Panangpennek iti Espiritual a Kasapulanyo
1 Kinuna ni Jesus: “Naragsak dagidiay a sipupuot iti espiritual a kasapulanda.” (Mat. 5:3) Apay a nasken unay a sipupuottayo iti espiritual a kasapulan? Kasano a maipakita a sipupuottayo iti dayta?
2 Bayat nga agtultuloy ti maysa a tao nga agliway a maipaay iti pisikal a kasapulanna saanna a namnamaen a makaaramid pay iti de kalidad a trabaho iti kada aldaw. Agaplikar met dayta a prinsipio no agliwaytayo a mangtaraon iti bagbagitayo iti naespirituan.—Mat. 4:4; Juan 17:3.
GIMGIMONG A TUMULONG A MANGPENNEK ITI KASAPULAN
3 Kadagiti gimongtayo, “ti matalek ken naannad nga adipen” ket mangipapaay iti nagsayaat a naespirituan a potahe a mangpennek iti kasapulantayo. (Mat. 24:45-47) Agserbi ti kada gimong a maipaay iti masinnunuo a panggep, ket awan koma kadagitoy ti maliwayan.
4 Usigentayo ti apagbiit uray dagiti tallo laeng kadagiti lima a gimongtayo. Ti prinsipal a gimong a nadisenio a mangtarabay kadatayo nga umabante iti kinapudno isu ti panagadal iti Pagwanawanan. Ti Teokratiko a Pagadalan iti Ministerio ti makatulong kadatayo nga agbalin a propisiente a ministro. Ti Panagadal ti Libro iti Kongregasion ipaayna met iti natanang a panangadal iti nagduduma a suheto ti Biblia.
5 Agsagsaganakayo kadi a maipaay kadagiti gimong? Adda dadduma a padarawdawanda laeng iti material, a sidadaras nga ugedanda dagiti sungbat iti salsaludsod, ngem saanda a binasa dagiti naisitar a kasuratan. Agparang a kasla nakasaganada nga agkomento, ngem naalada ngata iti kananaman a sustansia ti taraon a magun-odan koma?
GATANGEN ITI TIEMPO
6 No itudingyo ti tiempo nga agsagana a maipaay kadagiti gimong, dikay koma palubosan ti telebision wenno dagiti saan unay a nasken nga ar-aramid a mangsinga kadakayo. Dagiti ulo ti pamilia, kangrunaan, masapul a tulonganda dagiti pamiliada nga agintek iti regular a programa iti panagadal ti Biblia, panagsagana a maipaay iti gimong, ken pannakiraman iti tay-ak ti ministerio. Masapul nga amin ket ‘gatangenda iti nagundawayan a tiempo’ babaen ti pananguna kadagiti espiritual a kasapulanda.—Efe. 5:15-17.