Dagiti Baro a Nairuar a Tumulong Kadatayo nga Agwatwat iti Nadiosan a Debosion
1 Kas timmabunon iti kombension ti distrito, mas sipupuottayo itan iti panagkasapulantayo nga agwatwat iti nadiosan a debosion a kas ponteriatayo. (1 Tim. 4:7) Bayat nga isilnagtayo dagiti impormasion a naidatag iti programa ken ikagumaantayo nga iyaplikar iti bibiagtayo, maiyasidegtayo a mas nadekket ken Jehova iti pudno a panagdayaw.
2 Nupay kasta, ti panaginsayotayo iti nadiosan a debosion isut’ madegdegan bayat nga agprogresotayo a manggiling iti nabaknang nga impormasion nga adda kadagiti tallo a baro a nairuar a naawattayo idiay kombension ti distrito. Nabasayo kadin dagitoy?
BARO A BROSHUR
3 Ti makakombinse a Nainkasuratan nga argumento iti broshur a Rumbeng Aya a Patienyo ti Trinidad? isut’ tumulong kadatayo a saan laeng a mangipasdek a ti Trinidad ket maysa a palso a doktrina ngem kasta met nga ilawlawagna kadagiti sabsabali ti kinapudno maipapan iti Dios, ti Anakna, ken ti nasantuan nga espiritu.—1 Cor. 8:6.
SUNGBAT KADAGITI AGTUTUBO
4 Saantayo pay a nalipatan iti palawag idiay kombension ken ti espesial nga urnos iti nairuar a libro a Dagiti Saludsod nga lyimtuod ti Agtutubo—Dagiti Sungbat nga Epektibo. Nupay agpaay daytoy kadagiti agtutubo, dagiti nagannak, nangruna dagiti amma, ti nakiddaw nga usarenda daytoy a libro a mangsanay kadagiti annakda ken ‘iyegda ida iti disiplina ken makaiwanwan ti panunot ni Jehova.’—Efe. 6:4.
5 Agpadpada dagiti nagannak ken annak ti masapul a mangungpot iti daytoy tapno kabisadoda dagiti nasken nga impormasion nga impaay ti organisasion ni Jehova a tumulong kadagiti agtutubo nga agsanay iti nadiosan a debosion. Maaramid daytoy babaen ti napamiliaan a diskusion.
SAOT’ DIOS—SAAN A TAO
6 Ti Biblia—Saot’ Dios wenno Tao?, isut’ maysa a baro a libro a nairuar iti Sabado, ket nadisenio daytoy a tumulong kadagiti tattao a mangawat a ti Biblia ket impaltiing ti Dios. Tapno mausar nga epektibo, masapul a makabisadotayo a naimbag dagiti paspasetna tapno maitudotayo dagiti masinnunuo a puntos iti mismo a libro no usarentayo idiay tay-ak.
7 Anian a yamantayo amin ken Jehova gapu iti nabuslon ken naintiempuan a naespirituan a taraon a naawattayo manipud iti “Nadiosan Debosion” a Kombension ti Distrito! Usarentayo koma dagitoy a parabur a mangalagad iti nadiosan a debosion bayat a tulongan dagiti dadduma nga agbalinda met a managdayaw ken Jehova a Dios.