Nakristianuan a Kababalin iti Pagadalan
1 No maysakayo a Kristiano nga agtutubo a madama pay la nga ages-eskuela, kasapulanyo ti natibker a pammati tapno masalimetmetan ti kinatarnawyo. Nasken nga iyaplikaryo ti balakad ni Pedro a “taginayonenyo a nasayaat ti kababalinyo iti tengnga dagiti nasion, tapno . . . dayawenda koma ti Dios . . . kas bunga ti nasayaat nga ar-aramidyo a masaksianda.” (1 Ped. 2:12) Kasapulanyo ti tured tapno mapagballigianyo daytoy a karit.
2 Iti uneg ken ruar ti pagadalan, nalikmutkayo kadagiti sulisog iti panagdenna sakbay ti kasar, naalas a pagsasao, panagsigarilio, ken panangabuso iti droga. Inaldaw a mapasanguankayo kadagiti sulisog a mabalin a mangtulaw iti naimbag a kababalinyo. Kas kadagiti adulto, masapul a “makidangadangkay a sipipinget a maipaay iti pammati” tapno maibturanyo dagita a pakasuotan.—Judas 3; kitaenyo ti Hulio 15, 1991, Pagwanawanan, pinanid 23-6.
3 Iti pagadalan, addada patriotiko a seremonia ken nailubongan a pipiesta. No rumsua ti makakarit a kasasaad, “salimetmetanyo [kadi] ti naimbag a konsiensia, tapno. . . mabainanda isuda nga agsasao buyogen ti panangtagibassit iti naimbag a kababalinyo”?—1 Ped. 3:16.
4 Nalabit a masulisogkayo kadagiti ay-ayam wenno sosial a taripnong iti pagadalan. Alertokayo koma a mangbigbig no kasano a dagitoy agparang a makaay-ayo nga ar-aramid ket mangikompromiso iti pammatiyo. Kasapulan a pilienyo dagiti kakadua a pakasagrapanyo iti “panagpipinnaregta,” a tunggal maysa ket maparegta babaen iti pammati dagiti sabsabali.—Roma 1:12.
5 Makaibturkayo, Babaen ti Tulong ni Jehova: Kanayon a suoten ni Satanas ti pammatiyo. Mabalin a nakaro dagiti pakasuotan a masapul nga ibturanyo, ngem sulit dagiti gunggona. (1 Ped. 1:6, 7) Dikay makapagballigi iti bukodyo; nasken nga agpatulongkayo ken Jehova. Indagadag ni Jesus kadagiti adalanna: “Agtultuloykayo nga agbantay ken agkararagkayo nga agpatpatuloy, tapno dikay sumrek iti pannakasulisog.” (Mat. 26:41) Nasken ti disiplina ken panagteppel.—1 Cor. 9:27.
6 Laglagipenyo a kanayon nga adda sungsungbatanyo ken Jehova, isu a makakita kadagiti amin nga aramidenyo. (Ecl. 11:9; Heb. 4:13) Ti napudno a tarigagay a mangparagsak kenkuana ti mangtignay kadakayo nga ‘itrabaho ti pannakaisalakanyo a buyogen ti buteng ken pigerger.’ (Fil. 2:12) Dakkel ti maitulong ti panagbasa iti Sao ti Dios nga inaldaw.
7 Masapul a nasiput dagiti nagannak kadagiti problema a maipasango kadagiti annakda, ken ipaayda ti tulong no kasapulan. Nagannak, immulayo kadin kadagiti annakyo ti pannakaawat kadagiti linteg ken prinsipio ti Dios? No mapasanguanda kadagiti sulisog, natibker met laeng kadi dagiti annakyo, wenno nalakada a sumuko? Maupayda aya gapu ta naidumada kadagiti kapatadanda? No aramidenyo a nasayaat ti rebbengenyo, matulonganyo ida nga agballigi iti dangadang a maipaay iti pammati.—Deut. 6:6, 7; Prov. 22:6.