Managtungpalkayo Koma—Saan Laeng a Managdengngeg
1 Ipappapuso dagiti pudno a Kristiano ita ti pammagbaga ti Biblia a managtungpalda koma iti sao, a saan a managdengngeg laeng. (Sant. 1:22) Daytoy ti sibabatad a mangiduma kadakuada kadagidiay, uray kunada a Kristianoda, mangipapaayda laeng iti insao a panagserbi iti Dios. (Isa. 29:13) Silalawag nga imbaga ni Jesus a dagidiay laeng mangar-aramid iti pagayatan ti Dios ti maisalakan.—Mat. 7:21.
2 Awan kaes-eskanna ti panagdayaw nga awan nadiosan nga ar-aramidna. (Sant. 2:26) Gapuna nga isaludsodtay iti bagbagitayo, ‘Kasano a paneknekan dagiti aramidko a napudno ti pammatik? Ania ti mangipakita a pudno nga agbibiagak a maitunos iti patpatiek? Kasano a matuladko a naan-anay ni Jesus?’ Dagiti napudno a sungbat kadagitoy a saludsod tulongannatay a kumita no ania ti nagrang-ayantayon wenno no ania ti masapul a parang-ayentayo pay iti panangaramid iti pagayatan ti Dios.
3 Kas sumursurot iti addang ni Jesus, masapul a maipada iti inyebkas ti salmista ti kangrunaan a kalattayo iti biag: “Iti Dios itukontayo ti panagdaydayaw iti agmalmalem, ket iti tiempo a saan a nakedngan dayawenmi ti naganmo.” (Sal. 44:8) Anian a pannakapnek ti magun-odtayo bayat nga idemostratay babaen ti amin nga aramidtayo ti naimpusuan a tarigagay a mangidayaw ken Jehova!—Fil. 1:11.
4 Saan laeng a Nalinteg a Panagbiag ti Ramanen ti Panangted iti Dayaw ken Jehova: No ti nasayaat a kondukta laeng ti kalikaguman ti Dios, ipamaysatay koma latta a pasayaaten ti personalidadtayo. Nupay kasta, ti panagdayawtayo ramanenna met ti panangiwaragawag a sisasaknap iti kinatan-ok ni Jehova ken panangipannayag iti naganna iti publiko!—Heb. 13:15; 1 Ped. 2:9.
5 Maysa kadagiti kangrunaan a trabaho nga ar-aramidentayo ti publiko a panangikasaba iti naimbag a damag. Impaay ni Jesus ti bagina iti daytoy a trabaho agsipud ta ammona a kaipapananna iti biag nga agnanayon kadagidiay dumngeg. (Juan 17:3) Kasta met ti kapateg ita ti “ministerio iti sao”; isu laeng ti kakaisuna a pakaisalakanan dagiti tao. (Ara. 6:4; Roma 10:13) No mailasintay dagiti manayon a pagimbaganna, maipategtayo no apay a gutugotennatay ni Pablo nga ‘ikasabatay ti sao,’ ken ‘naganetgettay koma iti dayta.’—2 Tim. 4:2.
6 Kasano komat’ kawadwad ti saklawen ti panangidaydayaw ken Jehova iti biagtayo? Kinuna ti salmista nga adda iti panunotna iti agmalmalem. Saan kadi a kasta met ti riknatayo iti dayta? Wen, ket ibilangtayo ti kada pannakisao iti sabali a tao kas gundaway nga agsao maipapan ti nagan ni Jehova. Sapulentayo dagiti maitutop nga oportunidad tapno maiturongtay kadagiti naespirituan a banag ti pannakisaotayo. Mabalin a siiinget a panunoten dagidiay mabalinda ti agserbi kas payunir, ta tulongannatay daytoy a mangipangpangruna iti trabaho a panangasaba iti biagtayo iti kada aldaw. Ipanamnama ti Sao ti Dios kadatayo a babaen ti napinget a panangitungpal iti pagayatan ti Dios, maragsakantayto.—Sant. 1:25.