Maiparangarang Koma ti Panagrang-ayyo
1 Lagipenyo daydi damo a pannakangngegyo iti mensahe ti Pagarian. Dagiti simple a kinapudno ti nangtukay iti panagtarigagayyo iti pannakaammo. Di nagbayag nabigbigyo a kasapulan nga itunosyo ti panagbiagyo kadagiti nangato a pagalagadan ni Jehova. (Isa. 55:8, 9) Rimmang-aykayo, indedikaryo ti biagyo, ken nagpabautisarkayo.
2 Uray pay no rimmang-aykayon, adda pay latta dagiti pagkapuyanyo a masapul a maparmek. (Rom. 12:2) Nalabit nga adda panagamakyo idi iti tao, a namagkedked kadakayo a makiraman iti tay-ak ti serbisio. Wenno nalabit a nagkurangkayo a mangiparangarang kadagiti bunga ti espiritu ti Dios. Ngem determinadokayo a rumang-ay babaen ti panangituyangyo kadagiti teokratiko a kalat.
3 Mabalin nga adu a tawenen ti naglabas manipud idi nagdedikarkayo. No taliawenyo, ania a panagrang-ay ti naaramidanyon? Naragpatyo aya ti dadduma kadagiti kalatyo? Adda pay la kadi kadakayo ti isu met laeng a regta nga ‘adda kadakayo idi damo’? (Heb. 3:14) Maysa idin a nataengan a Kristiano ni Timoteo idi indagadag ni Pablo kenkuana: “Utobem dagitoy a bambanag; maipamaysaka kadakuada, tapno ti panagrang-aymo maiparangarang iti isuamin a tattao.”—1 Tim. 4:15.
4 Kasapulan ti Personal a Panangsukimat: No utobentay ti napalabas a kabibiagtayo, adda pay la kadi kadatayo ti dadduma kadagiti pagkapuyan nga adda kadatayo idi damo? Napaaytayo aya a nangragpat iti dadduma kadagiti kalat nga intuyangtayo? No wen, apay? Uray pay no nasayaat idi ti panggeptayo, mabalin a nagtantantayo. Nalabit a pinalubosantayo dagiti pakaringgoran iti biag a nangigawid kadatayo.—Luc. 17:28-30.
5 Nupay ditay mabaliwan ti napalabas, sigurado nga adda maaramidtayo maipapan iti masanguanan. Mabalintay a tingitingen no sadinot’ nagkurangantayo, sa sipapasnek nga ikagumaantayo ti rumang-ay. Mabalin a kasapulan a parang-ayentayo ti panangiparangarang kadagiti bunga ti espiritu ti Dios, kas iti panagteppel wenno mabayag a panagitured. (Gal. 5:22, 23) No marigatantayo a makitunos kadagiti panglakayen, kasapulan a sukayentayo ti kinaemma ken kinapakumbaba iti panunot.—Fil. 2:2, 3.
6 Maiparangarangtay ngata ti panagrang-aytayo babaen ti panangragpat kadagiti pribilehio iti serbisio? No nayonanda ti pingetda, mabalin a makakualipikar dagiti kakabsat a lallaki kas ministerial nga adipen wenno panglakayen. Adu kadatayo ti mabalin a makabael nga ag-regular wenno ag-auxiliary payunir. Mabalin nga ikagumaan dagiti dadduma a parang-ayen dagiti personal a kababalin iti panagadal wenno ad-adda a makipaset kadagiti gimong ti kongregasion.
7 Siempre, adda iti tunggal maysa kadatayo a mangikeddeng no ania ti masapul a parang-ayentayo. Masigurodatayo a dumakkel ti rag-otayo no sipapasnek a pagreggetantay ti “rumang-ay iti kina-nataengan.”—Heb. 6:1.