Panagsubli a Tumulong iti Tattao a Mangadal No Kasanoda nga Agbiag ti Agnanayon
1 Manipud pay idi nairuar iti libro nga Agbiag nga Agnanayon, nasuroken a 65 a milion a kopia ti napartuat iti 115 a pagsasao. Adu dagiti ad-adipen itan ni Jehova ti nakaadal iti pamunganayan a kinapudno iti Biblia babaen daytoy a nagsayaat nga instrumento. Iti daytoy bulan ti Nobiembre, adda gundawaytayo a mangipaima iti daytoy a katulongan ti Biblia.
2 Panagsarungkar Kadagidiay Addaanen ti Libro: Dadduma kadagiti agibumbunannag ti addaan iti naimbag a resulta ti panangiyawis iti asikaso idiay benneg [listaan] dagiti linaonna ken sinaludsodda iti interesado a tao no ania a suheto ti nasarakanna a makapainteres unay kenkuana. No ti bumalay ket nakapili iti maysa a suheto, maisingasing a basaenna dayta a kapitulo ti libro sakbay iti sumaruno a bisita.
3 Agingga ti mabalin, mangaramidtayo ti depinido a katulagan iti panagsarungkar. Sakbay iti sarungkar kayattayo ti agsagana a malawagan iti sumagmamano a parapo idiay kapitulo a napili ti bumalay. No awan ti mapilina, mabalin a mairugiyo a mapagsaritaan ti kapitulo 1. Kalpasan a mausig iti sumagmamano a parapo, mamataudtayo ti saludsod a mawanas kadagiti sumaruno a parapo. Agserbi daytoy a kas pagbatayan a bato nga umallatiw iti sumaruno a sarungkar, inton maituloy ti panagadal iti libro nga Agbiag nga Agnanayon.
4 Siempre, no ti bumalay ket adda saludsodna, kasayaatan no mausig dagitoy nga umuna. Kaaduan kadagitoy a saludsod ti masungbatan a mismo iti daytoy a libro. Babaen ti panangkabisado iti linaon ti libro, mabalintayo a maiturong kadagiti tumutop a parapo ken usaren iti material a pangsungbat kadagiti tumaud a saludsod.
5 Panagsarungkar Kadagidiay Nabatian iti Tract: Nalabit a nakaibatitayo iti bumalay ti maysa a kopia iti tract a Natalna a Baro a Lubong. No sarungkarantayo, mabalin a malawlawagan dagiti panglukat a parapo ti tract.
No ti bumalay ipakitana ti pudno nga interes, no dumtengtayo iti ngudo ti umuna a parapo iti panid 3, a nakakotaran ti Salmo 37:29, mabalintayo a kunaen:
◼ “Dagidiay a sasao ti mangilawlawag no ania iti naisalaysay ditoy publikasion a, Mabalinyo ti Agbiag nga Agnanayon iti Paraiso a Daga. Siputanyo ti kapanunotan ditoy parapo 3 iti kapitulo 1 ti baba iti paulo nga ‘Apay a Mabalintay a Patien.’” Kalpasanna mabalintayon a basaen ti parapo 4 ken 5 iti isu met laeng a wagas. Sa kunaentayo: “Apay a ti kasasaad ita ket saan a maitunos iti pinanggep ti Dios? Ti sumaruno a sumagmamano a parapo ti mangilawlawag iti dayta, ket kayatko ti agsubli iti sumaruno a lawas iti isu met laeng nga oras ket sungbatak dayta a saludsod nga agpaay kadakayo.” No ti bumalay ket nangipakita iti interes, mabalin a kayattayo nga itukon daytoy a libro iti dayta a kanito. Wenno maikeddengtayo nga aramiden dayta inton ngudo ti sumaruno a diskusiontayo.
6 No itukon ti “Agbiag nga Agnanayon” a libro, mabalin a kunaentayo:
◼ “Masiguradok a pagragsakanyo iti kaadda ti bukodyo a kopia iti daytoy a publikasion. Iti kasta mabalinyo ti agbasa a nasakbay ket ad-adu ti magun-odyo sakbay iti sumaruno a diskusiontayo.” No ti bumalay ket umannugot a mangala iti libro, no kasta maitukon dayta babaen ti gagangay a kontribusionna.
7 Inwardas ni Jesus dagiti pasurotna nga isuroda dagiti sabsabali a kas iti pannakaisuroda. Ikararagtayo ken Jehova a mangibaon pay iti ad-adu a managobra. Iti kasta, aramidentayo ti pasettayo a mangsarak kadagiti interesado a tattao ken suruan ida a kas katrabaho iti paganian.—Mat. 9:37; 28:19, 20.