Maysa Laeng Kadi ni Satanas a Simbolo ti Kinadakes?

Nalaka nga ibaga a ni Satanas a mabasbasatayo iti Biblia ket simbolo laeng ti amin a kinadakes. Ngem dayta kadi a talaga ti isursuro ti Biblia? No wen, apay a kuna ti Biblia a nakisao ni Satanas ken ni Jesu-Kristo ken uray pay iti Mannakabalin-amin a Dios? Usigentayo ti dua a pagarigan dayta a panagsarita.

IDI NAKISARITA NI SATANAS KEN JESUS

Idi inrugi ni Jesus ti ministeriona, namitlo a pinadas ti Diablo a sulisogen. Umuna, inkagumaan ni Satanas a piliten ni Jesus a mangusar iti inted-Dios a pannakabalinna para iti bukodna a pagimbagan, tapno mapennek ti bisinna. Kalpasanna, sinugsogan ti Diablo ni Jesus a mangirisgo iti biagna tapno maiturong kenkuana ti atension dagiti tattao. Kamaudiananna, intukon ni Satanas ken Jesus ti panangituray iti amin a pagarian ditoy lubong kasukat ti panagruknoyna kas panagdayaw kenkuana. Pinagkedkedan ni Jesus ti namitlo a nasikap a panangallilaw ni Satanas babaen ti panagkotarna iti Kasuratan.​—Mateo 4:1-11; Lucas 4:1-13.

Asino ti kasarsarita ni Jesus? Ti kadi kinadakes iti unegna? Sigun iti Kasuratan, “nasuboken [ni Jesus] iti amin a bambanag kas kadatayo, ngem awanan basol.” (Hebreo 4:15) Kuna pay ti Biblia: “Saan a nakaaramid iti basol, awan met ti nasarakan nga allilaw iti ngiwatna.” (1 Pedro 2:22) Nagtalinaed ni Jesus a perpekto ken matalek. Saanna nga impalubos nga adda tumanor a kinadakes iti unegna. Nalawag a saan a nakisarita ni Jesus iti kinadakes iti unegna; agpaypayso a persona ti nakasaritana.

Ipakita dayta met laeng a pannakisarita nga adda sabali pay a pammaneknek a ni Satanas ket agpaypayso a persona.

• Laglagipem nga intukon ti Diablo ken Jesus ti panagturay iti intero a lubong kasukat ti maysa a tignay a panagdayaw. (Mateo 4:8, 9) Awan serserbi dayta a tukon no saan nga agpaypayso ni Satanas. Maysa pay, saan a kinuestion ni Jesus ti panangibaga ni Satanas nga isu ket addaan iti kasta kadakkel nga autoridad.

• Kalpasan a pinagkedkedan ni Jesus dagiti sulisog, “pimmanaw kenkuana [ti Diablo] agingga iti sabali pay a mainugot a tiempo.” (Lucas 4:13) Iti daytoy a kasasaad, maikunatayo kadi a ni Satanas ket maysa laeng a kinadakes wenno maysa a porsegido ken determinado a kabusor?

• Paliiwem ta “immay dagiti anghel ket nangrugida nga agserbi” ken Jesus. (Mateo 4:11) Pudpudno kadi nga espiritu a persona dagiti anghel a nangparegta ken nangtulong ken Jesus? Nalawag a wen. Apay koma ngarud nga ipapantayo a saan a pudpudno nga espiritu a persona ni Satanas?

IDI NAKISARITA NI SATANAS ITI DIOS

Ti maikadua a pagarigan ket maipapan ken Job, maysa a lalaki a managbuteng iti Dios. Dakamaten ti rekord a namindua a nagsarita ti Diablo ken ti Dios. Kadagita a panagsarita, pinadayawan ti Dios ti kinamatalek ni Job. Impapilit ni Satanas nga agserserbi laeng ni Job iti Dios gapu kadagiti managimbubukodan a rason, a pinagparangna a gatgatangen ti Dios ti kinasungdo ni Job. Kasla ibagbaga ti Diablo a mas am-ammona ni Job ngem iti pannakaam-ammo kenkuana ti Dios. Gapuna, impalubos ni Jehova a mapukaw dagiti sanikua ni Job, dagiti annakna, ken maaddaan iti sakit.a Idi agangay, napaneknekan nga umiso ni Jehova mainaig ken Job, ket ulbod ni Satanas. Binendisionan ti Dios ni Job gapu iti kinamatalekna.​—Job 1:6-12; 2:1-7.

