Agsarungkar a Maipaay iti Nabunga a Ministerio
1 Pinadayawan ni apostol Pablo dagiti taga Filipos gapu ta ‘napasublida ti panunotda a maipaay kenkuana.’ (Fil. 4:10) No iyaplikartayo ti ehemploda iti tay-ak ti ministerio, ‘mapasubli ti panunottayo’ a maipaay kadagidiay nakasabaanen ket matignaytayo nga agsarungkar kadakuada.
2 No naipaimayo ti broshur a “Ti Gobierno a Mangiyegto ti Paraiso,” mabalinyo a kunaen ti kastoy:
◼ “Pinampanunotko daydi panagsaritatayo idi naminsan nga aldaw. Nalabit a malagipyo a nagsaotayo maipapan iti Dios nga isunton ti agturay ditoy daga. Iti Biblia, inkari ni Jehova a Dios a maaramidto daytoy. [Basaen ti Daniel 2:44.] Patienyo kadi a pudno a mapasamak daytoy? [Palubosan a sumungbat.] Denggenyo ti kuna ti Dios maipapan iti pannakatungpal dagiti karina. [Basaen ti Isaias 55:11.] Ngem kaanonto a tungpalen ti Dios ti karkarina?” Ilawlawagyo a sungbatanyonto dayta a saludsod iti sumaruno nga isasarungkaryo.
3 Mabalinyo nga usaren daytoy nga iyaasideg no agsarungkarkayo iti tao a nangala ti broshur a “No Adda Matay nga Ay-ayatenyo”:
◼“Inkagumaak ti nagsubli, maigapu iti nagsaritaantayo maipapan iti ipupusay ti maysa a tao.” Ipakita ti ilustrasion iti panid 30 bayat a kunaen: “Malagipyo kadi daytoy naragsak a buya dagiti tattao a napagungar ken naitimpuyog manen kadagiti ingungotenda? Sinaludsodko idi no sadino a mapasamak daytoy, idiay langit wenno ditoy daga. Nalabit nasarakanyon ti sungbat ti Biblia iti panid 26 iti daytoy a broshur.” Pagsaritaan dagiti kangrunaan a punto iti maikatlo aginggat’ maikalima a parapo, sa basaen ti Juan 5:21, 28, 29.
4 Nakairugikayo kadin iti panangyadal iti “Adtoy! Pagbalinek Dagiti Isuamin a Bambanag a Baro”? Iti panagsarungkar, mabalinyo nga aramiden daytoy:
◼ Iturong manen iti panid 30, ket ipakita ti saludsod: “Iti ania a pamay-an a naisangsangayan ti Biblia?” Ukagen iti pinanid 3 ken 4, sa repasuen ti parapo 1-4 agraman ti ilustrasion iti akkub. Basaen ti maysa wenno dua a kasuratan a naisitar iti footnote ti parapo 4. Ilawlawag a ti Biblia isut’ kakaisuna a libro a mangitukon iti kasta a nakaskasdaaw a namnama. Iyurnos ti sumaruno a panagsarungkaryo.
5 Mabalinyo nga itultuloy a pagsaritaan [ti broshur a] “Ti Nasantuan a Nagan nga Agtalinaed iti Agnanayon” a kastoy:
◼ “Idi napalabas, impakitak kadakayo ti nagan ti Dios iti Biblia. Nasken a paset iti panagdayawtayo ti panangammo ken panangusar iti nagan a Jehova.” Luktan ti panid 31, repasuen dagiti punto kadagiti maudi nga uppat a parapo, sa basaen ti Juan 17:3 ken Mikias 4:5. Ilawlawag ti urnostayo a panagadal ti Biblia.
6 Gapuna, biagen ti panunotyo a maipaay kadagidiay a nakasaritayon. Pingetanyo ti agsubli, ken agsaganakayo iti aniaman a makagunggona nga iranud. Mabalin a maysakayo kadagidiay “pudno nga agbunga” iti panagaramid kadagiti adalan.—Mat. 13:23.