Panangsarak Kadagiti Interesado babaen ti Epektibo a Panangasaba iti Lansangan
1 Inwanwan ni Jesus dagiti disipulona a sarakenda dagidiay maikari a dumngeg iti naimbag a damag ti Pagarian. (Mat. 10:11) Ngem ita, kadagiti adu a lugar, rumigaten a maranaan dagiti tattao iti pagtaenganda. Gapuna, ania ti maaramid tapno makasao dagidiay saan a madandanon?
2 Ti panangasaba iti lansangan isut’ epektibo a pamay-an tapno masarakan dagidiay saan a madandanon iti panagbalaybalay a trabaho. Maaramidtayo ti panangasaba iti lansangan kadagiti pagsardengan ti lugan, iti arubayan dagiti nabakudan nga apartment, dagiti parke ti publiko, ken dadduma a lugar a pagdadaponan dagiti tattao iti inaldaw nga ar-aramidda.
3 No madakamat ti panangasaba iti lansangan, adda dadduma nga agtukkiad. Agkedkedda a makiraman iti dayta a trabaho agsipud ta mabainda wenno amangan no umingar kano dagiti tattao. Dagita a pagdanagan ket awan basaranda. Dagidiay napnuan kapadasan iti daytoy nga aktibidad ti nangipadamag a mas narigrigat ti mangasaba iti ruruangan. Kinapudnona, nasarakanda a kaaduan a tattao ti sidadaan a makisao kadakuada ngem no agkatokda iti ruanganda. No ngarud ta ‘makaurnongtayo ti tured,’ masdaawtayto iti naimbag a resulta a magun-odantayo.—1 Tes. 2:2.
4 Kasano a maaramid ti panangasaba iti lansangan a sieepektibo? Nasken ti panagsagana a naimbag. Basaen iti nasakbay a tiempo dagiti magasin, ken pilien iti maysa wenno dua a mapagsaritaan a puntos a mariknayo a paginteresan dagiti tattao. Umdasen ti 30 segundo a panangiparang. Pilien ti lugar a masansan a paglabasan dagiti tattao. Nupay kasapulan nga adda sabali nga agibumbunannag iti sibay, masansan a kasayaatan ti agwaywayas nga agtrabaho. No agabay nga agtakder dagiti agibumbunannag adda panagannayasna nga agsaritada ket saanda a masiputan dagidiay adda iti publiko a nalabit a sidadaan a dumngeg iti damag ti Pagarian.
5 Ti panagtakder iti maysa a disso a nakaplastar latta dagiti magasin ket saan unay nga epektibo a kas iti mismo nga iyaasideg iti maysa a tao. Masapul a nabara ken naingayyemankayo bayat nga ikagumaanyo a rugian ti pannakisao. Iti dadduma a kaso, masapul a magnakayo a makikuyog iti maysa a tao bayat a makisaokayo kenkuana. No mangipangag, itukonyo dagiti magasin. No pagkedkedanna, itukonyo ti maysa a tract.
6 Gagangay a kasayaatan ti agsagana iti ababa a saludsod ken sasao a mangpatanor ti interes. No adda interes, ikagumaanyo nga alaen ti nagan, direksion, ken nalabit uray numero ti telepono dayta a tao tapno masaruno ti interesna. Mabalinyo a kunaen: “No kayatyo ti makaadal pay iti ad-adu, ragsakek ti sumarungkar kadakayo wenno mangurnos ti sabali a Saksi a mangaramid iti daytoy.”
7 Maysa a panglakayen a nangasaba iti lansangan ti immasideg iti maysa a babai ket naammuanna nga awan pay a pulos kadagiti Saksi ti nakasaona idiay balayda. Nangala ti libro ken kimmanunong nga adda maysa a kabsat a babai a sumarungkar idiay pagtaenganda iti nawaya a tiempo. Adu pay dagiti maikari a tattao a sigurado a masarakan ken matulongan no epektibotayo iti panangasaba ti lansangan.—Ara. 17:17.