Kadagita a panagsarita ti Dios ken ni Satanas, makisarsarita kadi ni Jehova iti kinadakes nga adda iti unegna? Kuna ti Biblia: “No maipapan iti pudno a Dios, perpekto ti dalanna.” (2 Samuel 22:31) Kuna pay ti Sao ti Dios: “Santo, santo, santo ni Jehova a Dios, ti Mannakabalin-amin.” (Apocalipsis 4:8) Ti sao a santo kaipapananna nasin-aw, sagrado, awanan basol. Perpekto ni Jehova ken awan pakapilawanna. Imposible a maaddaan iti kinadakes.

Ngem mabalin nga irason ti dadduma nga uray ni Job ket saan a pudpudno a persona, isu a simboliko laeng dayta a panagsarita. Lohikal kadi dayta nga argumento? Ipakita ti dadduma a teksto ti Biblia a pudpudno a persona ni Job. Kas pagarigan, nausar iti Santiago 5:7-11 ti ulidan ni Job a mangpabileg kadagiti Kristiano nga agibtur kadagiti pakarigatan ken mangipalagip a gunggonaan ni Jehova ti panagibturda. Ngem epektibo ngata koma dayta nga ulidan no saan met a pudpudno a persona ni Job ken parparbo laeng ti panangparigat kenkuana ni Satanas? Maysa pay, iti Ezequiel 14:14, 20, karaman ni Job kadagiti tallo a nalinteg a lallaki a kadua da Noe ken Daniel. Kas kada Noe ken Daniel, pudpudno a persona ni Job, maysa a lalaki a nabileg ti pammatina. No pudpudno ni Job, saan kadi a nainkalintegan laeng a pudpudno met daydiay nangidadanes kenkuana?

Nalawag nga ipakita ti Biblia a ni Satanas ket agpaypayso nga espiritu a persona. Mabalin ngarud a maisaludsodmo, ‘Agpegpeggadak kadi ken ti pamiliak iti daytoy a lubong?’

ITI PANAWENTAYO

Ipapantayo a bigla a simmangpet iti lugaryo ti maysa a grupo dagiti kriminal. Sigurado nga agpeggadka ken bumaba ti moral ti sangakaarrubaan. Ita, panunotem ti umasping a kasasaad: Naitapuak ditoy daga ni Satanas ken dagiti demoniona​—pudpudno nga espiritu a persona a nagrebelde iti Dios, kas ken Satanas. Ania ti resultana? Panunotem no ania ti mapalpaliiwmo kadagiti damdamag iti uneg ken ruar ti pagilian.

• Mapalpaliiwmo kadi a kumarkaro ti kinaranggas, iti laksid ti panangikagumaan ti intero a lubong a mangpasardeng kadagita?

• Mapalpaliiwmo kadi ti umad-adu a paglinglingayan a mangitamtampok iti espiritismo, uray iparparit dagita ti adu a nagannak?

• Mapalpaliiwmo kadi ti agtultuloy a pannakadadael ti aglawlaw iti laksid ti panagregget dagiti nasayaat ti panggepda a tattao a mangsalaknib iti dayta?

• Saan kadi nga ipamatmatna nga adda nakadakdakes iti kagimongan​—addada puersa a mangidurduron iti sangatauan iti pagdaksanna?

Paliiwem no asino ti ibaga ti Biblia a makin-utek iti agdama a kinadakes: “Naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana. . . . Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” (Apocalipsis 12:9, 12) Kalpasan a nausig dagiti ebidensia, kombinsido ti adu a tattao a ni Satanas ket maysa a napeggad nga espiritu a persona, nga aktibo a mangim-impluensia iti lubong a pagbibiagantayo.

Nalabit pampanunotem no kasanoka a masalakniban. Napateg dayta a pakaseknan. Mangted ti sumaganad nga artikulo iti sumagmamano a praktikal a tulong.