Panangiladawan Kadagiti Broshur a Pangsarak Kadagiti Interesado
1 Nabileg nga instrumento dagiti broshur. Iti 32 laeng a pinanid, ti maysa a broshur ket sibibileg nga ipasdekna dagiti Nainkasuratan a kinapudno ken baliktadenna dagiti panagrason ken sursuro a maikontra iti pannakaammo ti Dios.—2 Cor. 10:5.
2 Kalpasan ti panangbasana iti broshur a Dagiti Saksi ni Jehova—Agkaykaysa a Mangar-aramid ti Pagayatan ti Dios iti Sangalubongan, maysa a tao ti nagsurat: “Diak pay nakakita ti kasta nga organisasion. . . . Nakaskasdaaw a masarakan dagiti tattao a seriosoda iti panagaramid ti pagayatan iti Dios kadagitoy a tiempo a nakaro unay ti relihioso a kinamanaginsisingpet.” Maysa a baglan a doktor idiay Africa ti nangadal iti broshur nga Tagiragsakenyo ti Biag nga Agnanayon Ditoy Daga! Ania ti epektona kenkuana? Insardengna ti kinabaglanna a doktor ken pinapanawna dagiti babbai a kabbalayna malaksid ti kaunaan nga asawana. Kalpasanna inkasarna a silelegal.
3 Ti broshur nga Rumbeng Aya a Patienyo ti Trinidad? isut’ epektibo nga instrumento ti kinapudno. Maysa a mannurat ti The Sunday Gleaner idiay Jamaica, nakunana maipapan iti dayta: “Ti publikasion . . . isut’ pambato dagiti Saksi ket itan awan ti Trinitariano a natalged. . . . Narigat unay iti daytoy a mannurat ti relihion a kitaen no kasano nga iti kalalainganna a miembro ti iglesia ket masungbatanna . . . dagiti argumento nga iyablat dagiti Saksi a maibusor iti panangmatmat a ni Jesus isut’ Dios.”
4 Usarenyo Ida a Nasayaat: Tapno epektibo, dagitoy a makaatrakar nga instrumento ti masapul a maipaima iti tattao a bumasa kadakuada. Idinto ta nagduduma dagiti broshurtayo, a tunggal maysa maipapan iti naiduma a tema, ikagumaantayo nga itukon ti maysa a patientayo nga isut’ maitutop unay iti maysa a tao a makasabaantayo. Ti panangammo kadagiti broshurtayo ken ti kaadda kadatayo iti nagduduma kadakuada ti mamaglaka kadatayo a mangusar kadakuada a naimbag, idiay tay-ak ti serbisio, iti pagtaengan, wenno uray sadino.
5 Kas ehemplo, no makisaotayo iti maysa a tao a mariribukan maipapan ti doktrina a Trinidad iti Kakristianuan wenno kadagidiay agkuna a ni Jesus isut’ Dios, ania a broshur ti usarenyo?
6 Mainayon iti panangammo no ania a broshur ti usarentayo, ikagumaan a paganaen iti raman ti tao maipapan iti linaonna. Itudoyo ti komento wenno ilustrasion a mangtignay iti interesna a mangbasa ti material. Wenno mabalin a basaenyo iti maysa wenno dua a parapo kenkuana, a kitaen dagiti naisitar a teksto, ken malawagan ti material. Adu a nasasayaat a panagadal ti Biblia iti nairugi babaen daytoy a wagas.
7 Mangted dagiti broshurtayo iti Nainkasuratan a sungbat ken imulana ti namnama kadagidiay nga agdung-aw ken agsennaay kadagiti makarimon a bambanag a maar-aramid ditoy lubong. (Maidilig iti Ezekiel 9:4.) Dagiti umasping iti karnero a tattao ti mangipangag iti mensahe a linaon dagiti kasta a literatura. Pribilehiotayo ti mangusar a naimbag kadagiti broshur bayat a saraken dagiti interesado a tattao.