Dagiti Broshur—Napateg a Ramramit iti Ministerio
1 Ti maysa a nalaing a trabahador addaan iti nagduduma a ramramit, a tunggal maysa nadisenio iti masinunuo a panggep. Kas manangiwaragawag iti Pagarian, addaantayo iti nagduduma a broshur a tumulong kadatayo a silalaing iti trabaho. (Prov. 22:29) Iti maysa a ruangan mabalin a masabetyo ti maysa a malmaldaang. Iti sabali mabalin a ti bumalay ket il-iliwenna iti maysa a mapiar a gobierno, bayat a ti sabali pay ket agduadua no ania iti panggep ti biag. Kasanotayo a mausar dagiti broshurtayo a tumulong kadagitoy a tattao?
2 No itukon ti broshur a “Pudno Aya a Maseknan ti Dios Kadatayo?,” mabalinyo a kunaen ti kastoy:
◼ “Naigagangay iti dadduma a tattao a pabasolenda ti Dios iti panagsagaba ken kaawan hustisia ditoy lubong. Agrasonda a gapu ta ti Dios ket mannakabalin amin, maingudona ti panagsagaba no pudno a maseknan kadatayo. Kasano ti panagriknayo iti dayta? [Palubosan a sumungbat.] Ipakita ti Salmo 72:12-14 a maseknan ti Dios kadatayo. Ti panagsagaba ken kaawan hustisia ket saanna ida a basol. Inkarina a dagiti managdakdakes ket magupeddan iti mabiit. Daytoy broshur a, Pudno Aya a Maseknan ti Dios Kadatayo?, ipakitana no ania ti aramidenna ken no kasanotayo a magunggonaan.” Mabalinyo a maitultuloy ti diskusion babaen dagiti komento idiay panid 27, parapo 22.
3 No usarenyo ti “Panggep ti Biag” a broshur, nalabit a kayatyo a rugian ti kastoy:
◼ “Gistay tunggal maysa ket agduadua maipapan iti panggep ti biag. Agpaut laeng kadi iti 70 wenno 80 a tawen ket mapanen iti tanem? Wenno adda pay mas ad-adu iti biag? Ania ti makunayo? [Palubosan a sumungbat.] Ditoy Salmo 37:29, makita iti nagpintas a panggep ti Dios a maipaay iti tao ditoy daga.” Basaen ti teksto, sa iturong iti ilustrasion idiay panid 31, ket maituloy ti diskusion.
4 Ti “Adtoy!” a broshur ti maiyammo babaen iti panangbistrad ti intero nga ilustrasion iti akkub ken saludsoden:
◼ “Ania ti pagarupyo a masapul nga aramiden tapno agbalin a kastoy ti langa daytoy daga? [Palubosan a sumungbat.] Nasarakan dagiti natauan a gobierno nga imposible a maiyegda iti kasta a lubong. Nupay kasta, ipasiguro ti Biblia a ti Dios ket ‘aramidennna amin a bambanag a baro.’ [Iturong iti panid 30, ken basaen ti Apocalipsis 21:3, 4.] Daytoy a broshur ti tumulong kadakayo a mangadal no ania ti kasapulan nga aramiden tapno agbiagkayo iti dayta baro a lubong.” Iturong iti panid 3, ken idemostra no kasano a maikondukta ti panagadal ti Biblia.
5 Mabalinyo nga usaren daytoy nga iyaasideg babaen ti “Biag Ditoy Daga” a broshur:
◼ “Adu a tattao ti agpanunot a mapanda idiay langit tapno masagrapda ti agnanayon a biag, ngem ania ti makunayo maipapan iti panagbiag nga agnanayon ditoy daga? [Palubosan a sumungbat.] Ibaga kadatayo ti Biblia no kasano a magun-odan iti agnanayon a biag.” Basaen ti Juan 17:3. Kalpasanna ipakita iti bumalay ti ilustrasion #49, ken isaludsod: “Kasano ti panagkayatyo nga agbiag iti kastoy a lubong?” Itukon ti broshur, maiyurnos ti sarungkar.
6 Dagiti broshur ket dakamatenda dagiti naintiempuan a suheto, sungbatanda ti saludsod dagiti tattao, ken mangtedda ti liwliwa. Ti panangusar kadagitoy a ramramit a silalaing, matulongantayo dagiti napudno a tattao a “dumtengda iti umiso a pannakaammo iti kinapudno.”—1 Tim. 2:4.