Nasakbay a Panagplano para iti Disiembre
1 Sakbay nga aktual nga irugi a ragpaten ti maysa a kalat, kasapulan nga agplanotayo. Kas pangarigan, mabalin a tarigagayantayo ti agbakasion nga iramanna ti itatabuno iti maysa a kombension. Mabalin a ramanenna ti panagplano a nasakbay tapno makamenos iti gastos, makaala kadagiti pagdagusan ken dadduma pay. Amin dagitoy a plano kasapulan unay no kayattayo a magun-odan ti kalattayo.—Prov. 21:5.
2 Umasping iti dayta, ti panagplano ket kasapulan tapno agballigitayo a makiraman iti serbisio a panag-auxiliary payunir. Pinullo a ribo kadagiti kakabsattayo a lallaki ken babbai iti intero a lubong al-alaenda a regular daytoy a paset ti serbisio ket sagsagrapenda dagiti adu a personal a gunggona. Dagiti sumaganad a suhestion mabalin a tumulongda kadakayo nga agplano a makiraman iti auxiliary payunir a serbisio, nalabit uray inton umay a bulanen.
3 Mangpili ti maysa a kumbiniente a panawen a maiyurnosyo ti maaddaan iti kadakkelan a tiempo a mabusbos iti tay-ak ti serbisio tapno maabotyo ti kalat a 60 oras. Mabalin nga iramanna daytoy ti panangusar ti sumagmamano a bakasionyo. Dagiti agtutubo iti eskuelaan mabalin nga usarenda ti panawen ti bakasionda nga ag-auxiliary payunir.
4 Dagiti bulan nga adda lima a ngudo ti lawlawasna gagangay a mangipaayda ti ad-adu a tiempo para iti ministerio iti tay-ak. Kitaenyo ta daytoy a Disiembre ket adda lima a naan-anay a ngudo ti lawasna. Makisarita kadagiti dadduma a mabalin nga adda tiempoda a makikadua kenka bilang payunir wenno agibumbunannag.—Prov. 20:18.
5 Mangaramid ti maysa a praktikal nga eskediol tapno mausarmo a nainsiriban ti panawenmo. Agplanoka tapno mabusbosmo ti kaadduan a panawenmo iti trabaho nga panagbalaybalay. Padasem met iti panangasaba ti rabii no adda pannakabalinna, ken makitunoska kadagiti urnos ti kongregasion iti panangasaba kabayatan ti lawas ken iti ngudo ti lawas. Ti panangsuporta ken panagtrabahom a kadua dagiti kakabsat a lallaki ken babbai ket makapatibker iti maysa ken maysa. Itultuloymo nga iyadani daytoy a banag ken Jehova babaen ti kararag. (Col. 4:2) Kiddawem ti panangtarabayna kabayatan nga ipalplanom ti maaddaan pannakiraman iti serbisio a panag-auxiliary payunir.
6 Adun dagiti nakaraman ti amin-tiempo a serbisio a nag-auxiliary payunirda nga immuna, ket daytoy ti nangparegta kadakuada nga agbalin a regular payunir. Tunggal aldaw iyasidegnatayo iti kaitungpalan dagiti nangayed a kari ni Jehova. Anian a bendision para kadagidiay a makabael a mangtagiragsak ti aniaman kadagitoy a porma ti amin-tiempo a serbisio! Agplanokayo a nasakbay para iti dayta, ket sapay koma ta ni Jehova ket bendisionanna dagiti regtayo.