Ammoyo Kadi?

Kasano a nakapagtalinaed a kalmado ti adalan a ni Esteban idi naidadanes?

SISASANGO ni Esteban iti grupo dagiti nauyong a lallaki. Dagita a 71 nga ukom a miembro ti Sanhedrin, ti kangatuan a korte iti Israel, ket karaman kadagiti kaimpluensiaan a tattao iti intero a nasion. Pinagtitipon ida ti Nangato a Padi a ni Caifas, a nangidaulo iti korte idi nasentensiaan ni Jesus a matay sumagmamano a bulan sakbayna. (Mat. 26:57, 59; Ara. 6:8-12) Bayat nga agsasaruno nga inayabanda dagiti ulbod a testigo, nadlawda nga adda naidumduma ken Esteban—ti rupana ket “kasla rupa ti maysa nga anghel.”—Ara. 6:13-15.

Kasano a nakapagtalinaed a kalmado ni Esteban iti kasta a nakabutbuteng a situasion? Sakbay a siraranggas a naipan ni Esteban iti Sanhedrin, sipipinget nga agserserbi kadagiti kakabsat iti tulong ti nabileg nga espiritu ti Dios. (Ara. 6:3-7) Bayat ti pannakausigna, dayta met laeng nga espiritu ti nagtignay kenkuana, kas manangliwliwa ken manangipalagip. (Juan 14:16) Iti natured a depensa ni Esteban a nairekord iti Aramid kapitulo 7, impalagip kenkuana ti nasantuan nga espiritu ti dandani 20 wenno ad-adu pay a teksto manipud iti Hebreo a Kasuratan. (Juan 14:26) Ngem ad-adda a timmibker ti pammati ni Esteban idi nakitana ti sirmata a nakatakder ni Jesus iti makannawan ti Dios.—Ara. 7:54-56, 59, 60.

Posible nga addanto met tiempo a butbutngen wenno idadanesdatayo. (Juan 15:20) No regular nga adalentayo ti Sao ti Dios ken aktibotayo iti ministerio, ipalpalubostayo nga agtignay ti espiritu ni Jehova kadatayo. Maaddaantayto met iti pigsa a mangibtur iti ibubusor bayat nga agtaltalinaedtayo a kalmado.—1 Ped. 4:12-14.