Agsaokayo a Buyogen ti Kinatured
1 Bayat ti kallabes a tawtawen, natakuatan dagiti agibumbunannag iti dadduma a lugar a rumigrigat ti makisao kadagiti tattao iti pagtaenganda. Adu ti nangipadamag a nasurok a 50 a porsiento dagiti tattao ti awan iti pagtaenganda no mapanda agbalaybalay idiay teritoriada.
2 Iti nabayagen a tawtawen adu a tattao ti masarakan iti taengda no iti Domingo, a mamatmatan a kas aldaw ti panaginana. Nagbaliwen dagiti kustombre. Gagangayen ita dagiti tattao nga adda iti panggedanda, mangtaming iti kasapulan ti pamilia a kas iti panaggatang, wenno aglinglingay, a makagapu nga awanda iti pagtaengan. Isu nga uray no Domingo, nagbalinen a problema ti panangdanon kadagiti tattao iti binalaybalay.
3 Idinto ta makasao dagiti tattao ti kalattayo, apay a saan a kasao dagidiay masabettayo—iti lansangan, iti tiendaan, wenno idiay pagtrabahuan. Kustombre idi nga asitgan ni Pablo ‘dagidiay nairanrana nga adda’ tapno makasabaanna ida. (Ara. 17:17) Epektibo pay laeng daytoy a wagas ti panangsaksi iti kaaldawantayo.
4 No mapantay agbalaybalay, masansan a makitatayo dagiti tattao nga agpagnapagna wenno nalabit adda ur-urayenda. No aldaw a nasayaat ti panniempona, nalabit nakatugawda iti pagtugawan iti parke wenno agtartrabaho wenno agdaldalus iti luganda. Nalabit a ti laeng nainkaarrubaan nga isem ken nainggayyeman a kablaaw ti kasapulantayo tapno mairugi ti saritaan. No asideg ti taengda, mabalintay nga ibaga a nalabit ditay nadanon ida idiay balayda ket maragsakantayo nga adda gundawaytay ita a makisao kadakuada. Babaen iti bassit a tured, adu ti nangtagiragsak kadagiti makagunggona a kapadasan.
5 Adda Maibunga ti Kinatured: Insalaysay ti maysa a kabsat a lalaki nga asitganna dagiti tattao nga agtatakder, agur-uray iti lugan, agpasiapasiar, wenno nakatugaw iti luganda. Babaen ti nabara nga isem ken narayray a timek, umasideg kas mannakigayyem a kaarruba a kayatna laeng ti makipatang. Iti kastoy a wagas a nakaipaima iti nawadwad a literatura ken nakairugi pay iti adu a panangyadal iti Biblia.
6 Adda pay agassawa nga agbalaybalay idi masabatda ti maysa a babai a magmagna a nakaawit iti dakkel a bag a napno iti ginatangna. Rinugianda a kinasarita, kinomendaranda gapu ti panangipaayna iti kasapulan ti pamiliana. “Ngem asino,” insaludsodda, “ti makaipaay iti kasapulan ti sangatauan?” Dayta ti nangtukay iti interes ti babai. Ti ababa a pannakisarita ti nangiturong iti awis a mapanda idiay balayna, a sadiay nairugi iti panagadal iti Biblia.
7 Gapuna iti sumaruno a panagbalaybalayyo, iti Domingo wenno aniaman nga aldaw, a dikay madanon dagiti tattao iti taengda, apay a dikay itured bassit ket kasaoyo dagiti tattao a masabatyo—iti lansangan wenno uray sadino? (1 Tes. 2:2) Mabalin a maaddaankayo iti nabungbunga a ministerio, ken dakdakkel a rag-o ti magun-odyo manipud iti panagserbiyo.