Saludsod
◼ Kasano a mataming dagiti bambanag no ipilit ti maysa a bumalay a saanen a mapan dagiti Saksi ni Jehova iti pagtaenganda?
No adda karatula iti ruangan a masinunuo a mangiparit kadagiti Saksi ni Jehova, masapul a raemen ti tarigagayda ket liklikan iti panagkatok iti dayta a ruangan.
Makita no dadduma dagiti naipaskil a mangiparit iti aglako ken agsolisitar wenno agdawat. Idinto ta maysa a naasi a relihioso a trabaho ti ar-aramidentayo, saan nga agaplikar dayta kadatayo. Maitutop nga ituloytayo ti kumatok kadagita a ruangan. No agkedked ti bumalay, sitataktika nga ilawlawag no apay a riknaentayo a dayta a pakdaar ket saan nga aplikado kadatayo. No ti bumalay ket ilawlawagna a dayta a panangiparit ken iramanna dagiti Saksi ni Jehova, raementayo ti kiddawna.
No agtrabahotayo iti teritoria, mabalin a makaunget ti bumalay ket ipilitna a saantayon a mapmapan kenkuana. No agkitakit a makirinnason iti dayta a banag no apay, patgantayo ti dawatna. Maysa a napetsaan a nota ti maikabil iti sobre ti teritoria tapno dagiti agibumbunannag a mangtrabaho iti teritoria iti masakbayan ket malisianda a sarungkaran dayta a pagtaengan.
Masapul a laglagipentayo, nupay kasta, a dagita a pagtaengan ket saan nga agnanayon a lisiantayo. Nalabit nga ti agdama nga agnanaed ket immakaren. Mabalin a masarakantayo a dagiti dadduma a miembro ti pamilia ket dumngegda. Adda posibilidad a ti bumalay a nakasaotayo idi ket nagbalbaliwen ket kayatnan ti masarungkaran. Kalpasan ngarud ti umdas a tiempo mabalintayo ti agsaludsod kadagiti agtataeng tapno maikeddeng ti agdama a riknada.
Ti pagipempenan iti teritoria ti masapul a marepaso iti maminsan ti makatawen, nga ilista dagiti pagtaengan a nagkiddaw kadatayo a saantayon a papanan. Babaen ti panangiwanwan iti manangaywan ti serbisio, sumagmamano kadagiti eksperiensiado nga agibumbunannag ti madutokan a sumarungkar kadagitoy a pagtaengan. Kunaenda a simmarungkarda ta kayatda nga ammuen no dagidiay dati a bumalay ti adda pay laeng sadiay. No adda nasayaat a panangsungbat, mabalin a maaramid ti gagangay nga ipapan manen. Ngem no ti bumalay ket agtultuloy nga umingar, saan koma a masarungkaran agingga iti sumaruno a tawen.