Saludsod
◼ Kasanotay a makaited iti epektibo unay a komento kadagiti gimong?
Segseggaantay dagiti linawas a gimong ti kongregasiontayo. Sadiay addaantay iti gundaway a mangyebkas ti pammatitayo babaen ti panagkomento. (Prov. 20:15; Heb. 10:23, 24) Masapul a matmatantayo ti panagkomento a kas pribilehio ket ikagumaantay ti makiraman a regular. Kasanotayo a maaramid daytoy a sieepektibo. Ti panagsagana isut’ umuna nga addang. Nasken ti nasakbay a panangbasa iti material. Ikagumaanyo a tarusan no ania daydiay naidatag. Nupay ti suheto ket nalabit a naisalaysayen iti napalabas, siputanyo ti aniaman a kanayonan a punto a maiparang. No mangisaganakay ti komento manipud maysa a publikasion a naglaon iti nauneg a panangadal iti libro ti Biblia, kas iti Tampok ti Apocalipsis a libro, ikagumaanyo a kitaen no kasano a ti partikular a bersikulo ket naisinggalut kadagiti kanaig a bersikulo. Ti panangsurot kadagitoy a singasing parayrayenna ti abilidadyo nga agpanunot. Tulongannakay nga agisagana kadagiti nasayaat a komento ket masarakanyo ti rag-o iti pannakipasetyo. Dagiti kasayaatan a komento ket ababa, simple, ken naibasar iti publikasion a maad-adal. Ti umuna nga agkomento masapul a sungbatanna ti saludsod a direkta, nga ibatina dagiti dadduma a punto agpaay iti kanayonan a komento. Liklikanyo dagiti atiddog a palikawlikaw a komento. Yebkasyo ti bagbagiyo iti bukodyo a sasao, imbes a basaen ti komentoyo a sao por sao manipud iti publikasion. Mabalin nga iraman iti dadduma a komento dagiti punto a nasaklaw kadagiti naisitar a Kasuratan. Denggenyo a nalaing no ania ti masao dagiti dadduma tapno maliklikanyo ti aniaman a di kasapulan a panangulit.
Nasayaat no itayagyo ti imayo iti adu a daras ngem saan nga iti kada parapo. Awisentayo dagiti agtutubo a makiraman nga agkomento. No agkedkedkayo nga agsao, ipasakbayyo iti konduktor no ania a parapo ti kayatyo a komentuan, ket nalabit ikkannakayto iti gundaway a mangaramid iti dayta.
Ikagumaantay koma amin ti makiraman kadagiti gimong ti kongregasion a mangsaklaw ti pannakipaset dagiti dumdumngeg. Laglagipenyo, ti balligi dagita a gimong ket agpannuray a nangnangruna iti kinatulok ken kinaepektibotayo nga agkomento.—Sal. 26:12.