Nagbalbaliwen Dagiti Tiempo
1 Kunaen ti Biblia kadatayo a “ti buya daytoy a lubong agbaliwbaliw.” (1 Cor. 7:31) Anian ti kinapudno dayta kadagitoy nga aldaw! Uray iti unos ti panagbiagtayo, nakitatayo ti bigla a panagbalbaliw ti panunot ken kondukta dagiti tattao iti kada benneg ti natauan a sosiedad. Tapno naballigi a maidanon kadakuada ti mensahe ti Pagarian, masapul a maidanggay ti iyaasidegtayo iti panagbalbaliw dagiti tiempo.
2 Iti naglabas a tawtawen, naiduma ti trabaho a panangsaksi iti adu a pagilian gapu ta nataltalinaay ti panagbiag dagiti tattao, ket mariknada a natalgedda. Naisaad ti relihion iti sagrado a lugar kadagiti biagda. Nangato ti panangmatmatda iti Biblia. Kadagidi nga aldaw masansan a masapul a parukmaentay dagiti palso a doktrina. Ita, nariribuk ti biag dagiti tattao. Napukawen dagiti adu ti pammatida iti relihion ken iti Biblia.
3 Napaliiw ti maysa nga agdaldaliasat a manangaywan: “Itan, kasla adu dagiti problema iti biag ti tattao a masapul nga isurotay ida no kasano ti agbiag.” Gagangay a ti kangrunaan a pakaseknan dagiti tattao naipamaysa iti bagbagida, iti pamiliada, ken iti pakaringgoranda. Dagitoy dagiti bambanag a pagsasaritaanda no aguurnongda. Masapul nga adda dayta iti panunottayo iti intay panangasaba. Nabalballigitayo no rugiantay dagiti saritaan a mainaig kadagiti problema a naipasango kadagidiay kasaotayo.
4 Ti Pagarian ti Dios ti Kakaisuna a Sigurado a Namnama iti Masanguanan: Bassit ti talek ti kaaduan a tattao iti natauan a gobierno. Napaay ti ulbod a relihion a mangted kadakuada iti aniaman a basaran ti namnama. Dayta ti gapuna a ti kadakkelan a kasapulan ti sangatauan isut’ panangdengngeg iti naimbag a damag maipapan iti Pagarian ti Dios. Ti kangrunaan a kalattayo a mangasaba isut’ panangiturong iti Pagarian ken ipakita no kasano a mangipaay dayta kadagiti solusion iti amin a problema a maipaspasango iti sangatauan.
5 Ti Biblia ti Kakaisuna a Mapagpiaran a Gubuayan ti Giya: Nayaw-awan dagiti umili ita babaen kadagiti pangulo nga agtalek kadagiti natauan a sirib ken nailubongan a pilosopia. (Jer. 10:23) Ti kapatgan a leksion a maadalda isu daydiay masapul nga ‘agtalekda ken Jehova iti amin a pusoda ken dida agsadag iti pannakaawatda met laeng.’ (Prov. 3:5) Nupay nagbaliwen ti tiempo, ti Biblia, saan. Ngarud, iti ministeriotayo masapul nga isurotay dagiti sabsabali a mangipateg iti naipaltiing a giyana. (2 Tim. 3:16, 17) Tapno maaramid dayta, masapul nga usarentayo ti Biblia a mangsungbat kadagiti saludsodda, ken itandudo a masapul nga adalen dayta ken iyaplikar dagiti linaonna a praktikal a kinasirib.
6 Uray no agbaliwbaliw ita ti tiempo, saan a nagbalbaliw ti panggep ti ministeriotayo. Nupay kasta, tapno mairingpas iti kasayaatan a wagas dagitoy a gandat bayat ti 1996, masapul a maikanatad ti sawentayo kadagiti agdama a kasapulan dagidiay kasabaantayo. No aramidentay daytoy, mairanudtayo ti naimbag a damag iti sabsabali ket iti kasta maallukoytay ti kaaduan a tattao.—1 Cor. 9:19, 23.