Ganetgetan ti Agsapul Kadagiti Dumngeg a Lapayag
1 Adu a tattao a masabettayo iti panagbalaybalay a ministerio ti awanan iti espiritual a bambanag iti panunotda. Kupadoda kadagiti bukodda a problema. Tapno mairugi ti saritaan, masansan a kasayaatan a pagsaritaan dagiti bambanag a makapainteres kadagiti adu iti dayta a lugar. Mabalin a mausar dagiti saludsod a pangriing ti interes. Dagiti punto de bista a salsaludsod a saan a makasubkar kadagiti tattao ti kaepektibuan.
2 Makasarakkayo iti dumngeg a lapayag babaen ti panangusar iti idudupag a kaasping daytoy:
◼ “Naimbag a bigatyo. Ti naganko ket _____. Agnanaedak laeng ditoy sangakaarubaan. Adu ti nakasaritak iti daytoy nga agsapa a maseknan maipapan iti [madakamat ti aniaman a kallabes a sangakaarubaan a damag wenno pasamak a pakaseknan iti lokal]. Ti pagarupyo pinanggep ngata iti Dios a kastoy daytoy lubong?” Palubosan a sumungbat. Iti daytoy a punto ti tract a Biag iti Maysa a Natalna a Baro a Lubong ti mabalin a maiparang. Usigen ti apagbiit iti ilustrasion idiay panid 1 ken ti salaysay iti parapo 1-3 kas ipalubos ti tiempo. No maipasdek ti interes, ti libro nga Agbiag nga Agnanayon ti mabalin a maitukon. Mabalin nga iyawis ti asikaso iti Salmo 37:9, 10 kas nakotar iti panid 157 ket basaen dayta iti libro. No usaren ti ladawan iti pinanid 156-7, mailawlawag ti nalinteg a kasasaad a maaddanto iti intero a daga inton awanen ti kinadakes.
3 Nakasaganakayo koma a kanayon a mangitukon iti Ti Pagwanawanan ken Agriingkayo! Aglagaw dagiti tattao iti uray sadino maipapan ti panagrakaya ti moral. Bayat a basaenyo ti Setiembre 8 nga Agriingkayo!, pidutenyo dagiti sumagmamano a puntos a mariknayo a mangtignay ti interes kadagiti tattao iti teritoriayo. Agsaokayo a positibo maipapan iti pagimbagan ti panangalagad iti pammagbaga ti Sao iti Dios. Iti arinunos ti bulan, inton itukonyo iti Setiembre 22 nga Agriingkayo!, iyawisyo ti asikaso iti artikulo a mangilawlawag iti balakad ti Biblia a mangapektar kadatayo. Dagiti agdama ken daan a ruar iti Ti Pagwanawanan ken Agriingkayo! ti mabalain a maiparang iti uray ania a tiempo a mainayon kadagiti espesial nga aldaw a naituding a panagmagasina.
4 Laglagipenyo a ti panggeptayo isu ti panangtukay iti interes maipapan ti mensahe ti Pagarian. Tapno maaramid daytoy masapul nga umuna a maala iti asikaso ti bumalay ken tignayen nga agpanunot. Daytoy ti mamataud kadagiti marakarnero a tattao nga agmayat a lalo pay a dumngeg maipapan ti panggep ni Jehova iti sangatauan.—Sal. 85:8.