No Kasano a Makultibar iti Interes
1 Sigun iti maysa a diksionario ti “panangkultibar” kaipapananna iti panangisagana wenno panangtaraken a maipaay ti idadakkel. Ngem kaipapananna pay met iti panangparang-ay babaen ti bannog, taripato, wenno panagadal. Ti panagaramid iti disipulo isut’ maysa a nasken a panggep ti ministerio. (Mat. 28:19, 20) Gapuna, kasapulantayo ti agbannog iti trabaho a mangkultibar ti interes a masarakan iti tay-ak ti ministerio.
2 Ti masansan a sarungkar isut’ gagangay a kasapulan tapno mataraken iti espiritual a panagdakkel dagiti nasingpet ti panagpuspusoda. Ti nabunga a sarungkar isut’ mangiturong iti regular a panagadal ti Biblia.
3 Dagidiay laeng aya nangala iti literatura ti sarungkaranyo? Maysa a payunir a saan unay a nawadwad ti maipaimana a literatura iti umuna a sarungkar ti simmarungkar iti tunggal maysa a nagayyem. Ti naimbag a Nainkasuratan a diskusion mangted iti nasayaat a pamuon ti panagsarungkar.
4 Usaren Dagiti Tract a Pangirugi iti Panagadal ti Biblia iti Panagsarungkar: Dagiti nagduduma a suheto dagiti tract ket maiparbeng unay kadagitoy aldawtayo. Igunamgunamda iti panagkasapulan ti panangammo ken panangalagad iti Biblia.
Mabalinyo a kunaen:
◼ “Iti napalabas napagsaritaantayo no apay a mapagtalkantayo ti Biblia. Ania a kita ti masanguanan iti ibagbaga ti Biblia?” Irugi a basaen manipud maikadua a parapo iti panid 3 ti tract a Biag iti Maysa a Natalna a Baro a Lubong. Kitaenyo dagiti kasuratan. Maingudo babaen ti panangusig iti material idiay subtema a “Kasano a Posible Dayta para Kadakayo” iti panid 5.
5 Iti umasping a wagas, mabalinyo nga usaren daydiay tract a Aniat’ Namanama Kadagiti Ing-ingungoten a Natayen?
Mabalinyo a Kunaen:
◼ “Kas nausigtayo iti apagbiit idi napalabas, adu a tattao ti agkurang iti panagtalekda ti Dios. Kas ehemplo, isaludsodda, ‘No ti Dios ket mannakabalin, apay ngarud a palubosanna a matay dagiti tattao?’ Daytoy a tract ti tumulong a sumungbat iti dayta a saludsod.” Iturong idiay benneg a mangrugi iti maikapat a parapo idiay panid 2. Maited ti saludsod iti kada parapo, ken basaen dagiti kasuratan a saan a nakotar.
6 Itultuloy ti Panagadal: Babaen ti panangsurot iti metodo a naisingasing ditoy, nairugiyon ti panagadal iti Biblia ti pagtaengan. Tapno kanayonen nga agtultuloy ti diskusion, saludsodan iti bumalay: “Nadlawyo kadi a nasungbatan dagiti nagadu a saludsod iti sumagmamano laeng a minutos? Inton sumaganad a lawas mabalintayo nga iyatiddog ti tiempo nga agsao maipapan iti namnama ti panagungar.” Mabalinyo nga usaren ti uray maysa laeng kadagiti saludsod iti artikulo ti kada tiempo iti sarungkaryo. Inton maitutop a tiempo, mabalin a maiyallatiwen iti maysa a broshur wenno mairugi ti panagadal iti Agnanayon nga Agbiag a libro.
7 Anian a makapnek ti mangidaulo iti panagadal ti Biblia iti maysa a napudno a tao a managsapul ti kinapudno! Mabendisionantayo koma iti nabunga a ministerio babaen ti panangalagad kadagiti naited a singasing no kasano a makultibar iti masarakan nga interes.