti taga-Berea.a Idi damo a nangngegda ti naimbag a damag iti Pagarian, pinatida ti nangngegda ngem saan a gapu ta kayatda laeng dayta. Imbes ketdi, inadalda a naimbag dagiti Kasuratan tapno maammuanda “no agpayso dagitoy a banag.” (Aramid 17:11) Kaipapananna nga indilig dagiti taga-Berea ti naimbag a damag a nangngegda iti ibagbaga ti Kasuratan. Idi agangay, napaneknekanda a talaga a naibatay iti Sao ti Dios ti naimbag a damag.

Parparegtaendakayo met dagiti Saksi ni Jehova a mangaramid iti kasta. Babaen ti libre a programa a panagadal iti Biblia, ikkandakayo ti gundaway dagiti Saksi ni Jehova a mangidilig iti isursuroda maipapan iti Pagarian ti Dios ken iti isursuro ti Biblia.

No agadalka iti Biblia, saanmo laeng a maammuan ti maipapan iti Pagarian ti Dios, no di ket masungbatan pay dagiti napapateg a saludsodmo.

• Nagtaudantayo?

• Ania ti panggep ti biag?

• Apay nga ipalpalubos ti Dios ti panagrigat?

• Ania ti mapasamak kadatayo no mataytayo?

• Madadaelto kadi ti daga?

• Ania ti tulbek ti naragsak a pamilia?

Kangrunaanna, sumingedka iti Dios no agadalka iti Biblia. (Santiago 4:8) Kas resultana, no nasingsingedka iti Dios, ad-adda a maammuam no ania dagiti naimbag a banag nga ipaay kenka ti Pagarian ti Dios, saan laeng nga ita no di ket iti agnanayon. Inkararag ni Jesus iti Amana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.