Panangparang-ay iti Kaepektibotayo a Ministro
1 Idinto ta ti interes iti Pagarian isut’ umuna a mailugar iti biagtayo, kayattayo ti rumang-ay iti ministeriotayo. (Mar. 13:10) Uray kasano ti kabayagtayon a mangaskasaba, kayattayo pay laeng a maparang-ay iti kaepektibotayo a kas ministro. Kasanotayo a maaramid daytoy?
2 Adu dagiti adda iti propesional a tay-ak dagiti aramid ti agtultuloy a mangpasayaat iti pannakaammo ken laingda. Kas ministro, kasapulantayo met ti agregget a mangparang-ay iti abilidadtayo nga agaramid iti disipulo. Kumitatayo kadagiti presko nga idudupag a makaapelo iti amin a kita dagiti tattao.—Mat. 28:19, 20.
SANGUENYO TI KARIT
3 Itan ta pinaapura ni Jehova ti trabaho a panangurnong, mas masansan iti sarungkar kadagiti kaaruba. Gapu iti napaadu a trabaho, dagiti panangiparang nga epektibo idi ket saanen a makaapelo ita kadagiti tattao. Ti kalidad iti ministeriotayo ti masapul a maparang-ay.
4 Kasapulan a masalimetmetan iti positibo a kapanunotan tapno pudno a nalaingtayo iti trabaho. Ti naimbag a panangusar kadagiti praktikal a singasing idiay Hulio 15, 1988 a Pagwanawanan isut’ tumulong kadatayo iti daytoy. Kas ehemplo, idiay panid 16, parapo 6, ilawlawagna no kasano nga iyammo ti bagitayo iti makaay-ayo ken positibo a wagas idiay teritoria a gistay linawas a mawanas ken nalataktayon.
5 Natrabahoyo kadin ti teritoriayo iti direkta a panangitukon iti libre a panagadal ti Biblia iti pagtaengan? Nawanasyo kadin dagiti teritoria ti negosio? Posible aya ti panangasaba iti lansangan iti umiso a tiempo? Iti amin a pamuspusan, repasuenyo dagiti singasing a naited idiay Hulio 15, 1988 a Pagwanawanan. Ti panangalagad kadagita a singasing ti tumulong kadatayo a mangparang-ay iti kaepektibotayo a kas ministro.
6 Ti kinaepektibo ket ramanenna met iti kinakompleto. (Efe. 6:13) Nasiputkayo koma kadagiti lugar nga adda nasursurok ngem ti maysa a pamilia nga agnanaed iti balay. Dadduma kadagiti tattao ti agtataeng iti arisadsad ti apartment, wenno kadagiti lugar a saan a madanon manipud iti kangrunaan a pagserkan. Sarakenyo dagiti nagduduma a miembro ti pamilia—dagiti lallakay ken babbaket a gagangay a saanda a makasabat idiay ruangan wenno dagidiay napan iti trabaho bayat a simmarungkarkayo iti taengda. Nalabit a ti ipapanyo iti sabali nga oras, mabalin a masabetyo dagitoy a miembro ti pamilia.
ARAMIDENYO A KALATTAYO
7 Ti panangparang-ay iti kaepektibotayo isut’ maysa a maikari a kalat dagiti gistay amintayo. Alaenna ti napusuan a kararag ken abante a panagsagana. Bayat a rumang-ay ti kaepektibotayo, mabalinantayo met a tulongan dagiti dadduma a mangragpat iti kaaspingna a progreso.—Gal. 6:6.
8 Laglagipenyo, ti trabahotayo a panangisuro ket saan nga agngudo inton “dakkel a rigat.” (Mat. 24:21) Padpadaanantayo iti tawtawen a panangtulong kadagiti agungar tapno adalenda kadatayo iti daldalan ni Jehova. Babaen ti panangparang-ay ti kaepektibotayo itan, ad-adu ti mairingpastayo iti ministerio—iti daeg ken dayaw ni Jehova.