Tulongan ti Sabsabali a Mangapresiar iti Pateg ti Biblia
1 Kuna ti Lucas 24:45 maipapan ken Jesus: “Linuktanna a naan-anay ti pampanunotda tapno matarusanda ti kaipapanan dagiti Kasuratan.” Ammona a nasken nga adalen ken tarusanda ti Sao ti Dios. (Sal. 1:1, 2) Iti trabahotay a panangasaba, ti kalattayo isut’ panangirugi kadagiti panangyadal iti Biblia, a sadiay ‘maisuro[tayo] dagiti tattao a mangalagad iti amin a bambanag nga imbilin ni Jesus.’ (Mat. 28:20) Dagiti sumaganad ket sumagmamano a singasing no ania ti sawenyo no agsarungkarkayo.
2 No narugianyo a nagsaritaan ti libro a “Ti Biblia—Saot’ Dios wenno iti Tao?” mabalinyo nga itultuloy ti panagsaritayo a kastoy:
◼ “Adda pay kayatko nga iparang kadakayo a mangipakita ti praktikal a pateg ti balakad ti Biblia. Adu a tattao ti marigatan a makilangen kadagiti sabsabali. Ania ti aramidentayo tapno mapatanor ti nasaysayaat a relasion kadagiti adda iti aglawlawtayo? [Kalpasan a sumungbat, luktan iti pinanid 167-8, parapo 15, sa basaen ti Mateo 7:12. Inayon dagiti kapanunotan a nayebkas iti parapo 16.] Daytoy ti sabali pay nga ehemplo ti kinasirib a masarakan iti balakad ti Biblia. Inton maminsan nga agsubliak, kayatko nga ipakita kadakayo ti balakad nga itukon ti Biblia a tumulong kadagiti naasawaan a mangsarak iti dakdakkel a ragsak iti relasionda.” lyurnosyo ti sumarungkar tapno pagsaritaan ti adda iti pinanid 170-2 maipapan iti biag ti pamilia.
3 No adda nakasaoyo nga interesado iti Biblia, no kasta mabalin nga epektibo daytoy nga iyaasideg tapno mairugi ti panagadal:
◼ “Gistay tunggal tao a makasaoyo kunaenda a kayatda ti agbiag iti maysa a natalna a lubong. No dayta ti kayat ti tunggal maysa, apay ngarud a napno iti nakaro unay a kinaranggas ti lubongtayo? [Palubosan a sumungbat.] Ipakita ti New World Translation kadakayo no sadino iti Biblia ti pakasarakan ti sungbat dayta a saludsod.” Luktan iti panid 1659, sa ipakita ti “Bible Topics for Discussion” No. 43a: “Who is responsible for world distress.” Basaenyo ti 2 Corinto 4:4. Ilawlawagyo no kasano a dadaelen ti Dios ti Diablo sananto iyeg ti maysa a lubong a natalna ken naragsak iti agnanayon. Basaenyo ti Apocalipsis 21:3, 4. Kalpasanna iyurnosyo ti kanayonan a panagsaritayo iti sumaruno nga isasarungkar.
4 No inusaryo ti direkta nga iyaasideg a mangirugi iti panagadal ket adda nasayaat a panangipangag, mabalinyo a sawen daytoy inton agsublikayo:
◼ “Idi napalabas a panagsaotayo, nagsaritaantay no apay a makagunggona ti panagadal iti Biblia. [Basaen ti Juan 17:3.] Addaankami iti programa iti panagadal iti Biblia a nangtulong iti rinibu a nakasursuro iti ad-adu pay maipapan iti inkari ti Dios ken no kasano ti panangay-ayotay kenkuana.” Ipakita ti libro nga Agbiag nga Agnanayon, repasuen dagiti tema ti kapitulo, sa idemostra no kasano nga iyadaltay ti Biblia.
5 No makatulongkayo kadagiti napasnek a tattao a mangapresiar iti pateg ti Sao ti Dios, iti kasta ti sirib a masursuroda babaen ti panangadal iti pinanidna ti agbalin a “maysa a kayo ti biag,” a mangyeg kadakuada iti adu a ragsak.—Prov. 3:18.