Kasapulan Dagiti Agtutubo ti Naimbag nga Ehemplo
1 Agragsaktayo ti kaadda kadatayo iti umad-adu a bilang dagiti agtutubo a ‘mangidaydayaw iti nagan ni Jehova.’ (Sal. 148:12, 13) Adu kadakuada ti ubbing iti edad. Maikeddeng a nangnangruna ti progresoda babaen ti panangsanay ken ehemplo dagiti nagannakda ken dagiti dadduma iti kongregasion. Saan koma a malab-awan, nupay kasta, ti impluensia dagiti dadduma nga agtutubo, nangruna dagiti agtawenen ti sangapulo ket siam agpababa. No addakayo iti daytoy a grupo ti edad, dagitoy a komento ti makagunggona kadakayo.
2 Dagiti agtutubo nga agedad ti dose agpababa ti naannayas a tumulad kadagiti agedad ti trese agpangato. Addaanda ti gagangay a tarigagay a pumada kadagiti kakuyog a raraemenda. Adda turongda a kumita kadagiti agtutubo a natataengan ngem isuda ken patienda nga ad-adu ti ammoda. Kas resulta, tuladenda iti sasao ken konduktayo agraman panangipategyo iti naespirituan a bambanag.
3 Kas natataengan nga agtutubo, addaankayo ti nadagsen a responsabilidad. Itan a mismo, ti ulidanyo ti nalabit a makaimpluensia kadagiti ub-ubing a kakuyogyo. Saludsodam ti bagim, ‘Ania a kita ti impluensia ti imulmulak kadagiti agtutubo? Maysaak kadi a serioso iti panunot, a liklikak dagiti minamaag ken “kadagiti tarigagay a naikasigudan iti kina-agtutubo”? Ipakpakitak kadi ti panagtulnog ken panagraem kadagiti nagannak, panglakayen, ken dagiti sabsabali?’ (2 Tim. 2:22; Col. 3:20) No ania ti sawen ken aramidenyo isut’ dakkel nga impluensia iti espiritual a progreso dagiti ub-ubbing nga agtutubo a makapaliiw kadakayo.
4 Ti regular a pannakipasetyo iti panangikasaba ti naimbag a damag ti mamaregta kadagiti katimpuyogyo a mas agaktibo. No kabaelanyo ti sumrek iti payunir a serbisio, dagiti gagayyemyo ti matignay a mangaramid met iti dayta. Ti panagkomento iti gimong ken panagboluntario ti aniaman a trabaho iti Kingdom Hall ti makaited met iti naimbag nga ehemplo kadakuada.
5 Dakayo nga agtutubo ti makaalagad iti balakad ken Timoteo: “Kadagiti matalek agbalinka a pagulidanan iti panagsao, iti kababalin, iti ayat, iti pammati, iti kinadalus.” (1 Tim. 4:12) Ti kinarayrayyo a makipaset iti serbisio ni Jehova ti mangtignay kadagiti agtutubo a makaimatang kadakayo iti positibo a wagas, a tulonganyo ida nga agprogreso iti panagbalinda a nataengan ti espiritual a tattao. (Efe. 4:13) Dagiti agtutubo a karrugi pay laeng iti panagadal dagiti pamiliada ti maguyugoy iti kinapudno babaen ti ehemployo.
6 Kangrunaan unay, ti panangidemostrayo iti nadiosan a kalidad ti mangyeg iti dayaw ken Jehova ken ti organisasionna. (Prov. 27:11) Dagiti napudno a managpaliiw ti agsiddaaw iti pannakaidumayo kadagiti agtutubo ditoy lubong. Gapuna nga adda nagpaiduma a gundawayyo a tumulong iti agtutubo bayat a makaipaaykayo iti napateg a tulong a maipaay ti dayaw ni Jehova.—Sal. 71:17.